Kessaa 28

K’eesatuwaa Kaappatuwaa Mayuwaa

1 «Ne ishaa Aaroonanne Aa naanaa Nadaaba, Abiiha, El"aazaaranne Itaamaara neekko ahaade; unttunttu k’eesatuwaa gidiide taw ootsana mala, Israa’eeliyaa asaa giddoppe unttuntta dummaya. 2 Aw bonchchuwaanne puulaa immana mala, ne ishaa Aaroonaw k’eesatetsaa mayotuwaa giigissa. 3 Taani aad’d’eeda era immeedda kushiyaa hiilaa eriyaa asaa ubbaa s’eesaade, Aaroonaw mayotuwaa giigissana mala oda; I k’eesee gidiide, taw ootsanaw dummatanawaa. 4 Unttunttu giigissana mayotuukka hawantta: tiraan wotsiyaawaa, eefuudiyaa, adussa mayuwaa, alleek’k’ettiide dadetteedda adussa shaamic’c’iyaa, shaashiyaanne hara danc’c’uwaa. Ne ishay Aaroonenne Aa naanay k’eesatuwaa gidiide taw ootsiide geeshsha mayotuwaa mayyana mala, sikkiyaawanttu giigissiino. 5 Kushiyaa hiilaa eriyaawanttukka ha mayotuwaa giigissanaw work’k’aa, saluwaa malatiyaa, ochchaa teeraa malatiyaanne shololla zo’o k’ac’inaanne liik’o liinuwaa go’ettino.

Eefuudiyaa

6 «Eefuudiyaa geetettiyaa mayuwaa work’k’aappe, saluwaa malatiyaa k’ac’inaappe, ochchaa teeraa malatiyaa k’ac’inaappe, shololla zo’o k’ac’inaappenne liik’o liinuwaa k’ac’inaappe kushiyaa hiillanchchatuu alleek’k’issiide giigissiino. 7 Laa"u baggay gakettiide ittuwaa gidana mala, laa"u hashiyaa bolla gatsiide oytsiyaa c’ark’k’ii de’o. 8 Hiilanchchay aleek’k’issiide daddeedda danc’c’uukka eefuudiyaanna itta gidiide, work’k’aappe, saluwaa malatiyaa, ochchaa teeraa malatiyaanne shololla zo’o k’ac’inaappenne lee’issi bak’k’eedda liinuwaappe oosetto.

9 «Marggidiyaa geetettiyaa laa"u shuchchatuwaa ahaade, Israa’eeliyaa naanatuwaa suntsaa unttunttu bolla wooc’aade s’aafa. 10 Unttunttu yeletaa maaraadan itti shuchchaa bolla usuppun suntsaa, hinkko shuchchaa bolla k’ay atteeda usuppunatuwaa suntsaa wooc’aade s’aafa. 11 Maatafaa bolla suntsaa wooc’iide s’aafiyaawaadan, he laa"u shuchchatuwaa bolla Israa’eeliyaa naanatuwaa suntsaa wooc’aade s’aafa; he shuchchatuwaa work’k’aappe med’d’eedda shuchchaa oyk’k’iyaawaa bolla wotsa. 12 Yaataade tammanne laa"u Israa’eeliyaa zeretsaa hassayiyaawaa gidana mala, ha laa"u shuchchatuwaa eefuudiyaanna oytseedda hashiyaa c’ark’k’iyaan wotsa; yaatooppe Med’inaa Godaa sintsan ubbaade k’ofettana mala, ha suntsatuwaa Aaroone bare hashiyaan tookko. 13 He shuchchatuwaa oyk’k’iyaawaa work’k’aappe med’d’a. 14 K’ay walakay baynna work’k’aappe wodoruwaadan dook’k’eedda laa"u sanssalatatuwaa giigissaade, he laa"u shuchchaa oyk’k’iyaawanttunna gatsa oytsa.

Tiraan Wotsiyaawaa

15 «S’oossaa shenii ayentto oochchiide eriyaa tiraan wotsiyaawaa kushiyaa hiilanchchaan oosissa. He tiraan wotsiyaawaa eefuudiyaa daddeeddawaadan, work’k’aappe, saluwaa malatiyaa, ochchaa teeraa malatiyaanne shololla zo’o k’ac’inaappenne liik’o liinuwaappe dadda. 16 Aw oyddu gas’ay de’ee; geesaykka gomppay itti itti takkaad’e gidiide dakkotto. 17 Hewaappe guyyiyaan Aa bolla oyddu maaran al"o shuchchatuwaa wotsa; koyro maaran wotseedda shuchchay, sarddiyoona, toop’aaziyooniyaanne p’ooliyaa ink’k’uwaa. 18 Laa"entso maaran baluuriyaa, samppeeriyaanne almmaaziyaa giyaa al"o shuchchatuwaa; 19 heezzentso maaran yaakinttiyaa, kelk’k’edooniyaanne ametess’s’inoosiyaa; 20 oyddentso maaran biralli, marggidiyaa, yasp’p’iidiyaa. Hawanttu ubbay work’k’aappe oosetteedda shuchchaa oyk’k’iyaawaa bolla uttino. 21 Israa’eeliyaa naanatuwaa suntsaa payduwaadan, shuchchatuwaa payduukka tammanne laa"uwaa gidino; ittuu ittuu maatafaadan wooc’ettiide, tammanne laa"u zaratuwaa suntsay he shuchchatuwaan s’aafetto.

22 «Tiraan wotsiyaawoo wodoruwaadan dook’eteedda sanssalataa walakay baynna work’k’aappe med’d’a. 23 Laa"u work’k’aa migidatuwaa med’d’aade, tiraan wotsiyaawoo k’ommo gas’aa gatsaade oytsa wotsa. 24 He laa"u work’k’aa sanssalatatuwaa tiraan wotsiyaawoo gas’an de’iyaa migidotuwaanna gatsaade oytsa. 25 He sanssalatatoo yenkko bagga s’eeraa k’ay eefuudiyaw sintsa baggana, hashiyaa c’ark’k’iyaan de’iyaa shuchchaa oyk’k’iyaawanttunna gatsa k’achcha. 26 K’aykka laa"u work’k’aa migidatuwaa med’d’aade, eefuudiyaappe garssan kaalliide de’iyaa tiraan wotsiyaawoo soo baggana de’iyaa laa"u gas’aa s’eeran aatsa. 27 Hewaadankka, work’k’aappe hara laa"u migidatuwaa med’d’aade; eefuudiyaw sintsa baggana, hashiyaa c’ark’k’iyaappe garssa baggana, eefuudiyaa s’eessan k’achchiyaawaappe k’ommonna, sikuu gaketeedda sa’aa matan karenna unttuntta oytsa. 28 Tiraan wotsiyaawaan de’iyaa migidatuwaa eefuudiyaan de’iyaa migidotuwaanna gatsiide, saluwaa malatiyaa bak’etsaan k’achcha; yaatooppe, tiraan wotsiyaawe s’eessaappe k’ommonna de’iyaa diraw, k’ashuu shol"enna.

29 «Aaroone Geeshsha sa’aa geliyaa wode, ha tiraan wotsiyaa Med’inaa Godaa sheniyaa bessiyaawe de’iyaa Israa’eeliyaa zaratuwaa suntsatuwaa tookko. Yaatooppe taani Med’inaa Goday ubbaade ta asaa hassayana. 30 K’ay Uuriimiyaanne Tuumiimiyaa geetettiyaawantta tiraan wotsiyaawaan yegga. Aaroone Med’inaa Godaa sintsa aad’d’iidde, bare tiraan wotsi akkiide gelo. Ta shenii ayentto Israa’eeliyaa asaa erissana mala, I ta sintsan ootsanaw geliyaa wode ubbaan bare tiraa kiisiyaappe d’ayssoppo.✝28:30 Pay. 27:21; Zar. 33:8; Izr. 2:63; Nah. 7:65

Hara K’eesatuwaa Kaappuwaa Mayuwaanne K’eesatuwaa Mayuwaa

31 «Eefuudiyaappe garssanna mayiyaa adussa mayuwaa ubbaa saluwaa malatiyaa c’ark’k’iyaappe giigissa. 32 He adussa mayoo k’ood’iyaa aatsiyaa sa’aa med’d’a. He sa’ay peed’ettenaadan, yuushsha aatsaade gujja gujja sikka. 33 Adussa mayuwaa duge bagga mac’araa yuushshuwaan saluwaa malatiyaa, ochchaa teeraa malatiyaanne shololla zo’o roomaaniyaa ayfiyaa teeraa misiletuwaa med’d’a. Yaataade unttunttu gidduwaan work’k’aappe oosetteedda dawalatuwaa walakan ootsa. 34 Work’k’aa dawalatuunne roomaaniyaa teeraa misiletuu he adussa mayuwaa duge bagga s’eeraw yuushshuwaan walakan aad’d’ino. 35 Aaroone k’eesatetsan ootsiyaa wode, ha adussa mayuwaa mayyo; Med’inaa Godaa sintsa Geeshsha sa’aa geliyaa wodenne kesiyaa wode, dawalay waassana. Hewaa diraw I hayk’k’enna.

36 «Walakay baynna work’k’aappe itti alleek’k’uwaa med’d’aade maatafaa bolla wooc’iyaawaadan, Aa bolla wooc’aade, ‹Med’inaa Godaw Geeshsha gidiide Dummateedda› yaagaadde s’aafa. 37 Huup’iyaan s’aas’iyaa shaashiyaappe s’adenna deemuwaan k’achchana mala, saluwaa malatiyaa bak’etsaa an aatsa. 38 Aaroone Aa bare deemuwaan wotso; hewaan Israa’eeliyaa Asay Med’inaa Godaw geeshsha yarshshoo immiyaawan pac’ay de’ooppe, he bayzzuwaa Aaroone tookkee. Asay ahiyaawaa ubbaa Med’inaa Goday akkana mala, I hewaa ubbaa gedekka bare demuwaan wotsanaw koshshee.

39 «Aaroona adussa Shaamic’c’iyaa liik’o liinuwaappe dadda; huup’iyaan s’aas’iyaa shaashiyaakka liinuwaappe giigissa. K’ay danc’c’uwaa s’ilppiyaan alleek’k’issiyaawaan sikissa. 40 Aaroona naanaw bonchchonne alleek’k’o gidana mala, adussa shaamic’c’iyaa, danc’c’otuwaanne huup’iyaan s’aas’iyaa shaashetuwaa giigissa. 41 Neeni ha mayotuwaa ne ishaa Aaroonanne Aa naanaa mayzzeeddawaappe guyyiyaan, unttuntta k’eesetetsan suntsaade taw ootsana mala okkaadde dummaya.

42 «Unttunttu kalluu kametana mala garssanna mayiyaa mayuwaa, s’eessaappe biide wodiriyaa gakkanaw kammiyaawaa, liik’o liinuwaa k’ac’inaappe daddaade giigissa. 43 Aaroonenne Aa naanay S’oossaa Dunkkaaniyaa geliyaa wode, woy yarshshuwaa yarshshiyaa geeshsha sa’aan k’eesatetsan ootsanaw shiik’iyaa wode, ha mayotuwaa mayno. Hewaadan hanooppe, unttunttu barenttu bolla bayzzuwaanne hayk’k’uwaa ahikkino.

«Hawe Aaroonawunne Aa zaretoo med’inaw woga gido.