1 Oduwaa 10

Kaatiyaa Saa’oola Hayk’k’uwaa

1 Piliss’s’eema asatuu Israa’eeliyaa asatuwaana oletteeddino. Israa’eeliyaa asatuu Piliss’s’eema asatuwaa sintsaappe bak’atteedino. Daro Israa’eelatuu Gilbboo’a Deriyan hayk’k’eeddino. 2 Piliss’s’eema asatuu Saa’oolanne Aa attuma naanaa yederssi gakkiide, Saa’oola naanaa Yoonataana, Abinaadaabanne Malkkishuu’a wod’eeddino. 3 Olay Saa’oola yuuyyi aad’d’iide un"etteedda; wonddaafiyaa asatuu Saa’oola demmeedda wode, zubbiyaan Aa c’addiide maduns’s’iseeddino.

4 Saa’ooli bare ola miishshaa tookkiyaawaa, «Ha k’as’s’arettibeenna Piliss’s’eematuu yiide, ta bolla kaa’ennaadan, ne mashshaan c’addaade, taana neeni wod’a» yaageedda.

Shin Aa ola miishshaa tookkiyaawe loytsi yayyeedda diraw is’s’eedda; Saa’ooli bare mashshaa sa’aan essiide, Aa bolla kunddeedda. 5 Aa ola shaluwaa tookkiyaawe Saa’ooli hayk’k’eeddawaa be’iide, ikka bare mashshaa sa’aan essiide, Aa bolla kunddiide, hayk’k’i aggeeda. 6 Hawaadan haniide, Saa’ooli, Aa naanay heezzuunne Aa soy Asay ubbay he gallassi ittippe hayk’k’eeddino. 7 Wombban de’iyaa Israa’eeliyaa asatuu ubbay barenttu olanchchatuu bak’ateeddawaanne Saa’oolinne Aa naanay hayk’k’eeddawaa siseedda wode, unttunttukka barenttu katamatuwaa aggiide bak’atteedino. Bak’atina Piliss’s’eema asatuu yiide, he katamatuwaan de’eeddino.

8 Wonttetsa gallassi Piliss’s’eematuu anhatuwaa bollaappe olaa miishshatuwaa k’aari akkanaw yiide, Saa’oolinne Aa naanay Gilbboo’a Deriyan hayk’k’iidde, giseeddawantta demmeeddino. 9 Unttunttu Saa’oola k’ood’iyaa muuc’eeddinonne Aa ola shaluwaa k’aari akkeeddino. Yaatiide barenttu Eek’atuwaa golleninne barenttu asaa gidduwaan s’oonuwaa awaayana mala, Piliss’s’eema biittaw ubbaw asaa kiitaa yedeeddino. 10 Unttunttu Saa’oola olaa miishshaa barenttu s’oossatuwaa golletuwaappe ittuwaan wotseeddino; Aa guuggiyaakka barenttu s’oossaa Daagoona Eek’aa Gollen kak’k’eeddino.

11 Piliss’s’eema asatuu Saa’oola ootseeddawaa ubbaa Gala’aaden de’iyaa Yaabeesha katamaa asatuu siseedda wode, 12 unttunttu mino asatuu ubbay biide, Saa’oola anhaanne Aa naanaa ahaa akkiide, Yaabeesha katamaa aheeddino. Yaabeeshan de’iyaa wolaa garssan unttunttu mek’etsaa moogeeddino; yaatiide laappun gallassaa s’oomeeddino.

13,14 Saa’ooli Med’inaa Godaw ammanettibeenna diraw hayk’k’eedda. Med’inaa Godaa k’aalaa I naagibeenna; Med’inaa Godaana zorettiyaawaa aggiide, moyttilliyaa s’eesiyaa asaana zoretteedda. Hewaa diraw, Med’inaa Goday Aa wod’iide, Aa kawutetsaa Isseya na’aa Daawitaw aatsiide immeedda.✝10:13 Wog. 19:31; 20:6; 1 Sam. 13:8-14; 15:1-24; 28:7-8