Zakkaraasa 5

Zakkaraasi Sas’aan S’aas’etti Utteedda Mas’aafay Paalliyaawaa Be’eedda

1 K’aykka taani d’ok’k’u gaade s’eelliyaa wode, itti s’aas’etti utteedda mas’aafay bollana paalliyaawaa be’aad.

2 Kiitanchchay taana, «Ha neeni be’iyaawe ayee?» yaagiide oochcheedda.

Taani, «Taani itti s’aas’etti utteedda paalliyaa mas’aafaa be’ay; aw geesay laatamu wad’aa; gomppaykka tammu wad’aa» yaagaad.

3 I taana hawaadan yaageedda; «Ha s’aatsa mas’aafaa giddon de’iyaawe biittaa ubbaa bollan yiyaa shek’k’aa. He mas’aafan itti baggana, ‹Wuu"iyaa ubbay gadiyaappe d’ayana› yaagiyaawe s’aafetteedda; k’ay yenkko baggana, ‹Wordduwaan c’aak’k’iyaa ubbay d’ayana› yaagiyaawe s’aafetteedda. 4 Ubbaappe Wolk’k’aama Med’inaa Goday hawaadan yaagee; ‹Taani he shek’k’aa kiittana; I biide, kayisuwaa soonne ta suntsan wordduwaan c’aak’k’iyaawaa golle gelana; yan de’iidde, he golliyaa I kees’etteedda mitsaananne shuchchaanna gatsiide, mi d’ayissana› yaagee» yaageedda.

Zakkaraasi Sas’aan K’un"aa Giddon Utteedda Mishiratto Be’eedda

5 Hewaappe guyyiyaan, he taananna haasayiyaa kiitanchchay taakko yiide, «Ane d’ok’k’u gaade, ha yiyaawe ayentto be’a» yaageedda.

6 Taani, «I ayee?» yaagaade oochchaad.

I zaariide, «Hawe makkiyaa k’un"aa» yaageedda. K’aykka gujjiide, «Hawe Asay ha biittaa ubbaan ootseedda naak’uwaa malaataa» yaageedda.

7 Irssaasiyaa giyaa birataappe oosetteedda k’un"aa k’um"ii poketteedda wode itti mishiratta k’un"aa giddon utteeddaano be’aad. 8 Kiitanchchay taw odiidde, «Hanna Iitatetsatto geetettaw» yaageedda. Izo guyye k’un"aa giddo sugi gelissiide, irssaasiyaa k’um"iyaakka duge naak’k’iide, k’un"aa k’um"eedda.

9 Hewaappe guyyiyaan, taani d’ok’k’u gaade s’eelliyaa wode, unttunttu k’efiyaan c’arkkuu de’iyaa laa"u mac’c’a asatuu yiyaawantta be’aad; unttunttu k’efii shortiyaa k’efiyaa mala. Unttunttu he keeshshaa sa’aappenne saluwaappe giddoo pude dentseeddino.

10 Yaatina, taani taananna haasayiyaa kiitanchchaa, «Hawanttu k’un"aa hak’a afiino?» yaagaade oochchaad.

11 I, «Unttunttu k’un"aa golliyaa kees’s’anaw Baabloone biittaa afiino; gollii kees’etteedda wode, unttunttu he k’un"aa aw giigeedda sa’aan wotsana» yaageedda.