Zaaretsuwaa 27

Shuchchatuwaa Bolla S’aafetteedda Higgetuwaa

1 Hewaappe guyyiyaan, Muse Israa’eeliyaa c’imatuwaanna gidiide, asaa hawaadan yaageedda; «Taani hachchi hinttena azaziyaa azazuwaa naagite. 2 Yorddaanoosa Shaafaa pinniide, Med’inaa Goday hintte S’oossay hinttenttoo immiyaa biittaa geliyaa wode, wolk’k’aama shuchchatuwaa essiide, booshunchchaan okkite.✝27:2-8 Iya. 8:30-32 3 Med’inaa Goday hintte aawotuwaa S’oossay hinttenttoo immana geeddawaadan, eessaynne maatsay goggiyaa biittaa, Med’inaa Goday hintte S’oossay hinttenttoo immiyaa biittaa hintte pinniyaa wode, ha higgiyaa k’aalatuwaa ubbaa he shuchchatuu bolla s’aafite. 4 Hintte Yorddaanoosa pinneedda wode, taani hinttena hachchi azazeeddawaadan, ha shuchchatuwaa Eebaala Deriyaa bollan essiide, unttuntta booshunchchaan okkite. 5 He sa’aan Med’inaa Godaw, hintte S’oossaw, birataa miishshay bochchibeenna shuchchaappe yarshshiyaa sa’aa ootsite.✝27:5-6 Kes. 20:25 6 He hintte Med’inaa Godaw, hintte S’oossaw, yarshshiyaa sa’aa masettibeenna shuchchaappe ootsite; yaatiide hewaa bollan Med’inaa Godaw, hintte S’oossaw, s’uuggiyaa yarshshuwaa shiishshite. 7 Ittippetetsaa yarshshuwaakka, hewan miidde, Med’inaa Godaa hintte S’oossaa sintsan nashetite. 8 Ha higgiyaa k’aalatuwaa ubbaa k’onc’c’iyaan beettiyaawaadan ootsiide, ha hintte esseedda shuchchatuu bolla s’aafite» yaageedda.

9 Muse k’aykka Leewiyaa gidiyaa k’eesetuwaana ittippe gidiide, Israa’eeliyaa asaa ubbaw hawaadan yaageedda; «Hinttenoo Israa’eeliyaa asaw, c’o"u giide sisite! Hekko hachchi hintte Med’inaa Godaa hintte S’oossaa asaa gideeddita. 10 Hewaa diraw, hachchi taani hinttenttoo immiyaa azazuwaanne awaayuwaa naagiyaawaan, Med’inaa Godaa hintte S’oossaa k’aalaw azazettite» yaageedda.

Azazettenan Is’s’iyaawe Ahiyaa Shek’aa

11 He gallassikka Muse asaa hawaadan yaagiide azazeedda; 12 «Hintte Yorddaanoosa pinneedda wode, Gariizaama Deriyaa bolla ek’k’iide asaa anjjanawantta: Simoona, Leewiyaa, Yihudaa, Yisaakoora, Yooseefonne Biiniyaama zaratuwaa.✝27:12 Zar. 11:29; Iya. 8:33-35 13 K’ay asaa shek’k’anaw Eebaala Deriyaa bolla ek’k’anawanttu: Roobeela, Gaada, Aaseera, Zaabiloona, Daananne Nifttaaleema zaratuwaa. 14 Leewatuu barenttu k’aalaa d’ok’k’u ootsiide, Israa’eeliyaa asaw hawaadan yaagino.

15 « ‹Med’inaa Godaa sintsan tuna gideeddawaa, kushiyaa hiillanchchay massiide Kesseedda mitsaa gidina, woy birataa tigiide med’d’eedda eek’aa gidina, aw geeman goyinniyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:15 Kes. 20:4; 34:17; Wog. 19:4; 26:1; Zar. 4:15-18; 5:8

16 « ‹Bare aawuwaa woy bare daayo kawushshiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:16 Kes. 20:12; Zar. 5:16

17 « ‹Bare shooruwaa zawaa sugiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:17 Zar. 19:14

18 « ‹K’ook’ay baanaw bessiyaa ogiyaappe balasaa zaariyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:18 Wog. 19:14

19 « ‹Betiyaa, aata aawuu bayinna naanatuwaa pirddaanne am"atti pirddaa gellayeedda Asay shek’etteeddawaa gido› yaagina, Asay ubbay, ‹Amen"i› yaago.✝27:19 Kes. 22:21; 23:9; Wog. 19:33-34; Zar. 24:17-18

20 « ‹Bare aawuwaa machchattinna gisiide, bare aawuwaa bonchchuwaa kawushshiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:20 Wog. 18:8; 20:11; Zar. 22:30

21 « ‹Ay mehiyaannakka gisiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:21 Kes. 22:19; Wog. 18:23; 20:15

22 « ‹Bare michchato gidiyaa, aawuwaa naattinna gidina, bare daay naattinna gisiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:22 Wog. 18:9; 20:17

23 « ‹Bare bollotattina gisiyaa Asay shek’etteeddawaa gido› yaagina, Asay ubbay, ‹Amen"i!› yaago.✝27:23 Wog. 18:17; 20:14

24 « ‹Bare shooruwaa geeman wod’iyaa Asay shek’etteeddawaa gido› yaagina, Asay ubbay, ‹Amen"i!› yaago.

25 « ‹Shaluwaan shamettiide, s’illo asaa wod’iyaa Asay shek’etteeddawaa gido› yaagina, Asay ubbay, ‹Amen"i!› yaago.

26 « ‹Ha higgiyaa k’aalatuwaa poliide minisena Asay shek’etteeddawaa gido› yaagina,✝27:26 Gal. 3:10

«Asay ubbay ‹Amen"i!› » yaago.