2 Reis 4

Elssaa’i Itti Hiyyeesaa Am"atto Maaddeedda

1 Timbbitiyaa odiyaawanttuppe ittuwaa machchata Elssaa’akko baade, «Ne k’oomay ta asinay hayk’k’eedda. I Med’ina Godaw yayyiyaa asaa gidiyaawaa neeni eraasa. Shin ha"i Aa ac’oo ta naanaa laa"uwaa barew ayile kessanaw yeedda» yaagaadde aw waassaaddu.

2 Elssaa’i iziw, «Yaatina taani new ay ootsoo? Ne son ayay de’ii? Ane taw oda» yaageedda.

Mishirata, «Taw ne k’oomatiw itti otuwaan zayitii de’iyaawaappe attina, harabay ayaynne baawa» yaagaaddu.

3 Elssaa’i izo, «Ba; ne shoorotuwaa ubbaappe mela ototuwaa gars’s’a. Laafa gars’s’oppa. 4 Hewaappe guyyiyaan, soo gelaade, ne bollanne ne naanatuwaa bolla ifitsaa gordda. Ototuwaa ubbaan zayitiyaa tiga; zayitii kumeedda otuwaa otuwaa itti bagga zaara» yaageedda.

5 Mishirata baade, kariyaa bare bollanne bare naanatuwaa bolla gorddaaddu. Unttunttu iziw ototuwaa shiishshina, Aa zayitiyaa tigetsaa oyk’k’aaddu. 6 Otuwaa ubbay kumeedda wode, mishirata bare na’aa, «Ane taw hara otuwaa akkaade ya» yaagaaddu.

Shin na’ay zaariide, «Hari itti otuunne attibeena» yaageedda. Hewaappe guyyiyaan, zayitii goggiyaawaa aggi basheedda.

7 Mishirata simmaade baade, Elssaa’ew odaaddu. I, «Baade zayitiyaa zal"aadde, ne ac’uwaa c’igga. Atteedawaan neeninne ne naanaynne go’ettiide de’anaw danddayiita» yaageedda.