Iyyooba 39

1 «Deriyan de’iyaa gen"etuu awude yeliinontto, neeni eray? Gaaratuu bannikkiide, barenttu maratuwaa yeliyaa wode be’aaddi? 2 Unttunttu kuntsiidde, woyissa keeshshaa aginaa gam"iinonttonne k’ay awude yeliinontto eray? 3 Unttunttu gulbbatiide, barenttu maratuwaa yeliyaawe awudentto eray? 4 Unttunttu maratuu bazzuwaan dic’c’iide minniino; barenttu aayetuwaa mataappe biino; laa"entso guyye simmikkino.

5 «Dembbaa haretuu yeda de’anaadan ootseeddawe oonee? K’ashuwaappe unttuntta billi yeddeeddawe oonee? 6 Unttunttoo taani bazzuwaa de’iyaasaa ootsaade immaad; Asay baynna ladda biittaa unttunttu de’anaadan ootsaad. 7 Katamaa c’abbuwaappe unttunttu haakkiide de’iino; laaggiyaawanttu waasuwaakka sissikkino. 8 Unttunttu deretuwaa barenttoo heemettiyaa sa’aa ootsiino; hewan miyaa mul"o maataa k’oriino.

9 «Mentsay new ootsanaw eeno ganddee? Woy ne gaas’aatan k’ammaa ak’anddee? 10 Goshana mala, neeni Aa waas’ay? Woy ginddaa goochchanaadan Aa ootsanaw danddayay? 11 Neeni Aa wolk’k’aa minotetsan ammanettay? Ne daaburssiyaa oosuwaa I ootsanaadan, aw yegga aggay? 12 I simmiide yiide, ne katsaa k’os’s’iyaa ne uddumaw shiishshee gaade neeni an ammanettay?

13 «Sogonata bare k’efiyaa ellekka k’aatsaw; shin sogonati k’efetuu sanggaanuwaa k’efetuwaanne baalletuwaa mala gidikkino. 14 Sogonata bare k’uuk’ulliyaa biittan k’uuk’ullaw; baanay ho’etsanaadan aggaw. 15 Gedii mentsana woy, ‹Bazzuwaa do’atuu yed’d’ana› gaade k’oppukku. 16 Maratuu barewaa gidennawaadan paydaadde, unttunttoo mek’etsaa iitaw. I daaburay ubbay mela attiyaawe iw ayaanne malatenna. 17 Ayaw gooppe, taani S’oossay izo aad’d’eeda eratetsaa diggaad; taani akeekaakka iw immabeykke. 18 Shin denddaade iza wos’s’iyaa wode, barenanna naasettiyaa paraa bollanne paraw bolla miic’c’aw.

19 «Iyyoobaa, paratoo wolk’k’aa immeeddawe, woy paratuwaa morggiyaa gotosho gammaa mayzzeeddawe neenee? 20 Paratuu booliyaadan guppanaadaaninne yashshiyaa daaretsaa unttunttu daaranaadan ootseeddawe neenee? 21 Paratuu zanggaaraan biittaa booddiino; barenttu wolk’k’ankka nashettiino; yaatiide olaa miishshatuwaa danc’c’eeddawanttuna gakketanaw olaa dembbaa piriis’iino. 22 Yashshaa giyaawaa unttunttu mulekka erikkino; unttuntta ayaynne dagantsenna; unttunttu bolla mashshaa zaaretsooppenne guyye simmikkino. 23 Unttunttu toggiyaa olanchchatuu oyk’k’eedda olaa miishshatuu p’ooliidde, ittuu ittuwaanna gakketiide giirettiino. 24 Paratuu paachchuriidde yashissiidde, olaw sintsaw piriis’iino. Malakataa punusaa kooshshaa sisiyaa wode, c’o"u giide ek’k’anaw danddaykkino; 25 malakataa punniyaa wode, ‹Hayyashsho!› yaagiino. Olaa peenuwaa haakuwaan akkiino; olaa gadaawatuu azaziyaa azazuwaanne olanchchatuwaa c’eek’uwaa sisiino.

26 «Gac’ii bare k’efiyaa gedissa mic’c’iide paallanaw danddayanaadan, aad’d’eeda eratetsaa aw immeeddawe neenee? 27 Arggantsay pude kesiide, bare golliyaa d’ok’k’a deretuwaan kees’s’anaw ne azazuwaa naagii? 28 Arggantsay aafuwaa doonaan bare golliyaa kees’s’iide de’ee; zaallatuwaa za’otuukka aw geessuwaa gideeddino. 29 Hewan uttiide, barew miyaawaa wochchee; Aa ayifii haakuwaappe demmee. 30 Arggantsaa maratuu suutsaa ushiino; bakkutay de’iyaa saan hak’ankka I shiik’ee» yaageedda.✝39:30 Mat. 24:28; Luk'. 17:37