ናሆማ 1

ያሽያ ጾሳ ሀንቁዋ

(1:1-6)

1 ኤልቆሻ ጌተትያ ሳን ደእያ ናሆመ ነነዌ ቦላ ጾሳፐ አኬዳ ኪታይነ በኤዳ ሳፃ ማጻፋይ ሀዋ።✝1:1—3:19ኢሳ. 10:5-34፤ 14:24-27፤ ሶፎ. 2:13-15

ነነዌ ቦላን ጾሳይ ሀንቀቴዳ ሀንቁዋ

2 መና ጎዳይ ቃናትያነ ሀሉዋ ከስያ ጾሳ፤ መና ጎዳይ ሀሉዋ ከስያዋነ ሀንቁዋን ኩሜዳዋ፤ መና ጎዳይ ባረናና ኤቀትያዋንቶ ሀሉዋ ከሴ፤ ቃይ ባረ ሞርከቱዋ ሙራናዉ ባረ ሀንቁዋ ጊግስ ዎዳ። 3 መና ጎዳይ ሀንቀታናዉ ኤሌለና፤ ዎልቃይካ አዌ ዎልቃማ፤ እ ባይዛንቻ አያ ግዶፐነ፥ ሙረናን አገና።

መና ጎዳዉ ጎቱዋንነ ቤታ ግዶን ኦጊ ደኤ፤ ሻሪካ አ ገዲ የና ደንድያ ባና። 4 እ አባ ሴሪደ መልሴ፤ ሻፋቱዋ ኡባካ ቶይሴ። ባሳነንነ ቃርመሎሳን ደእያ ምቱነ ማታቱ ሹሊኖ። ሊባኖሳ ጪሻይካ ቆቆፈቴ። 5 አ ስንን ደረቱ ቃጺኖ፤ ዞዘቱካ ሲሊኖ። እ ቆንጭያ ዎደ ቢታይ ሳአይ ቃጻና፤ ሳኣን ደእያባይ ኡባይካ ኮኮራና። 6 አ ሀንቁዋ ስንን ኤቃናዌ ኦኔ? አ ሀንቁዋ ሱሉዋካ ዳንዳያናዌ ኦኔ? አ ሀንቁ ታማዳን ቡክያ ዎደ፥ ዛላቱ ዛኢደ ጳልቀቲኖ።

አሶረ ቦላ አዳ ፕርዳይ እስራኤልያ አሳዉ ህዶታ ቤትሴዳ

(1:7-15)

7 መና ጎዳይ ኬካ፤ መቱዋ ጋላስካ ባቃት አትያሳ፤ እ ባረኮ ባቃት አታናዉ ኮይያዋንታ ኤሬ። 8 ሽን እ ባረ ሞርከቱዋ ድኡዋን ሙክሲደ ይሳና፤ ባረናና ኤቀትያዋንታካ ማዉ የደርሳና።

9 ህንተ መና ጎዳ ቦላ ማቀትያዌ እ አዬ? እ ህንተና ኡባና ይሳና፤ ላኤንዋ ይሳናዉ ደንደና። 10 ህንተንቱ፥ ባጽባለቴዳ አጉን ማላቱ፥ ቃይ ኡሺደ ማቴዳዋዳን ጋንድጋርያዋንቱ፥ መላ ኡቱላዳን ታማን ጹገት ያና። 11 ነነዌ፥ መና ጎዳ ቦላ ኢታባ ቆፕያዌ፥ ኢታ ዞርያ ዞርያዌ ነ ግዶፐ ከሴዳ።

12 መና ጎዳይ ሀዋዳን ያጌ፤ "ናናዌቱ ምኖነ ጮራ ግዶፐካ፥ ቆለቲደ ያና። ይሁዳ አሳዉ፥ ታን ህንተና ካሰ ቱጋያድ፤ ሽን ሀዋፐ ስንናዉ ቱጋይከ። 13 ሀእ ታን አሶረቱዋ ሞርገ ም ህንተ ሞርግያፐ መንና፤ ህንተ ኡቁና ቃሹዋካ ታን ዱሰረና" ያጌ።

14 ነነዌ፥ መና ጎዳይ ነ ቦላ ፕርዴዳ ፕርዳይ ሀዋዳን ያግያዋ፤ "ሀዋፐ ስንናዉ ነ ሱን ጼስስያ ዘረይ ነዉ ደኤና። ነ ጾሳቱዋ ጎልያን ደእያ ምስለቱዋነ ኤቃቱዋ ታን ይሳና። ኔን ዳምበናዋ ግዴዳ ድራዉ፥ ታን ነ ዱፉዋ ቦካና" ያግያዋ።

15 በእተ፥ እት ኪተቴዳዌ ሎኦ ምሽራቹዋ ኦዲድነ ሳሮተ አዋዪደ፥ ቃ ደረቱዋ ቦላና ጋኬዳ። ህንተኖ፥ ይሁዳ አሳቶ፥ ህንተና ይስያ ሞርከቱ ኡባና ዬድኖ፤ ኡንቱንቱ ላኤን ህንተ ቢታ ዎራጅክኖ። ሄዋ ድራዉ፥ ህንተ ባላቱዋ ቦንችተ፤ ህንተ ሺቄዳዋካ ጋተ።✝1:15 ኢሳ. 52:7