Wogaa 12

Mac’c’a Asay Yeli Simmiide Geeyiyaa Wogaa

1 Med’inaa Goday Musa hawaadan yaageedda; 2 «Israa’eeliyaa asaw hawaadan yaagaade oda; ‹Itti mac’c’awuna shahaaraade attuma na’aa yelooppe, bare piilay yeedda wode iza tuna gidiyaawaadankka, hewaadan iza laappun gallassay gakkanaw tuna gidanaanu. 3 Hosppuntsa gallassi na’ay k’as’s’arettanaw koshshee.✝12:3 Dom. 17:12; Luk'. 2:21 4 Hewaappe guyyiyaan, mac’c’awunna bare piilaa suutsay s’i"ana gakkanaw, hattamanne heezzu gallassaa gam"u; k’ay bare geeyiyaa gallassatuu wurana gakkanaw, geeshshabaa ayaanne bochchuppu; S’oossaa Geeshsha Sa’aakka geluppu.

5 « ‹Shin itti mac’c’awuna mac’c’a naatto yelooppe, bare piilay yeedda wode iza tuna gidiyaawaadankka, hawaadan laa"u saaminttaa gakkanaw, iza tuna gidana; Hewaappe guyyiyaan, bare piilaa suutsay s’i"ana gakkanaw usuppun tammanne usuppun gallassaa gam"u.

6 « ‹Mac’c’awuna attuma na’aa gidina mac’c’a na’aa gidina yelaade, bare geeyiyaa wodiyaa wurssowaappe guyyiyaan, s’uuggiyaa yarshshoo itti laytsaa dorssaanne nagaraa yarshshoo k’ay itti harap’p’iyaa maraa woy itti mara dogommuwaa S’oossaa Dunkkaaniyaa penggiyaan de’iyaa k’eesiyaakko ahu. 7 K’eesii hewaa Med’inaa Godaa sintsan yarshshiide, izi nagaraa atto giissee; yaatooppe iza bare yeluwaa suutsaa gogetsaappe geeyaw. Attuma na’aa woy mac’c’a na’aa yeliyaa mac’c’awuni wogay hewaa.

8 « ‹Shin itti laytsaa dorssaa orggiyaa ahanaw iziw shaluu gidana d’ayooppe, laa"u mara dogomattuwaa woy laa"u mara harap’p’atuwaa ahu; unttunttuppe ittuu s’uuggiyaa yarshshuwaassa; ittuu k’ay nagaraa yarshshuwaassa; yaatooppe k’eesii hewantta yarshshiide, izi nagaraa atto giissee; izakka geeshsha gidaw› yaaga» yaageedda.✝12:8 Luk'. 2:24