Iyyooba 17

1 «Ta shemppatta kesaw; ta laytsay k’aammeedda; taw duufuu giigi utteedda. 2 Taana k’iliic’iyaawanttu tumuwaappe ta yuushshuwaan de’iino; unttunttu taw hank’k’etiyaa hank’k’uwaa ubbaa gede taani be’ay.

3 «Abeet S’oossaw, neeppe haray taana maaddiyaawe bayinna diraw, neeni ne huup’iyaan taw waase gida. 4 Unttunttoo gelennaadan, neeni ta laggetsatuwaa wozanaa donc’c’ilisaadda. Hewaa diraw, neeni unttunttoo s’oonuwaa immoppa. 5 Miishshaa demmana giide, bare laggetuwaa aatsi immiyaa asaa nagaray Aa naanatuwaa kaa’ana.

6 «S’oossay taana asaa ubbaw k’iliic’iyaawaa kesseedda; Asay som"uwaan c’uchchiyaa asaa taani gidaaddi. 7 Taani daro kayyotteedda diraw, ta ayifiikka galjjeedda; ta kumentsaa asatetsay laafiidde, s’ink’k’uwaa keeshshaa gideeddino. 8 Keeka asatuu taana be’iide dagammeeddino; suuretuukka S’oossaa kaddiyaawanttu bolla yiloteeddino. 9 Gidooppenne, s’illotuu barenttu ogiyaappe yaakka haakka simmikkino; suuretuu wolk’k’aa gujji gujji biino. 10 Shin ha"i ubbaykka ane taakko haa yiite! Yinttokka, taani hintte giddon itti aad’d’eeda eranchcha asaakka demmikke.

11 «Ta de’uwaa laytsay wureedda; ta halchcheedda halchchuukka ta wozanaa amuukka c’oo atteedda. 12 Ta laggetuu k’ammaa gallassaa giino; d’umi utti de’ishshin, ‹Poo’ana hanee› yaagiino. 13 Taani hidootaan naagiyaa ta gollii duufuwaa; ta hiis’aakka yaan d’uman hiis’s’ana. 14 Duufuwaa taani, ‹Neeni ta aawuwaa› yaagana; gus’uniyaakka, ‹Neeni ta aato› woy ‹Ta michchato› yaagana. 15 Yaatina, ta hidootay hak’anee? Ooni Aa be’eeddee? 16 Ta hidootay taananna duufuwaa banddee? Nuuni laa"uu ittippe biittan duge wod’d’aneeshsha?» yaageedda.