1 ያትና፥ አይሁዳ አሳቱ አያን አይሁዳ ግደና አሳፐ አኖ? ዎይ ቃጻረትያዋን አይ ማዱ ደኢ? 2 ሀዌ አይሁዳቱዋ ኡባባን ሎይ ማዴ፤ ኡባባፐ ካሰ ጾሳይ ባረ ኪታ ሀዳራ አይሁዳቶ እሜዳ።

3 ያትና ኡንቱንቱፐ እቱ እቱ አማነተናዋ ግዶፐ፥ ዋኒ? ሄዋ ድራዉ፥ ጾሳይ አማነተና ያግያዌ? 4 ሄዋ ግደና፤ አሳይ ኡባይ ዎርዳንቻ ግዶፐካ፥ ጾሳይ ግያዌ ቱማ ግዳናዉ በሴ። ጾሳ ማጻፋይ፥ "ኔን ሃሳይያ ዎደ፥ ኔን ጽሎ ግድያዋ ኤርሳናዉ ኮሼ፤ ኔን ሞተትያ ዎደ፥ ሻትማናዉ በሴ" ያጌ።✝

5 ሽን ኑ ባይዙ ጾሳ ጽሎ ኦሱዋ ኤርስንቶ፥ ኑን ዋጋኔ? ኑ ቦላ ሀንቁዋ አህያ ጾሳይ ባይዛንቼ? ታን አሳይ ግያዋዳን ጋይ። 6 ሄዌ ዋዪ ሀናና። አያዉ ጎፐ፥ ሄዋዳን ግዶፐ፥ ጾሳይ ሀ አላምያ ቦላ ዎት ፕርዳኔ?

7 ሽን ታ ዎርዱዋን ጾሳ ቱማተይ አ ቦንቾ ዳሮፐ፥ ያትና፥ ሀዋ ጋካናዉ አያዉ ታ ቦላ ናጋራንቻዳን ፕርዲ? 8 ያትና ኑን፥ "ሎኡ ያናዳን፥ አነ ኢታባ ኦይተ" አያዉ ጎኮ? እት እት አሳይ ሀዋ ታና ሞቲደ ቦሬድኖ፤ ኡንቱንቱ ጾሳፐ በስያ ፕርዳ አካና።

9 ሄዋ ድራዉ፥ ኑን ዋጋኔ? ኑን አይሁዳቱ፥ አይሁዳ ግደና አሳፐ ዳሬቶ? ሄዋ ግደና፤ አያዉ ጎፐ፥ አይሁዳቱካ አይሁዳ ግደና አሳቱካ ኡባይ እትፐ ናጋራፐ ጋርሳን ደእያዋ ታን ካሰ ህንተንቶ ኦዳድ።

10 ጾሳ ማጻፋይ ሀዋዳን ያጌ፤✝

"ጽሎ አሳይ እቱነ ባዋ።

11 አኬክያ አሳይካ ባዋ፤

ዎይ ጾሳ ኮይያዌካ ባዋ።

12 አሳይ ኡባይ ኦግያፐ ካረ ከሴድኖ፤

ኡባይ ሙለካ ማደናዋ ግዴዳ።

ሎኦባ ኦያ ኦንነ ባዋ፤

ሀራይ አቶ እቱነ ባዋ።

13 ኡንቱንቱ ዶናይ ዶያ ደእያ ዱፉዋ ማላ።

ባረንቱ እንጻርሳን ዎርዶቴድኖ።

ኡንቱንቱ ዶናፐ አሳ ዎያ ሾሻ

ይሻ ማላ ሃሳያይ ከሴ።✝

14 ኡንቱንቱ ዶናን ሸቃይነ ጫሞባይ ኩሜዳ።✝

15 ኡንቱንቱ ሱ ጉሳናዉ፥

ዳሪ ኤሌሊኖ።✝

16 ባይዙነ ኮለይ፥

ኡንቱንቱ ቤዳሳን ሀቃንነ የና።

17 ኡንቱንቱ ሳሮተ ኦግያካ ኤርክኖ።

18 ቃይ ጾሳዉ ያይያባይ፥

ኡንቱንቱ ቆፋን ባዋ"

ያጌ።✝

19 አሳ ኡባ ሃሳያ ድጋና ማላነ ኩመን ሳኣ ጾሳ ፕርዳፐ ጋርሳዉ አና ማላ፥ ህግያ ግዶን ኦደቴዳ ኡባባይ ህግያፐ ጋርሳን ደእያ አሳዉ ሃሳይያዋ ኑን ኤሬቶ። 20 ጾሳ ስንን ኦንነ ህጊ አዛዝያዋ ኦያዋን ጽለና፤ ህጊ እት አሳይ ናጋራ ኦዳዋ ኤራናዳን ኦ።✝

21 ሽን ጾሳይ አሳ ጽልስያ ኦጊ ህጊ ባይናን ሀእ ቆንጬዳ፤ ህጊነ ናባቱ ሄ ጽሎተባ ማርካቴድኖ። 22 ጾሳይ አሳ የሱስ ክርስቶሳ አማንያዋን ጽልሴ፤ ጾሳይ ሄዋ አ አማንያ ኡባዉ ኦ፤ አይ ሻኮተይነ ባዋ።

23 አያዉ ጎፐ፥ አሳይ ኡባይ ናጋራ ኦዳ፤ ጾሳ ቦንቹካ ኡንቱንቶ ጉጼዳ። 24 ሽን ኡንቱንቱ ጾሳይ እምያ አ አ ኬካተን፥ ባረንታ ዎዝያ ክርስቶስ የሱሳ ባጋና ጮ ጽሌድኖ። 25 የሱሳ ሱን አሳይ አ አማኒደ፥ ባረ ናጋራዉ ማሮተ ደማናዉ፥ ጾሳይ አ እሜዳ፤ ጾሳይ ሄዋ ባረ ጽሎተ በሳናዉ ኦዳ፤ እ በን ዎድያን አሳ ናጋራ ዳንዳዪደ፥ ካ ባሽ አጌዳ፤ ሽን 26 ሀ ዎድያን ባረ ጽሎተ በሳናዉ አሳ ናጋራ አገና፤ ጾሳይ ሄዋ ኦያዋን እ ባረ ሁጰዉ ጽሎ ግድያዋነ የሱሳ አማንያ ኡባ ጽልስያዋ በሴ።

27 ያትና፥ ኑን አያዉ ጬቀታኔ? አይነ ባዋ። አያ ጋሱዋኔ? ኑን ህገዉ ኤኖ ግያዋኔ? ግደና፤ አማኑዋ ህግያናፐ አትን። 28 አያዉ ጎፐ፥ አሳይ አማኑዋን ጽላናፐ አትን፥ ህጊ አዛዝያዋ ኦያዋና ግደና ያጊደ ቆፔቶ።

29 ዎይ ጾሳይ አይሁዳቱዋ ጻላላዉ ጾሴ? አይሁዳ ግደና አሳዉ ጾሳ ግደኔ? ቱማ፥ አይሁዳ ግደናዋንቶካ እ ቃይ ጾሳ። 30 እት ጾሳ ጻላላይ ደኤ፤ አይሁዳቱዋ ኡንቱንቱ አማኑዋን እ ጽልሳና፤ ቃይ አይሁዳ ግደናዋንታካ ኡንቱንቱ አማኑዋን ጽልሳና።✝ 31 ያትና፥ ኑን ህግያ አማኑዋን ጋጻ ሱጋኔ? ግደና፤ ህግያ ምንሶይተፐ አትን።