Wogaa 13

Galbbaa Harggiyaa S’eelliyaawaan Keseedda Higgetuwaa

1 Med’inaa Goday Musanne Aaroona hawaadan yaageedda; 2 «Ay asaa bollanne gaafu beetooppe, woy d’uussa madutsay woy ilahuu kesooppenne k’ay hewekka Aa galbban wolk’k’aama galbbaa harggiyaw laamettooppe, he bitaniyaa k’eesiyaa Aaroonakko woy k’eesiyaa gidiyaa Aa attuma naanatuwaappe ittuwaakko ahino. 3 K’eesii Aa galbbaa bollan de’iyaa madutsaa be’o. He madus’eedda sa’aan de’iyaa isikkii boos’s’ooppenne, madutsaykka ollatooppe, hewe wolk’k’aama galbbaa hargge. K’eesii hewaa be’iide, he bitanii tuna gidiyaawaa erisso. 4 Shin Aa galbbaa bollan de’iyaa shattuu boos’s’inttokka, galbbaappe lukkiide ollatibeennawaa gidooppenne he madutsaa bollan de’iyaa isikkii boos’s’ibeennawaa gidooppe, k’eesii he bitaniyaa dumma kifiliyaan laappun gallassaa gorddiide wotso. 5 Laappuntsa gallassan k’eesii Aa zaaretsiidekka be’o; I be’iyaa wode madutsay bitaniyaa galbbaa bollan aakkennan kasewaadankka de’ooppe, k’eesii he bitaniyaa laa"entsuwaakka dumma kifiliyaan laappun gallassaa gorddiide wotso. 6 K’aykka laappuntsa gallassan k’eesii Aa; be’iyaa wode madutsay aakkiyaawaa aggiide d’ay d’ay booppenne d’umooppe, k’eesii I geeshsha gidiyaawaa erisso. Hewe shattuwaappe attina harabaa gidenna; hewaa diraw, I bare mayuwaa meec’c’iide geeshsha gidee. 7 Shin I geeyanaw barena k’eesiyaa besseeddawaappe guyyiyaan, he shattuu Aa galbbaa bollan yaa aakki aakki booppe, I laa"entsuwaa barena bessanaw k’eesiyaakko bo. 8 K’eesiikka Aa be’o; he shattuu bitaniyaa galbbaa bollan yaa aakki aakki booppe, k’eesii I tuna gidiyaawaa erisso; ayaw gooppe hewe wolk’k’aama galbbaa harggiyaa.

9 «Oonanne wolk’k’aama galbbaa harggii oyk’k’ooppe, k’eesiyaakko Aa ahino. 10 K’eesii Aa be’o; be’iyaa wode Aa galbbaa bollan bootsa gaafuu de’ooppe, he gaafuu isikiyaakka bootsaw laammooppenne he gaafuwaa giddon ashuu muunni utteeddawaa gidooppe, 11 hewe Aa galbbaa bollan gam"eedda wolk’k’aama galbbaa harggiyaa gidiyaa diraw, k’eesii I tuna gidiyaawaa erisso. I tuna gidiyaawe eretti diggeedda diraw, Aa dumma kifiliyaan gorddanaw koshshenna.

12 «K’ay wolk’k’aama galbbaa harggii bitaniyaa galbbaa bollan aakkiide, huup’iyaappe gediyaa gakkanaw ubbaan mayyeeddawaa gidooppe, k’eesii be’o. 13 He wolk’k’aama galbbaa harggii Aa bollaa ubbaa mayyooppe, k’eesii I geeshsha gidiyaawaa erisso; Aa bollay ubbaannakka laamettiide bootsa gideedda diraw, I geeshsha. 14 Shin he madutsaa giddon muunneedda ashuu beettooppe I tuna. 15 K’eesii he muunneedda ashuwaa; be’iide he bitanii tuna gidiyaawaa erisso. He muunneedda ashuu wolk’k’aama galbbaa harggiyaa gidiyaa diraw, I tuna. 16 Shin he muunneedda ashuu k’aykka laamettiide boos’s’ooppe, he bitanii k’eesiyaakko yo. 17 K’eesii Aa be’o; Aa madutsay boos’s’eeddawaa gidooppe, he bitanii geeshsha gidiyaawaa k’eesii erisso; yaatooppe I geeshsha gidanawaa.

18 «Itti asaa bolla madutsay wod’d’iide pas’ina, 19 Aa sa’aan bootsa gaafuu beetooppe woy zo"eedda ilahuu kesooppe, he uray barena k’eesiyaa besso. 20 K’eesii Aa be’o; he madutsay ollatooppenne madutsaa bollan de’iyaa isikiikka laamettiide boos’s’ooppe, he bitanii tuna gidiyaawaa k’eesii erisso. Hewe madutsaanna doommeedda wolk’k’aama galbbaa harggiyaa. 21 Shin k’eesii be’iyaa wode, isikkii boos’s’ibeennawaa gidooppenne madutsaykka galbbaa lukkiide ollatibeennawaa gidooppe, k’ay d’ay d’ay booppe, k’eesii Aa dumma kifiliyaan laappun gallassaa gorddiide wotso. 22 Hewe Aa galbbaa bollan aakki aakkiide booppe, he bitanii tuna gidiyaawaa k’eesii erisso; ayaw gooppe, hewe galbbaa harggiyaa. 23 Shin he ilahuu aakki aakki beennan ittisaa s’alalaan de’ooppe, hewe madutsay pas’eedda mallaa gidiyaa diraw, he bitanii geeshsha gidiyaawaa k’eesii erisso.

24 «Itti asaa galbbaa tamay mooppenne he meedda sa’aan boos’s’eedda woy zo"eedda ilahuu kesooppe, 25 k’eesii he sa’aa be’o; Aa sa’aan de’iyaa isikkii boos’s’ooppenne madutsaykka lukkiide ollatooppe, hewe wolk’k’aama galbbaa harggiyaa. I tamay meeddasaana keseedda; hewaa diraw k’eesii I tuna gidiyaawaa erisso. 26 Shin k’eesii be’iyaa wode, he ilahuwaa bollan de’iyaa isikkii boos’s’ibeennawaa gidooppenne madutsaykka galbbaa lukkiide ollatibeennawaa gidooppe, k’ay d’ay d’ay beeddawaa gidooppe, k’eesii Aa dumma kifiliyaan laappun gallassaa gorddiide wotso. 27 Laappuntsa gallassan k’eesii Aa be’o; he wode he sa’ay aakki aakki booppe, I tuna gidiyaawaa k’eesii erisso. Hewe wolk’k’aama galbbaa harggiyaa. 28 Shin he ilahuu galbbaa bollan aakkennan aggiide itti sa’aan uttooppenne ubbaa k’ay d’ay d’ay booppe, hewe tamay meeddasaan atteeda mallaa gidiyaa diraw, I geeshsha gidiyaawaa k’eesii erisso.

29 «Itti attuma asaw woy mac’c’a asaw huup’iyaa woy gac’uwaa bollan madutsay kesooppe, 30 k’eesii he madutsaa be’o. I be’iyaa wode madutsay galbbaa lukkiide ollatooppenne Aa bollan de’iyaa isikiikka adilliyaa c’iishshaa malatiyaa lee"o gidooppe, he bitanii tuna gidiyaawaa k’eesii erisso. Hewe huup’iyaa woy gac’uwaa bollan kesiyaa k’aac’echchuwaanne wolk’k’aama galbbaa harggiyaa. 31 K’ay k’eesii he harggiyaa be’iyaa wode, I galbbaa lukkiide ollatibeennawaa gidooppenne karetsa isikiikka Aa bolla d’ayooppe, he k’aac’echchuwaa harggiyaana de’iyaa bitaniyaa k’eesii dumma kifiliyaan laappun gallassaa gorddiide wotso. 32 Laappuntsa gallassan k’eesii he harggiyaa; be’iyaa wode k’aac’echchuwaa harggii aakkennawaa gidooppe, Aa bollan adilliyaa c’iishshaa malatiyaa isikkii baynnawaa gidooppenne, ikka galbbaa lukkiide ollatibeennawaa gidooppe, 33 he bitanii he madutsaa yuushshuwaan de’iyaa isikiyaa meedo; k’aac’echchiyaa sa’aan de’iyaa isikiyaa mata meedoppo. K’eesii he bitaniyaa dumma kifiliyaan hara laappun gallassaa gorddiide wotso. 34 Laappuntsa gallassan k’eesii he k’aac’echchiyaa sa’aa be’iyaa wode; hewe bitaniyaa galbbaa bollan aakkana d’ayooppe galbbaa lukkiide ollatana d’ayooppe, he bitanii geeshsha gidiyaawaa k’eesii erisso. Bitaniikka bare mayuwaa meec’c’iide, geeshsha gidee. 35 Shin I geeyeeddawaappe guyyiyaan, k’aac’echchiyaawe he bitaniyaa galbbaa bollan aakki aakki booppe, 36 k’eesii Aa be’iyaa wode he k’aac’echchiyaawe aakkeeddawaa gidooppe, k’eesii adilliyaa c’iishshaa malatiyaa isikiyaa koyoppo; ayaw gooppe, he bitanii tuneedda. 37 Shin k’eesii be’iyaa wode, he k’aac’echchiyaasay aakkibeennawaa gidooppenne karetsa isikiikka Aa bolla doleeddawaa gidooppe, he k’aac’echchiyaasay pas’eedda. He bitaniikka geeshsha gidiyaa diraw, I geeshsha gidiyaawaa k’eesii erisso.

38 «Itti attuma asaa woy mac’c’a asaa galbbaa bolla bootsa ilahuu kesooppe, 39 k’eesii Aa; be’iyaa wode he unttunttu galbbaa bollan de’iyaa ilahuu shololla bootsa gidooppe, hewe galbbaa bollan c’oo keseeddawaa; he bitaniikka geeshsha.

40 «Itti asaw huup’iyaa binnaanay k’ok’k’ofettooppe, I bo"aa; gidoppe attina I geeshsha. 41 K’ay itti asaw huup’iyaa binnaanay sintsanna bo"atooppe, Aa tiishshay meedda; gidoppe attina I geeshsha. 42 Shin Aa bo"aa woy Aa tiishshay meeddasaa bollan zo’o woy bootsa madutsay kesooppe, hewe Aa bo"aan woy tiishshay meeddasaan keseedda wolk’k’aama galbbaa harggiyaa. 43 Aa k’eesii; be’iyaa wode Aa bo"aa woy tiishshay meeddasaa bollan de’iyaa madutsay galbbaa bollan kesiyaa wolk’k’aama galbbaa harggiyaadan zo’o gidooppe, 44 he bitanii tumukka wolk’k’aama galbbaa harggii sakkiyaa hargganchcha. I tuna gidiyaa diraw I tuna gidiyaawaa k’eesii erisso; ayaw gooppe harggii Aa huup’iyaan de’ee.

45 «Wolk’k’aama galbbaa harggii oyk’k’eedda Asay peed’eteedda mayuwaa mayyo; bare huup’iyaa pis’oppo; bare mettershshaakka kammo; yaatiide, bare k’aalaa d’ok’k’u ootsiide, ‹Taani tuna, taani tuna!› yaago. 46 He harggii Aa bolla de’eedda keeshshan ubbaan I tuna. I tuna gidiyaa diraw, asaappe shaakettiide dunkkaaneedda sa’aappe karenna barekka de’o.

Sallay Kesiyaa Wode Ootsiyaa Wogaa

47 «Ay mayuwaa bollanne borok’eedda sa’ay beettooppe, he mayuu suufe gidina woy liino gidina, 48 k’ac’inaappe woy shaluwaappe dadetteedda liino woy suufe gidina, galbbaa woy galbbaappe oosetteedda mayuwaa gidina, 49 he mayuwaa bolla kesiidde borok’uu maataa malatiyaa woy zo’o malaa bessooppe, I k’ac’inaappe woy shaluwaappe dadetteeddawaa gidina, galbbaa woy galbbaappe oosetteedda mayuwaa gidinakka, hewe borok’uu keseedda diraw, hewaa k’eesiyaa bessanaw koshshee. 50 K’eesii he borok’uwaa be’iide, he borok’uwaanna de’iyaa mayuwaa dumma kifiliyaan laappun gallassaa gorddiide wotso. 51 Laappuntsa gallassan k’eesii he mayuwaa be’iyaa wode; he mayuwaa bollan aakki aakki booppe, I k’ac’inaa woy shalo mayuwaa gidina, galbbaa woy galbbaappe oosetteedda mayyo gidinakka, hewe ittuwaappe ittuwaa oyk’k’iyaa borok’o gidiyaa diraw, he mayuu tuna. 52 K’ay he mayuu k’ac’inaa woy shalo mayyo gidina, liino woy suufe gidina, galbbaappe oosetteeddawaa ayaa gidinakka, k’eesii Aa s’uuggo. Hewe ittuwaappe ittuwaa oyk’k’iyaa borok’o gidiyaa diraw, I s’uugettanaw bessee.

53 «K’aykka k’eesii be’iyaa wode, he borok’uu mayuwaa bolla aakkibeennawaa gidooppe, I k’ac’inaa woy shalo mayyo woy galbbaappe oosetteeddawaa ayaa gidinakka, 54 he borok’uu de’iyaa mayuwaa meec’c’anaadan k’eesii azazo. Hewaappe guyyiyaan, he mayuwaa dumma kifiliyaan hara laappun gallassaa gorddiide wotso. 55 He borok’o sa’ay de’iyaa mayuwaa meec’c’owaappe guyyiyaan, k’aykka k’eesii be’iyaa wode he borok’uu bare malaa laammibeennawaa gidooppe, I aakki aakki baana d’ayooppekka tuna. He borok’o sa’ay mayoo guyye baggana woy sintsa baggana de’inkka, he mayuu taman s’uugettanaw koshshee. 56 Shin he mayuwaa meec’c’i simmina k’eesii be’iyaa wode borok’uu d’ay d’ay booppe, I galbbaa gidina, k’ac’inaa woy shalo mayyo gidinakka, he borok’uu de’iyaa sa’aa k’eesii daakkiide kessi diggo. 57 Hewaappe guyyiyaan, mayuwaa bolla simmiidekka kesooppe, he mayuu k’ac’inaa woy shalo mayyo gidina, galbbaappe oosetteeddawaa ayaa gidinakka, hewe aakki aakki biyaa borok’o saa gidiyaa diraw, he borok’uu de’iyaa mayuu taman s’uugettanaw bessee. 58 Shin meec’etteedda mayuu k’ac’inaa woy shalo mayyo gidina, woy galbbaappe oosetteedda ayaa mayyo gidinakka, borok’o sa’ay Aa bollappe d’ayooppe, he mayuu laa"entsuwaa meec’etto; Hewaappe guyyiyaan, I geeshsha gidee.

59 «Itti mayuu suufe woy liino gidina, k’ac’inaa woy shalo mayyo gidina, woy k’ay galbbaappe oosetteeddawaa gidinakka, he mayuwaa geeshsha woy tuna giissanaw danddayiyaa borok’o sa’aa wogay hawaa» yaageedda.