Iyyooba 38

Med’inaa Goday Iyyoobaw Immeedda Zaaruwaa

1 Hewaappe guyyiyaan, Med’inaa Goday gotiyaa giddoppe Iyyoobaw hawaadan yaagiide zaareedda; 2 «Eri bayinna haasayan ta zoriyaa toochchiyaawe I hawe oonee? 3 Ane neeni asaadan ne s’eessaa danc’c’a denddaade, taani oochchiyaawaa taw oda.

4 «Taani sa’aa med’d’iyaa wode, neeni hak’an de’ay? Ane new akeekay de’ooppe, taw oda. 5 Ha sa’ay ay keeshshaa gidanaw bessintto, he k’ofaa k’achcheeddawe oonee? Likkiyaa wodoruwaakka sa’aa bolla yeggeeddawe oonee? Hewaa zaaruwaa ubbaa eray? 6 Sa’aa tuuk’etuwaa kunddennaadan mintsi oyk’k’eeddawe ayee? Sa’aa baasoo koyiro shuchchaa wotseeddawe oonee? 7 He gallassi wontta s’oolinttetuu ittippe yes’s’eeddawaanne kiitanchchatuu ubbay nashshechchaw ilileeddawaa neeni eray?

8 «Abbaa haatsay, biittaa gomppaappe d’uuk’k’iide kesiyaa gallassi, Aa penggetuwaa gorddeeddawe oonee?✝38:8-11 Erm. 5:22 9 Abbaa shaariyaa mayzzeeddawe, k’ay d’umankka s’aas’a wotseeddawe taana. 10 Abbaw aad’d’ena zawaa med’d’eeddawe, Aa penggiyaanne Aa kulbbuwaa sa’aan wotseeddawe taana. 11 Taani, ‹Hawaa gakka; shin hawaappe aad’d’oppa; ne wolk’k’aama beetaykka hewan ek’k’o› yaagaad.

12 «Iyyoobaa, neeni yelettoodeppe away wontta guuraanna kesanaadan azaza eray? 13 Biittaa gas’aan poo’uwaa bessana malanne iita asatuwaakka unttunttu k’osetteedda saappe k’onc’c’iyaa kessana mala, neeni wontta azaza eray? 14 Gallassaa poo’uu zoozatuwaanne zanggaaratuwaa dakkoyiide wotseedda mayuu ek’k’eeddawaadan beettanaadan ootsee; k’ay urk’k’aa miishshaa bolla wotseedda maatafaadan geeshshiide bessee. 15 Iitatuu barenttoo poo’o gi wotseedda d’umay d’ayee; unttunttu makkalaw dentsiyaa kushiikka me"ee.

16 «C’iimma abbaa giddo gelaade, pulttuwaa be’aaddi? Woy Asay gakki erenna abbaa gidduwaa paac’c’a s’eella eray? 17 Hayk’uwaa penggetuwaa neena oonentto besseedee? Woy d’ip’p’i go d’umaa penggetuwaa be’aaddi? 18 Sa’ay ay keeshshaa wolk’k’aamentto eray? Hewaa ubbaa neeni eriyaawaa gidooppe, taw oda.

19 «Poo’uu de’iyaasaa afiyaa ogii hak’an de’ii? K’ay d’umay de’iyaa sa’ay hak’ee? 20 Unttuntta neeni unttunttu golle golle afanaw danddayay? Unttunttu de’iyaasaa afiyaa ogetuwaa neeni eray? 21 Neeni sa’ay med’ettiyaa wode yeletteedda dirawunne daro laytsaakka de’eedda diraw, hewaa erennan aggakka!

22 «Suuppa shachchay minjjettiyaasaa gelaaddii? Orddo shachchay dooretteeddasaakka be’aaddi? 23 Taani unttuntta meto wodiyaw, olaa wodiyaawunne tooraa gallassaw minjja wotsaad. 24 Walk’k’antsay kesiyaa sa’aa afiyaa ogii hak’an de’ii? Woy away wulliyaa bagga c’arkkuu hak’appe kesiide c’arkkii?

25 «Wolk’k’aama iray wod’d’iyaa loossuwaa giigisseeddawe, guuguntsaw ogiyaa kesseeddawe oonee? 26 Asi de’enna bazzuwaan iraa bukissiyaawe oonee? 27 Mela bazzuu iraa haatsaan shuggiide, l"o maataa mokkanaadan ootseeddawe oonee?

28 «Iraw woy ketterssaw aawuu de’ii? 29 Orddo shachchawunne burc’c’e shachchaw aata de’ay? 30 Daro iris’s’atetsay haatsaa shuchchaadan minisee; abbaa haatsaw bolla baggaakka shachchaa kessee.

31 «Piliyaadisa geetettiyaa s’oolinttetuwaa c’itaa ittippe gatsaade k’achchanaw danddayay?✝38:31 Yob. 9:9; Amo. 5:8 Ooriyoona geetettiyaa s’oolinttetuwaa c’itay k’ashetteedda wodoruwaa billanaw danddayay? 32 C’itan c’itan de’iyaa s’oolinttetuwaa unttunttu wodiyaan wodiyaan kessanaw danddayay? Wogga Beeriyaanne K’eeri Beeriyaa geetettiyaa s’oolinttetuwaa c’itatuwaa ittippe kaaletsanaw danddayay? 33 Salotuu ak’iyaa higgiyaa neeni eray? Woy he higgii sa’aan mooddanaadan ootsanaw danddayay?

34 «Di’uu neena muukkanaadan iraa bukissanaw, ne k’aalaa d’ok’k’u ootsaade, shaaratuwaa azazayi? 35 Walk’k’antsatuu biide yiide, ‹Hekko, ha"i ay ootsiino› gaana mala, neeni unttuntta azazanaw danddayay? 36 Haatsaa kafoo aad’d’eeda eraa, kuttuwaa awuriyawukka akeekaa immeeddawe oonee? 37,38 Bare eran shaaretuwaa paydanaw danddayiyaawe oonee? Baanaa munak’k’iide, urk’k’aa kessiide, minisanaw saluwaa shaaretuwaa gede ootsiide, haatsaa duge tigiyaawe oonee?

39,40 «Gaammotuu ubbay barenttu geessuwaan geessuwaan gisi de’ishshin woy zuggiide naagishin, neeni unttunttoo miyaawaa shankkataade immanaw danddayay? Woy koshatti utteedda unttunttu maratuwaa kalissanaw danddayay? 41 K’uurotuu koshatti bichchaariya wode, unttunttu maratuukka miyaawaa demmanaw taw, S’oossaw, waassiyaa wode, unttunttoo miyaawaa immiyaawe oonee?