1 የሱስ ሽረትካ ጋሊላ አባ ማታን ታማርሱዋ ዶሜዳ፤ ጮራ አሳይ ባረ ምይያን ዩይ አደ ሺቅ ኡትና፥ አባን ደእያ ዎንግርያ ግዶ ገሊደ፥ አን ኡቴድኖ፤ ቃይ ሄ አሳይ ኡባይ አባ ምይያን ደኤ።✝4:1 ሉቃሳ 5:1-3 2 እ ኡንቱንታ ዳሮባ ሌምሱዋን ታማርሲደ፥

3 "ስስተ፤ እት ብታኒ ዘረ ዘራናዉ ከሴዳ። 4 እ ዘርሽን፥ እት እት ዘረይ ኦግያ ዶናን ዎዳ፤ ሄዋ ካፉ ዪደ ሜዳ። 5 እት እት ዘረይ አንጮ ቢታ ቦላ ዎዳ፤ ዳሮ ቢታይ ባይና ድራዉ፥ ሄ ዘረይ ኤለካ ሞኬዳ። 6 አዋይ ከሴዳ ዎደ ሹሌዳ፤ አዱሳ ጻጱዋ የድቤና ድራዉ፥ መል አጌዳ። 7 እት እት ዘረይ አጉን ግዶን ዎዳ፤ ሄዋን ሞኬዳዋ አጉንይ ድጪደ ጩልና፥ አይፈናን አቴዳ። 8 እት እት ዘረይ ቱኤ ቢታን ዘረቲደ ሞኬዳ፤ ድጪደ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ።" 9 ቃይካ የሱስ፥ "ስሳናዉ ሀይይ ደእያ ኡራይ ስሶ" ያጌዳ።

10 ታማነ ላኡ የሱሳ ካልያዋንቱነ እ ኦዴዳዋ ስሴዳ ሀራ አሳቱ እ ባረካ ደእሽን አኮ ሺቂደ፥ ሄ ሌምሱዋ ብለ አ ኦቼድኖ። 11,12 የሱስ ኡንቱንቶ፥ "ህንተንቶ ጾሳ ካዉተ ጹራ የዉዋ ኤራይ እመቴዳ፤ ሽን ሀራቱ ካዉተፐ ካረና ደእያዋንቱ፥ ጼላ ጼሊደ በኤና ማላ፥ ቃይ ስሳ ስሲድካ አኬከና ማላ፥ ኡንቱንቱ ሽረቲደ ጾሳኮ ስምና፥ እ ኡንቱንቱ ናጋራ አቶ ጌና ማላ፥ ኡንቱንቶ ኡባባይ ሌምሱዋን ኦደቴ" ያጌዳ።✝4:11-12 ኢሳ. 6:9-10

13 የሱስ ኡንቱንታ፥ "ሀ ሌምሱዋ ኤርክቴ? ያትና፥ ሌምሱዋ ኡባ ዎት ኤራንቴ? 14 ዘርያዌ ጾሳ ቃላ ዘሬ። 15 ቃላይ ዘረትያ ኦግያ ዶናን ደእያዋንቱ ሀዋንታ፤ ኡንቱንቱ ቃላ ስስያ ዎደ፥ ሴጻናይ ኤለካ ዪደ፥ ኡንቱንቱ ዎዛናን ዘረቴዳ ቃላ አፍ ድጌዳ። 16 ሀዋዳንካ ቃይ አንጮትያ ቢታን ዘረቴዳዋንቱ ሀዋንታ፤ ኡንቱንቱ ቃላ ስሲደ፥ ኤለካ ናሸቻን አኪኖ። 17 ኡንቱንቱ ሀእዉ ደኢኖፐ አትን፥ ኡንቱንቶ ምኖ ጻጱ ባዋ፤ ጉየፐ ቃላ ጋሱዋን ዋዪ ዎይ የደርሱ ይያ ዎደ፥ ኡንቱንቱ ኤለካ በት አጊኖ። 18 ቃይ አጉን ግዶን ዘረቴዳዋንቱ ሀዋንታ፤ ኡንቱንቱ ቃላ ስስያዋንታ። 19 ሽን ሀ ሳኣ ደኦ ህርግያዌ ዱረተ ዶስያዌነ ሀራባ አሞትያዌ ኡንቱንቱ ዎዛናን ገሊደ፥ ቃላ ጩልና አይፈናን አት አጌዳ። 20 ሽን ቱኤ ቢታን ዘረቴዳዋንቱ ቃላ ስሲደ አክያዋንታ፤ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ" ያጌዳ።

21 የሱስ ጉጂደ፥ "ጾምፕያ አሂደ፥ ግላፐ ዎይ አርሳፐ ጋርሳና ዎያ አሳይ ደኢ? ቃሳን ዎኔ? 22 አያዉ ጎፐ፥ ቆሴዳባይ ኡባይ ቆንጭያ ከሳናዋ፤ ቃይ ጌማን ዎዳባይ ኡባይ ቤተናን አተና። 23 ስሳናዉ ሀይይ ደእያ ኡራይ ደኦፐ ስሶ" ያጌዳ።

24 ቃይካ ኡንቱንታ፥ "ህንተንቱ ስስያዋ አኬኪደ ስስተ፤ ጾሳይ ህንተ ማኬዳ ቁንኣን ህንተንቶ ማካናዋ። እ ህንተንቶ ዳርሲደ እማና፤ 25 ደእያ ኡራዉ ጉጅ እማና፤ ባይናዋፐ ሀራይ አቶ፥ አዉ ደእያ ሄ ጉቶካ አክ ድጋና" ያጌዳ።

26 የሱስ ቃይካ፥ "ጾሳ ካዉተይ ጋደን ካ ዘርያ አሳ ማላ። 27 ሄ ብታኒ ቃማ ገምእሼ፤ ጉራ ደንዴ፤ እ ባረ ሁጰዉ ዋንንቶ ኤረናን፥ ሄ ዘረይ ሞኬነ ድጬ። 28 ቢታይ ካ ባረካ ሞኬነ አይፌ፤ ኮይሮ ጫርሻይ ጫሬ፤ ጉየፐ አይፋናዉ ኩኩሜ፤ ቃይ ዉርሰን ኩመን አይፍያ አይፌ። 29 ሽን ካይ ጋክያ ዎደ፥ ካ ሺሽያ ዎዲ ጋኬዳ ድራዉ፥ ብታኒ ኤለካ ባጫን ጫኩዋ ገል አጌዳ" ያጌዳ።✝4:29 ኢዩ. 3:13

30 የሱስ፥ "ኑን ጾሳ ካዉተ አያ ማላቴ ጋኔ? ዎይ አያና ሌምሳኔ? 31 ጾሳ ካዉተይ ሳናፍጭያ አይፋቶ ማላቴ። ሄ አይፋታ ዘርያ ዎደ፥ ሳኣን ደእያ ም አይፊያ ኡባፐካ ጉጻዉ፤ 32 ሄኖ ዘርና ሞካደ ሀራ አታክልትያ ኡባፐ ዳራዉ፤ ዳሮ ዳሻ ዳሻዉ። ካፉ እዝ ቃንካ ኩዋን ጎልያ ኬጻና ዳንዳዬ" ያጌዳ።

33 የሱስ ሀዋ ማላ ዳሮ ሌምሱዋን አሳይ ስሳናዉ ዳንዳይያዋ ኬና፥ ባረ ቃላ ኦዴዳ። 34 አሳዉ ሌምሱ ባይናን ኦደና፤ ሽን የሱስ ባረና ካልያዋንቱ ጻላላና ደእያ ዎደ፥ ኡንቱንቶ ኡባባ ብሊደ ኦዴ።

35 ሄ ጋላስ ሳአይ ኦማርስና፥ የሱስ ባረና ካልያዋንታ "አባፐ ሄፍን ፕኖይተ" ያጌዳ። 36 አ ካልያዋንቱ አሳ አጊደ፥ የሱስ ካሰ ገል ኡቴዳ ዎንግርያን ገሊደ፥ የሱሳ ባረንቱና አፌድኖ፤ ሀራ ዎንግራቱካ ሄዋን ደኢኖ። 37 ዎልቃማ ጎቱ ደንድና፥ ቤታይ ዎንግርያ ሾጭና፥ ሃይ ኩማና ጋካናዉ ዎንግርያ ግዶ ገሌዳ። 38 ሄ ዎደ የሱስ ዎንግርያን ጉየ ባጋና ቦርኮ ቦርኮቲደ ገምእሼዳ። የሱሳ ካልያዋንቱ አ ደንደ፥ "ታማርስያዎ፥ ኑን ይያ ዎደ ጮኡ ጋደ ጼላይ?" ያጌድኖ።

39 እ ቤጎቲደ ጎቱዋ፥ "ጮኡ ጋ" ጊደ፥ አባካ፥ "ዎፑ ጋ" ጌዳ፤ ጎቱካ ጮኡ ጊና፥ ኡባባይካ ዎፑ ጌዳ። 40 የሱስ ባረና ካልያዋንታ "አያዉ ሀዋዳን ያዪቴ? ህንተንቱ ዋን አማንክቴ?" ያጌዳ።

41 ኡንቱንቱ ዳሮ ያዪደ ባረንቱ ግዶን፥ "ሀዌ ላ ሀራይ አቶ፥ ጎቱነ አባይ አዛዘትያዌ ኦኔ?" ያጌድኖ።