Kessaa 9

Mehiyaa Bolla Boshay Wod’d’eedda

1 Med’inaa Goday Musa hawaadan yaageedda; «Gibs’e kaatiyaakko baade, ‹Med’inaa Goday, Ibraawetuwaa S’oossay neena, «Unttunttu taw goynnana mala ta asaa yedda» yaagee. 2 Neeni yeddennan is’s’aade, unttuntta oyk’k’a uttiyaawaa gidooppe, 3 Med’inaa Godaa kushii deriyaan de’iyaa ne mehiyaa bolla, paratuwaa bolla, haretuwaa bolla, gaalotuwaa bolla, miyaa bolla, dorssatuwaa bollanne deeshshatuwaa bolla wolk’k’aama iita harggiyaa yeddana. 4 Shin Taani Med’inaa Goday Israa’eeliyaa mehiyaa gidduwaaninne Gibs’etuwaa mehiyaa gidduwaan shaakotaa med’d’ana. Israa’eelatuu mehiyaappe ittuunne hayk’k’enna› yaaga» yaageedda. 5 Med’inaa Goday wodiyaa keeriide, «Taani wontti hawaa ha gadiyaa bollan ootsana» yaageedda. 6 Wonttetsa gallassi Med’inaa Goday hewaa ootseedda. Gibs’e asaa mehiyaa ubbay hayk’k’eedda; shin Israa’eeliyaa asaa mehiyaappe ittuunne hayk’k’ibeenna. 7 Kaatii ha yewuwaa paac’c’anaw asaa kiittiide, Israa’eeletuwaa mehiyaappe, haray atto, ittuunne hayk’k’ibeennawaa ereedda. Gidooppenne kaatiyaa wozanay donc’c’ilo sa’aappe simmenaan is’s’ina, asaa yeddennan diggeedda.

S’iibbaa

8 Meed’inaa Goday hewaappe guyyiyaan, Musanne Aaroona, «Hinttenttu kushiyaa kuntsiidde c’ooc’iyaappe bidintsaa uuc’c’ite; Muse kaatii s’eellishin, hewaa pude c’arkkoo laalo; 9 hewe Gibs’e biittaa ubbaa bolla liik’o baana gidanawaa; Gibs’e biittaa ubbaan asaa bollanne mehiyaa bolla giiyyiyaa s’iibbay wod’d’anawaa» yaageedda. 10 Unttunttu c’ooc’iyaappe bidintsaa akkiide, kaatiyaa sintsan ek’k’eeddinno; Muse hewaa pude c’arkkuwaan laalina, asaa bollanne mehiyaa bolla giiyiyaa s’iibbay wod’d’i aggeeda.✝9:10 Sas'. 16:2 11 Shareechchatuukka unttunttu bollanne Gibs’e asaa ubbaa bolla wod’d’eedda s’iibbay essuwaa diggina, Muse sintsan ek’k’anaw danddayibeykkino. 12 Shin Med’inaa Goday Musew geeddawaadankka, kaatiyaa wozana donc’c’iliseedda diraw, Musenne Aaroone odiyaawaa kaatii sisennan is’s’eedda.

Shachchaa

13 Hewaappe guyyiyaan Med’inaa Goday Musa, «Guuran dendda baade, kaatiyaanna gakettaade Aa, ‹Med’inaa Goday, Ibraawetuwaa S’oossay neena, «Taw goynnana mala ta asaa yedda. 14 Hewe d’ayooppe, ne bolla, ne oosanchchatuwaa bollanne ne asaa bolla ta boshaw de’iyaa kumentsaa wolk’k’aa taani kiittana; sa’aan ubbaan ta mali baynnawaa neeni hewaan eranaassa. 15 Taani hannoode ta kushiyaa yeddaade, neenanne ne asaa iita harggiyaan ha sa’aa bollappe mils’s’i udanashin. 16 Taani neena ta wolk’k’aa bessanawunne ta suntsay sa’aa ubbaa bollan odettanaw, hewoo taani neena kaate ootsaade wotsaad.✝9:16 Rom. 9:17 17 Neeni ha"ikka otorettaade, ta asaa yeddennan is’s’aadda. 18 Hewaa diraw, taani wontti hannoode Gibs’e Gibs’e gidoodeppe hachche gakkanaw ubbakka wod’d’i erenna, darii wolk’k’aama shachchaa bukissana. 19 Ha"i neeni ne mehiyaanne gaden new de’iyaawaa ubbaa ellekka soo gelissanaadan azaza; ayaw gooppe, soy gelenaan biro gaden de’iyaa asaa ubbaa bollanne mehiyaa ubbaa bolla shachchay wod’d’anawaa; Unttuttu hayk’k’ana» yaagee› yaaga» yaageedda. 20 Kaatiyaa oosanchchatuwaappe Med’inaa Godaa k’aalaw yayyeeddawanttu barenttu ayiletuwaanne barenttu mehiyaa elleelliidde soy geliseeddino. 21 Shin Med’inaa Godaa k’aalaa kad’eeddawanttu barenttu ayiletuwaanne barenttu mehiyaa gaden aggi basheeddino.

22 Hewaappe guyyiyaan Med’inaa Goday Musa, «Gibs’e biittaa ubbaa bollan: asaa bolla, mehiyaa bollanne Gibs’e goshshatuwaan dic’c’iyaabaa ubbaa bolla shachchay wod’d’anaadan, ne kushiyaa saluwaa dentsa» yaageedda. 23 Muse bare gatimaa saluwaa zaariide dentseedda wode, S’oossay guguntsaanne shachchaa yeddeedda; walk’k’antsaykka duge sa’aw walk’k’ammeedda. S’oossay Gibs’e gadiyaan shachchaa yaati bukisseedda. 24 Shachchay wod’d’eedda; walk’k’antsay yaanne haanne walk’k’ammeedda; Gibs’e gadiyaan kaatii kaatetoodeppe doommina, Gibs’e biittaa ubbaan wod’d’eedda shachchaa ubbaappe hewe aad’d’iyaa iita shachchaa.✝9:24 Sas'. 8:7; 16:21 25 He shachchay Gibs’e biittaa ubbaa gaden de’iyaa ubbabaa, asaakka mehiyaakka shoc’eedda; gaden doleeddabaa ubbaa duge zaariide bidoyeedda; mitsaa ubbaa mentsereetseedda. 26 Shachchay wod’d’ibeenna gadii Israa’eelatuu utteedda Goshena gadiyaa s’alala.

27 Kaatii kiitti Musanne Aaroona s’eesissiide, «Ha"i simmi, taani nagaraa ootsaad; Med’inaa Goday tumanchchaa; taaninne ta Asay bayzzanchcha. 28 Nuw guuguntsaynne shachchay dareedda diraw, Med’inaa Godaa woossite. Taani hinttentta yeddana; simmi hawaappe sintsan hinttenttu hawaan gam"ikkita» yaageedda. 29 Muse Aa, «Taani ha katamaappe keseedda wode, taani woossanaw ta kushiyaa Med’inaa Godaakko mic’c’ana; yaatooppe guuguntsay agganawaa; k’ay shachchaa wod’etsay ek’k’ana; sa’ay Med’inaa Godaawaa gidiyaawaa neeni hewaan erana. 30 Shin neeninne ne oosanchchatuu Med’inaa Godaw S’oossaw ha"ikka yayyenawaa taani eray» yaageedda. 31 Talbbay c’iisheedda dirawunne banggay tisheedda diraw, talbbaynne banggay shachchan bayeeddino. 32 Shin zarggaynne k’ambbaray ka"iyaa wodii bira gideedda diraw, shachchan bayibeykkino.

33 Hewaappe guyyiyaan Muse kaatiyaa mataappe denddiide, katamaappe gas’aa kesseedda. Bare kushiyaa Med’inaa Godaakko mic’c’eedda; yaatina guguntsaynne shachchay aggeedda; iraykka biittaa bollan duge tigettiyaawe ek’k’eedda. 34 Shin kaatii iray, shachchaynne guguntsay aggeedawaa be’eedda wode zaariiddekka nagaraa ootseedda; ikka Aa oosanchchatuukka barenttu wozanaa donc’c’ilisseeddino. 35 Med’inaa Goday Muse doonaan haasayeeddawaadankka kaatiyaa wozanay donc’c’ilina, Israa’eelatuwaa I yeddennan is’s’eedda.