1 Oduwaa 13

K’aalaa C’aak’uwaa Taabootay Yerusaalam Buussaa Taabootaa K’iriyaati-Yi’aariimappe Dentseeddino

1 Hewaappe guyyiyaan, Daawite Suntsatuwaanna; shaalak’atuwaananne s’eetuwaa kaappatuwaanna zoretteedda. 2 Israa’eeliyaa asaa ubbaa, «Hinttenttoo lo"a malatiyaabaa giddooppene, Med’inaa Godaa nu S’oossaa shene gidooppe, Israa’eeliyaa biittaa gas’an de’iyaa nu dabbotuu, k’eesatuu nne barenttu kataman de’iyaa Leewatuu nuunanna ittippe shiik’anaadan asaa kiittoytte. 3 Saa’ooli kaateteedda wode sheneko giina, dogettiide atteeda nu S’oossaa Taabootaa ane zaariide ahooytte» yaageedda. 4 Daawite odeedda yewuu suure gideedda diraw, Asay ubbay mayyeedda.

5 Hewaa diraw, Daawite S’oossaa Taabootaa K’iriyaati-Yi’aariimappe ahana mala, Gibs’e zawaappe Shihoora shaafaappe doommiide, Hamaata Pinuwaa gakkanaw de’iyaa Israa’eeliyaa asaa ubbaa shiishsheedda.✝13:5 1 Sam. 7:1-2 6 Daawitenne Israa’eeliyaa Asay ubbay kiruubetuwaappe gidduwaan bare kawutetsaa araataa bolla utteedda S’oossaa suntsan s’eesetteedda S’oossaa Taabootaa ahanaw Yihudaa biittan de’iyaa Ba’aala geetettiyaa K’iriyaati-Yi’aariima katamaa beeddino.✝13:6 Kes. 25:22 7 S’oossaa Med’inaa Godaa Taabootaa boray goochchiyaa ooratsa gaariyan wotsiide, Abinaadaaba sooppe aheeddino; Uuzinne Ahiyoy gaariyaa laaggiino. 8 Daawitenne Israa’eeliyaa Asay ubbay diitsaanne maasink’k’uwaa diis’s’iidde, kabaruwaa bak’k’iidde, daalaa k’aatsiiddenne s’urumbbaa punniidde, barenttu kumentsaa wolk’k’an S’oossaa sintsan nashettiidde bonchcheeddino.

9 Unttunttu Kiidoona giyaa saan de’iyaa katsaa bukkiyaa udduma gakkiyaa wode, booratuu d’ubettina, Uuzi Taabootaa oyk’k’anaw bare kushiyaa yeddeedda. 10 Aa kushii Taabootaa bochcheedda diraw, Med’inaa Godaa hank’k’uu Uuza bolla ees’s’i kesseedda. Hewaa diraw, S’oossay Aa shoc’ina, I he sa’aan S’oossaa sintsan hayk’k’i aggeeda. 11 Med’inaa Goday hank’k’ettiide Uuza wod’eedda diraw, Daawite yiloteedda. Hachche gakkanaw, he sa’ay Peerez Uuzaa geetettiide s’eesetteedda. Uuzi Shoc’etto sa’aa geetettee.

12 He gallassi Daawite S’oossaw yayyeedda diraa, «S’oossaa Taabootaa taakko waata ahanaw danddayayitaa?» yaageedda. 13 Hewaa diraw, Taabootaa barenana Daawita Katamaa afibeenna. Shin Gaatiyaa Obeedi-Eedooma geetettiyaa bitaniyaa soo afeedda. 14 S’oossaa Taabootay Obeedi-Eedooma gollen Aa golliyaa asaana heezzu aginaa gam"eedda. Med’inaa Goday Aa golliyaa asaanne aw de’iyaa ubbabaa anjjeedda.✝13:14 1 Od. 26:4-5