Iyyooba 18

Bilddaade Laa"entso Haasayaa

1 Hewaappe guyyiyaan, Shuuha biittaappe yeedda Bilddaade hawaadan yaagiide zaareedda; 2 «Iyyoobaa, neeni ha haasayaa awude wurssay? Ane akeeka. Yaatooppe nuuni haasayana. 3 Nuuna ayaw miizza kessay? Ayaw nuuna donc’c’illowantta kessay? 4 Neeni ne hank’k’uwaan neena k’ohaasa. Ne hank’k’uwaan biittay mela gidanee? Woy zaallatuu barenttu sa’aappe d’ok’k’olettanee?

5 «Nagaranchchatuwaa de’uu s’omppii to’iyaawaadan to’anawe geeshsha; I laa"entso mulekka ees’s’enna.✝18:5-6 Yob. 21:17 6 I s’omppii bayinna golliyaa mala; Aa matan de’iyaa s’omppiikka to’ee. 7 I tanggiyaa tangguukka k’aammee; I haratuwaa zoriyaa zorii Aa unggee.

8 «Aa hametay Aa afiide, p’iriyaan gelissee; diizzaa giddon I hamettee. 9 P’irii Aa ginddiyaa oyk’k’ee; Aa k’aatsuwaa diggee. 10 Aw yurddo wodoruu geeman sa’aan hiis’etti uttee; I hamettiyaa ogiyaankka gitii wod’d’i uttee.

11 «Dagamay Aa dooddee; Aa guyyenakka yederssee; 12 Aa wolk’k’ay koshaan daabureedda; bashshay Aa matan naagee. 13 Wod’iyaa harggii Aa bollan ubbaan dooddee; Aa kushiyaanne Aa gediyaa duushissee. 14 I hirggi bayinnan de’iyaa bare golliyaappe yedersseettee; unttunttu asaa ubbaa mooddiyaa Hayk’k’uwaa giyaa kaatiyaakko, Aa afiino. 15 Harggiyaa yederssanaw diiniyaa laalowaappe guyyiyaan, ooninne Aa golliyaan de’ana. 16 I s’ap’uu garssaana meliyaanne k’ankkatuukka bollaanna k’ok’k’ofettiyaa mitsaa mala gidee. 17 Aa worii biittaappe d’ayee; Aa suntsaykka sa’aan hassayettennan attee. 18 I poo’uwaappe d’umaw yederssettana; Asay de’iyaa biittaappekka I d’ayana. 19 Aw na’ay woy zarii d’ayana; I de’eedda sa’aan itti asaynne pas’a de’enna. 20 Away doliyaa bagga Asay Aa gakkeeddawaan dagammee; away wulliyaa bagga asaykka yashshan kokkoree. 21 Awudekka iita asatuwaa wurssetsay hewaa mala; S’oossaa erennawanttu kaac’aykka hewaa mala» yaageedda.