Iyyooba 27

Iyyoobi Zaariidekka Haasayee

1 Iyyoobi hawaadan yaageedda; 2 «Ta suure pirddaa taana diggiide, ta de’uwaa c’ama kesseedda, Ubbaa Danddayiyaa de’uwaa S’oossan taani c’aak’k’ay. 3 S’oossay taw de’uwaa shemppuwaa immeedda keenan, 4 ta doonay wordduwaa haasayenna; ta ins’s’arssaykka c’imuwaa odenna. 5 Hintte haasayeeddawe likke gaade taani akkikke; hayk’k’ana gakkanawukka taani ta suuretetsaa aggikke. 6 Ta s’illotetsaa minisa oyk’k’anaappe attina, s’illotetsaa aggikke; taani de’eedda laytsaa ubbaan ta wozanay kahay taana k’um"ena.

7 «Ta morkketuunne taananna ek’ettiyaawanttu ubbay iitanne bayzzanchcha asaadan muretino. 8 S’oossay unttunttu shemppuwaa unttunttu ashuwaappe shaakkiide, unttunttu laytsaa k’aamissiyaa wode, iitatoo sintsappe hidootay ayee? 9 Unttunttu bolla metuu gakkiyaa wode, S’oossay unttunttu waasuwaa sisii? 10 Ubbaa Danddayiyaa S’oossan unttunttu nashettanee? Unttunttu ubbaa wode S’oossaa s’eesanee?

11 «Taani hinttena S’oossaa wolk’k’aabaa tamaarissana; Ubbaa Danddayiyaa S’oossaa halchchuwaa taani hintteppe k’ossikke. 12 Hintte ubbay hawaa hintte huup’iyaan be’eeddita. Yaatina, ha mela haasayaa ayaw haasayiitee?

13 «S’oossay iita asatoo immeedda kaac’aynne uk’k’unniyaa asatuu Ubbaa Danddayiyaa S’oossaappe akkiyaa woytuu hawaappe kaalliyaawaa. 14 Unttunttu naanatuu ay keeshshaa darooppenne, unttunttu olan wuriino; unttunttu zaratuukka miyaawaa d’ayiide koshshatiino. 15 Hewaappe atteedawanttu boshaan wuriino; unttunttu am"etuukka unttunttoo yeekkikkino.

16,17 «Iita asatuu, paydina wurenna biraa shiishshinakka, unttunttu biraa suure asatuu shaakki akkana; k’ay mayuwaa darissiide shiishshinakka, unttunttu shiishshiyaawaa s’illotuu mayyana. 18 Unttunttu kees’s’iyaa golletuu shararootaa golliyaa mala; naagiyaawanttu kees’s’eedda gaabbaa mala.

19 «Unttunttu dure gidiide, barenttu hiis’an gisana; shin unttunttu gem"ishuwaappe beegottiyaa wode, ayaynne d’ayina mela attanawantta. 20 Dagamay di’uwaadan k’oppennaan unttunttu bolla yaana; k’ammankka gotii unttuntta dentsiide afana. 21 Away doliyaa bagga c’arkkuu unttuntta de’iyaasaappe pittiide afana. 22 Unttunttu kessi akkanaw bak’atishina, k’areti bayinnan unttunttu bolla wod’d’ana. 23 Wolk’k’aama kooshshaa sissiidde, unttuntta yederssana.