1 የሱስ ደርያፐ ዎዳ ዎደ፥ ጮራ አሳይ አ ካሌዳ። 2 ሄ ዎደ ኦሉ*8:2 ኦሉ ኦይቄዳ አሳ ቦላይ ቦጼ። ሀዌ ሳክያ አሳይ ሄ ዎደ ደኡዋን አሳና ደእያ ዎጋ ኡባፐ ሻከቲደ ደኤ። ቃይካ ጌሻ ግደና ጌተቲደ ሀራ አሳን ጼሰቴ። ኦይቄዳ እት ብታኒ የሱሳኮ ይ አ ስንን ጉልባቲደ፥ "ጎዳዉ፥ ነ ሸነ ግዶፐ፥ ታና ፓደ ጌሻናዉ ዳንዳያ" ያጌዳ።

3 የሱስ ባረ ኩሽያ የድ አ ቦቺደ፥ "ታን ኮያይ፤ ፓጻደ ጌያ!" ያጌዳ። ኤለካ ኦሉ ብታንያ የድ አጌዳ። 4 የሱስ አ፥ "ስም ሀዋ ኦስነ ኦዶፓ፤ ሽን ቄሳኮ ባደ ነ ፓጻደ ጌዬዳዋ አ በሳ፤ ነ ፓጻደ ጌዬዳዋ አሳ ኤርሳናዉ ሙሴ አዛዜዳ ያርሹዋ ጾሳዉ ያርሻ" ያጌዳ።✝8:4 ዎጋ 14:1-32

5,6 የሱስ ቅፍርናሆማ ካታማ ገሌዳ ዎደ፥ እት ሮማ ጋደ ጼቱዋ ካፑ አኮ ዪደ፥ "ታ ጎዳዉ፥ ታ ቆማ ቦላይ ጉንድና፥ ዳሮ ሳከቲደ፥ ሶይን ግሴዳ፤ ሀያ ጎዶ ታዉ ፓርኪ" ያግ ዎሴዳ።

7 የሱስ፥ "ታን ባደ አ ፓና" ያጌዳ።

8 ሽን ጼቱዋ ካፑ ዛሪደ፥ "ታ ጎዳዉ፥ ኔና ታ ሶይ ገልሳናዉ ታዉ በሰና፤ ሽን ኔን ቃላ ጻላላ ሃሳያ፤ ታ ቆማይ ፓጻናዋ። 9 አያዉ ጎፐ፥ ታን ታፐ ቦላና ደእያዋንቶ ኤኖ ግያ አሳ፤ ቃይ ታፐ ጋርሳና ዎታዳራቱ ደኢኖ። ታን እቱዋ፥ ‘ባ!’ ጎፐ ቤ፤ ቃይ የኩዋ፥ ‘ሃያ!’ ጎፐ ዬ፤ ታ ቆማ፥ ‘ሀዋ ኦ!’ ጎፐ ኦ" ያጌዳ።

10 የሱስ ሄዋ ስሴዳ ዎደ ማላለቲደ፥ ባረና ካልያ አሳ፥ "ታን ህንተዉ ቱሙዋ ኦዳይ፤ ታን ሀዋ ማላ አማኑዋ ሀራይ አቶ፥ እስራኤልያ ጋድያንካ በአበይከ። 11 ጮራ አሳይ አዋይፊ ዶልያ ባጋፐነ ዉልያ ባጋፐ ዪደ፥ አብራሃሞና፥ ይሳቃናነ ያቆባና ሳሉዋ ካዉተ ጋይታን እትፐ ኡታናዋንታ ያጋይ። 12 ሽን ካዉተን ደአናዉ በስያ አሳይ ዎልቃማ ማ ጋርሳ ካረ ኦለታና፤ ሄዋን ኡንቱንቱ ዬካናነ ባረንቱ አቻ ቃናዋንታ" ያጌዳ።

13 ሄዋፐ ካላ የሱስ ጼቱዋ ካፑዋ፥ "ነ ሶይ ባ፤ ኔን አማኔዳዋዳን ነዉ ሀኖ" ያጌዳ፤ ጼቱዋ ካፑዋ ቆማይ ሄ ሳትያንካ ፓጽ አጌዳ።

14 የሱስ ጰጽሮሳ ሶይ ቢደ፥ አ ቦሎታታ ቆጹዋ ሀርጋደ ግሴዳዉኖ በኤዳ። 15 እዝ ኩሽያ የሱስ ቦችና፥ ቆጹ እዞ ባሽ አጌዳ፤ እዛካ ደንዳደ አዉ ምያባ ጊግሳዱ።

16,17 ሳአይ ኦማርሴዳ ዎደ፥ አሳይ ኢታ አያናቱ ኦይቄዳ ጮራ አሳ የሱሳኮ አሄዳ፤ ናብያ ኢስያስ፥ "እ ኑ ዳቡራ ባረዉ አኬዳ፤ ቃይ ኑ ሀርግያካ ቶኬዳ" ያጌዳዌ ፖለታና ማላ፥ የሱስ ኢታ አያናቱዋ ባረ ቃላን ከሲደ፥ ሀርጌዳ አሳ ኡባካ ፓዳ።✝8:16-17 ኢሳ. 53:4

18 የሱስ ጮራ አሳይ ባረ ዩሹዋን ደእያዋንታ በኢደ፥ አባፐ ሄፍን ፕናና ማላ፥ ባረና ካልያዋንታ አዛዜዳ። 19 ሄዋፐ ጉይያን ሙሴ ህግያ ታማርስያ እቱ አኮ ዪደ፥ "ታማርስያዎ፥ ኔን ብያሳ ኡባ ታን ኔና ካላና" ያጌዳ።

20 የሱስ አ፥ "ዎራካናቶ ኦላይ ደኤ፤ ካፋቱዋስካ ኬይ ደኤ፤ ሽን ታዉ፥ አሳ ናአዉ፥ ሸምፓ አክያሳይካ ባዋ" ያጌዳ።

21 ቃይ ካልያዋንቱፐ እቱ የሱሳ፥ "ጎዳዉ፥ ታን ስንታ ባደ ታ አባ ሞጋናዉ ባ ያጋርኪ" ያጌዳ።

22 ሽን የሱስ አ፥ "ኔን ታና ካላ፤ ሀይቄዳዋንቱ ባረንቱ አሃ ሞግኖ" ያጌዳ።

23 የሱስ ዎንግርያን ገሎደ፥ አ ካልያዋንቱ አናና ቤድኖ። 24 ቤታይ ዎንግርያ ምታና ጋካናዉ፥ አባን ዎልቃማ ሆቢ ደንዴዳ፤ ሽን የሱስ ገምእሼዳ። 25 አ ካልያዋንቱ አኮ ቢደ፥ ገምእሹዋፐ ደንድኖ፤ ሄዋፐ ስሚደ አ፥ "ጎዳዉ፥ ኑን ዬቶ፤ ኑና አሻርኪ" ያጌድኖ።

26 የሱስ ኡንቱንታ፥ "ሀ አማኑ ፓጬዳዋንቶ፥ አያዉ ያዪቴ?" ያጌዳ። ሄዋፐ ጉይያን ደንዲደ፥ ጎቱዋነ ቤታ አግተ ጊና፥ ጎቱነ ቤታይ ጮኡ ጌዳ።

27 አሳይ ማላለቲደ፥ "ሀዌ ላ ሀራይ አቶ፥ ጎቱነ ቤታይ አዛዘትያዌ አይባ አሴ?" ያጌድኖ።

28 የሱስ ጋሊላ አባፐ ሄፍንን ደእያ ገርገሰኖና ጌተትያ ጋድያ ፕኔዳ፤ ኢታ አያናቱ ኦይቄዳ ላኡ አሳቱ ሄ ጋድያን ደእያዋንቱ ዱፉዋፐ ከሲደ፥ አናና ጋከቴድኖ። ኡንቱንቱ ዳሮ ኢታ ግድያ ድራዉ፥ ኦንነ ሄ ኦግያና አናዉ ዳንዳይቤና። 29 ኡንቱንቱ ባረንቱ ቃላ ቁ ኦደ፥ "ጾሳ ናአዉ፥ ኑናና ነዉ አይ አላሊ ደኢ? ዎዲ ጋከናን ኑና ሙራናዉ ያዲ?" ያጌድኖ።

30 ኡንቱንቱፐ ላፋ ሃክያሳን ጉዱን ዉዲ ሄመቴ። 31 ኢታ አያናቱ የሱሳ፥ "ኔን ኑና ከስያዋ ግዶፐ፥ ህን ጉዱን ዉድያ ግዶ የዳርኪ" ያጊደ ዎሴድኖ።

32 የሱስ ኡንቱንታ፥ "ቢተ!" ጊና ኡንቱንቱ ብታናቱዋፐ ከስ ቢደ፥ ጉዱንቱዋን ገሌድኖ። ጉዱን ዉዲ ኡባይ ካካ ላንቂያና ካጆቲደ፥ አባን ገሊደ፥ ምተት አጌድኖ።

33 ጉዱን ዉድያ ሄምያዋንቱ ባቃቲደ ካታማ ብ አጌድኖ፤ ቤዳሳን ኢታ አያናቱ ኦይቄዳ አሳቱ ሀኔዳባ ኡባ ኦዴድኖ። 34 ሄዋ ስሴዳ ካታማን ደእያ አሳይ ኡባይ የሱሳና ጋከታናዉ ከሴድኖ፤ አ በኤዳ ዎደ፥ ባረንቱ ጋድያፐ ባና ማላ ዎሴድኖ።