Zaaretsuwaa 25

1 «Laa"u asatuu walak’ettiide pirddaa golliyaa yooppe, daannatuu geeshsha ne likke giide, naak’k’eeddawaa ne bayzzanchcha giide pirddino. 2 Bayzzanchchay wad’uu bessiyaawaa gidooppe, tiraan gisisiide zokkiyaa shoc’anaw daannay azazo; yaatooppe bayzzanchchay daannaa sintsan bare bayzzuwaa keenaa shoc’etto. 3 I oytamuwaa gakkanaw shoc’ettoppe attina, hewaappe daruwaa shoc’ettoppo. Hewaappe daruwaa Aa shoc’ooppe, ne ishay ne sintsan kawushshana.✝25:3 2 K’or. 11:24

4 «Uddumaan katsaa yed’d’iyaa booraa doonaa k’achchoppa.✝25:4 1 K’or. 9:9; 1 S’im. 5:18

Hayk’k’eedda Ishaw Ootsanaw Bessiyaabatuwaa

5 «Ittippe de’iyaa ishatuwaappe ittuu na’aa yelennaan hayk’k’ooppe, Aa machchatta haraa baade geluppu; izi asinaa ishay izo akko; iziw koshshiyaawaa polo.✝25:5-6 Mat. 22:24; Mar. 12:19; Luk'. 20:28 6 Yaatooppe ha hayk’k’eeddawaa suntsay Israa’eeliyaappe pitetti d’ayennaadan, Aa koyiro yeliyaa attuma na’ay ha hayk’k’eeddawaa suntsan s’eegetto.

7 «Gido shin, I bare ishaa machchato akkanaw koyana d’ayooppe, iza katamaa penggiyaan utteedda c’imatuwaakko baade, ‹Ta asinaa ishay bare ishaa suntsay Israa’eeliyaan de’anaw koyibeenna; taana akkiide, taw koshshiyaawaa kuntsennan is’s’eedda› yaagaade magannu.✝25:7-10 Uru. 4:7-8 8 Katamaa c’imatuu Aa s’eegiide oochchino; ha"ikka, ‹Taani izo akkikke› giide is’s’ooppe, 9 he hayk’k’eeddawaa machchato c’imatuwaa sintsan aakko shiik’aade, Aa gediyaa c’aammaappe ittuwaa kessaade, Aa som"uwaan c’uchchaa c’uchchaade hawaadan yaagu; ‹Bare ishaw zeretsay de’anaw koyenna asaa bolla, hawaa mala kawushshay gakkanaw bessee› yaagu. 10 Aa zarii Israa’eeliyaan, ‹C’aammaa Keseeddawanttu soyaa› geetetti s’eegettiide de’ana.

Hara Higgetuwaa

11 «Laa"u asatuu wad’ettishin, ittuwaa machchata yaade, bare asinaa shoc’iyaawaa kushiyaappe ashshanaw, bare kushiyaa yeddaade hinkkuwaa attumatetsaa oyk’k’ooppe, 12 iziw ayinne k’arettennaan I kushiyaa k’ans’s’ite.

13 «Ne keeshshaa giddon dees’onne kawushsha gideedda laa"u miizaanatuu de’oppino.✝25:13-16 Wog. 19:35-36 14 Ne soon darissiidenne guutsiide likkiyaa laa"u makkiyaabay de’oppo. 15 Med’inaa Goday ne S’oossay new immiyaa gadiyaan adussa laytsaa ne de’anaadan kumentsanne likke miizaanaynne makkiyaabay new de’o. 16 Ayaw gooppe, Med’inaa Goday ne S’oossay hewaa malabaa ootsiide, baletsiyaa asaa ubbaa shaattee.

Amaaleek’atuwaa Wod’anaw Imetteedda Azazuwaa

17 «Hintte Gibs’eppe kesiide biide de’ishshin, Amaaleek’atuu hintte bolla ootseeddawaa hassayite.✝25:17-19 Kes. 17:8-14; 1 Sam. 15:2-9 18 Unttunttu S’oossaw yayyena asaa; hintte ogiyaan hinttenana ek’etteeddino. Hintte hemettishin, daaburiide guyye atteeda asaa ubbaa wod’eeddino. 19 Hewaa diraw, Med’inaa Goday hintte S’oossay hinttena he biittaa laatissiide, hintte yuushshuwaan de’iyaa morkkatuwaa ubbaappe hinttena shemppissiyaa wode, ha gadiyaan unttuntta hassayiyaa Asay d’ayana gakkanaw, Amaaleek’atuwaa ubbaa saluwaa gufantsaappe d’ayissite; hewaa ootsanawaa mulekka dogoppite.