1 ሽን ኔን ደኡዋ ደማናዉ ጊግያ ትምርትያ ታማርሳናዉ በሴ። 2 ጭማ አቱማ አሳይ አማኑዋን፥ ሲቁዋንነ ዳንዳያን ምኖ ግዳናዳን፥ ቃይ ማተናዋ፥ ቦንቼትያዋነ ባረናካ ናግያዋ ግዳናዳን ዞራ። 3 ሄዋዳንካ ጭማ ማጫ አሳይ ጌሻ ደኡዋ ደእያዋንታ፥ ዝግረናዋንታ፥ ዎይንያ ኤሳዉ ሞደተናዋንታነ ሎኦባ ታማርስያዋንታ ግዳናዉ በሴ። 4,5 ኡንቱንቱ ጾሳ ቃላይ ቦረተና ማላ፥ ባረንቱ አስናቱዋነ ባረንቱ ናና ሲቅያዋንታ፥ ባረንታካ ናግያዋንታ፥ ጌሻቱዋ፥ ባረንቱ ጎለን ኦያዋንታ፥ ኬካቱዋነ ባረንቱ አስናቶካ አዛዘትያዋንታ ግዳና ማላ፥ ያላጋ ማጫዋንታ ታማርሳ።

6 ሄዋዳንካ ያላጋ አቱማ አሳቱ ባረንታ ናጋና ማላ ዞራ። 7 ኔን ነ ሁጰዉካ ሎኦ ኦሱዋ ኡባን ኡንቱንቶ ሌምሶ ግዳ፤ ኔን ታማርስያዋንካ አማነትያዋነ ቦንቼትያዋ ግዳ። 8 ነ ሞርከቱ ኑና ዝግርያባይ ኡንቱንቶ ይያ ዎደ ኡንቱንቱ ዬላታና ማላ፥ ኔን ቦረተና ሎኦ ሃሳያ ሃሳያ።

9 አይለቱ ባረንቱ ጎዳቶ አዛዘታና ማላነ፥ ኡንቱንቱና ፓሉመተናን ኡባባን ኡንቱንታ ናሸቻና ማላ ዞራ። 10 ኡንቱንቱ ባረንቱ ጎዳቱዋፐ ዉኤና ማላ፥ ቃይ ኑና አሽያ ጾሳዋ ታማርስያዋ ኡባባን ጋላትሳናዉ፥ ባረንቱ ኦያ ኪታን ኡባ ዎደ ሎአነ አማነትያዋንታ ግድያዋ በሳና ማላ፥ ኡንቱንታ ዞራ።

11 አያዉ ጎፐ፥ ጾሳይ አሳ ኡባ አሽያ ባረ አ ኬካተ ቆንጭሴዳ። 12 ሄ አ ኬካተይ ናጋራ ኦሱዋነ ሀ አላምያ አሙዋ ኑን አጋናዳንነ ኑ ሁጲያ ናጊደ፥ ጾሳ ማላቲደ፥ ጽሎተን ደአናዳን፥ ኑና ታማርሴ። 13 ኑን ኑ ዎልቃማ ጾሳይ፥ ኑና አሽያ የሱስ ክርስቶስ ቤታና ጌዳ አንጀቴዳ ቦንቾ ጋላሳ ናጌቶ። 14 ኢታ ኦሱዋ ኡባፐ እ ኑና ዎዛናዉነ ሎኦባ ኦናዉ አሞትያ ባረ ጌሻ አሳ ከሳናዉ፥ ኑ ድራዉ፥ ባረ ሁጲያ እሜዳ።✝

15 ኔን ሀዋ ታማርሳ፥ ነ ኩመን ማታን ዞራነ ሴራ፤ ኦንነ ኔና ካፖ።