1 ሀእካ ህንተኖ ዱረ አሳቶ፥ ህንተ ቦላ ይያ ቱጋዉ "አየ! አየ!" ያጊደ ዬክተነ ዝላልተ። 2 ህንተ ዱረተይ ባይ ድጌዳ፤ ቃይ ህንተ አፍላካ ብልአይ ም ድጌዳ። 3 ህንተ ዎርቃይነ ህንተ ብራይ ሽእ ድጌዳ። ቃይ ሄ ሽአይ ህንተ ቦላ ማርካታና፤ ህንተ ቦላካ ታማዳን ማና። ህንተ ህንተ ሚሻ ስንዉ ዳጋይ ደኢታ። 4 አኬክተ፤ ህንተ ጋደን ካ ቆይጬዳ አሳቶ ጭግቤና ክራ ሚሻይ ዋሴ፤ ኡንቱንቱ ዋሱ ዎልቃማ ጎዳ ሀይን ስሰቴዳ።✝ 5 ህንተዉ እንጀትና፥ ሳኣን እሻሊደ ደኤድታ፤ ሹካ ጋላሳዉ ክያዋዳን፥ ህንተ ቦላ ኬድታ። 6 ጽሎ አሳ ቦላ ፕርዴድታ፤ ቃይ አ ዎድታ፤ እ ህንተናና ኤቀተና።

7 ሄዋ ድራዉ፥ ታናዳን ጾሳ ካልያዋንቶ፥ ጎዳይ ያና ጋካናዉ ገንጭተ፤ ቢታ ጎሽያዌ አድልያ እራይነ አሱራ እራይ ያና ጋካናዉ ገንጪደ፥ አልኦ ካ እ ዎት ናጊደ ጋ አክንቶ በእተ። 8 ህንተካ ቃይ ገንጭተ፤ ህንተ ዎዛና ምንስተ። አያዉ ጎፐ፥ ጎዳ ዩሳይ ማታቴዳ።

9 ታናዳን ጾሳ ካልያዋንቶ፥ ጾሳይ ህንተ ቦላ ፕርደና ማላ፥ እቱ እቱዋ ቦላ ዙዙሞፕተ። በእተ፥ ፕርድያዌ ፐንግያን ኤቄዳ። 10 ታናዳን ጾሳ ካልያዋንቶ፥ ዋይያስነ ገንጫዉ ሌምሱዋ ግዴዳዋንታ፥ ጎዳ ሱንን ሃሳዬዳ ናባቱዋ ሀሳይተ። 11 በእተ፥ ዳንዳዪደ ገንጬዳዋንታ ኑን አንጀቴዳዋንታ ጌቶ። ኢዮባ ገንጫ ህንተ ስሴድታ፤ ቃይ ጎዳይ አዉ ዉርሰን እሜዳዋካ ቤድታ። አያዉ ጎፐ፥ ጎዳይ ማሮታይነ ቃረታይ ኩሜዳዋ።✝

12 ሽን ኡባፐ ካሰ፥ ታናዳን ጾሳ ካልያዋንቶ፥ ሳሉዋን ግድና፥ ዎይ ሳኣን ግድና፥ ዎይ ሀራ ጫቁዋን ግድና፥ አያንካ ጫቆፕተ። ሽን ጾሳ ፕርዳን ህንተ ገለናዳን፥ ህንተ የዉ ኤ ግያዋ ግዶፐ፥ "ኤ" ጊተ፤ ግደና ግያዋ ግዶፐ፥ "ግደና" ጊተ።

13 ህንተ ግዶን ዋየትያ ኡራይ ኦንነ ደኦፐ፥ ጾሳ ዎሶ፤ ናሸትያ ኡራይ ኦንነ ደኦፐ፥ የጺደ ጋላቶ። 14 ህንተፐ ሳከትያ ኡራይ ኦንነ ደኦፐ፥ አማንያ አሳ ካለያ ጭማቱዋ ባረኮ ጼሶ፤ ኡንቱንቱ ጎዳ ሱንን ዛይትያ አ ኦኪደ፥ አዉ ጾሳ ዎስኖ። 15 አማኑዋን ጾሳ ዎሴዳ ዎሳይ ሀርጋንቻ ፓና፤ ጎዳይካ አ ሀርግያፐ ደንና፤ ቃይ ናጋራ እ ኦዳዋ ግዶፐካ ጎዳይ አዉ አቶ ጋና። 16 ሄዋ ድራዉ፥ ህንተ ፓጻና ማላ፥ ህንተ ናጋራ እቱ እቶ ፓጽተነ እቱ እቶ ጾሳ ዎስተ፤ ጽሎ አሳ ዎሳይ ዎልቃማ ኦሱዋ ኦ። 17 ኤላስ ኑ ማላ አሳ። እራይ ሳኣን ቡከናዳን፥ እ ምንሲደ፥ ጾሳ ዎስና ሄዙ ላይነ ኡሱፑን አገና ሳኣን እራይ ቡክቤና።✝ 18 ላኤንዋ ጾሳ እ ዎስና፥ ሳሉዋፐ እራይ ቡኬዳ፤ ሳአይካ ባረ ካ ሞኬዳ።✝

19 ታናዳን ጾሳ ካልያዋንቶ፥ ህንተፐ ኦንነ ቱሙዋፐ ዎራ ቦፐ፥ ቃይ እቱ አ ጉየ ሄ ቱሙዋኮ ዛሮፐ፥ 20 ናጋራንቻ አ ባላ ኦግያፐ ዛርያ ኦንነ አ ሸምፑዋ ሀይቁዋፐ አሻናዋነ ዳሮ ናጋራ ካማናዋ ኤሮ።✝