सभोपदेशक 4

1 तव हांव त्यो सब भुण्डलो काम देखीयो जो दुनिया मा हये। आरु काय देखियो, कि आंधारो छेलने वाळान क डुळान आसा उहूय रीया, आरु हेनको कोय बी सुख आपने वाळो नी! आंधारो करने वाळान हात मा ताकोत हुती, पुन हेनको कोय शाँती आपने वाळो नी हुतो। 2 अतरान करीन हांव हेनु जीवतलान क जो हाल तक जीवता छे हेनकी बराबरी मा हांव हेनु मरलान क जो मर गयला छे, जादा वारु मानिस। 3 पुन हेनु दुयन सी जादा वारु त्यो छे जो हाल लोगुन पोयदा हुयो नी, नी या भुन्डला काम देखे जो धरती पर हुये। 4 तव हांव आखी मेहनतन काम आरु सब सफल काम क देखियो जो लोहगन आपसा साते वाळा सी कुहरायन कारण सी करे। यो बी वायबार छे। आरु वाहळाक धरने जोसो छे। 5 विनअकलियो हात पर हात मेलीन बठ रये, आरु आपसा क बरबाद करे। 6 मुठ भरीन मनन सुख, दुय मुठ मेहनत सी वारु छे, जो मानु वाहळाक धरने बराबर छे। 7 हांव धरती पर ओळी यी बी वात वायबार देखियो। 8 कोय एखलो रये आरु हेको कोय नी हय; नी हेको पोर्यो हय, नी भाईस हय, तेबी हेकी मेहनत खतम नी हये; नी ते हेका डुळा धन सी धापे; आरु नी त्यो कये, कि हांव कुनी वाटे मेहनत करो आरु आपसा क सुक सी दुर राखरीयो? यो बी वायबार छे। 9 एक सी दुय जन रयनो वारु छे काहकी हेनकी मेहनतन फोव वारु जड़े। 10 काहकी कदाम हेनु मा सी एक पड़े, ती दिसरो हेको उठाड़े; पुन विखु उना पर जो एखलोत हयीन पड़े आरु हेको कोय उठाड़ने वाळो नी रये। 11 ओळी कदाम दुय जन एखटा सुवे ती ताता रयसे, पुन कोय एखलो रयीन कसो तातो हुयसे। 12 कदाम कोय एखला क कोमजुर ते करे, पुन दुय हेको सामनो कर लेय। जो दुवड़ो तीन दुवड़ा सी बनलो रये, त्यो छाटो नी टुटे। 13 अकोल वाळो जुवान गरीब रयीन बी असला डाहला आरु विनअकलिया राजा सी वारु छे, जो राय नी माने, 14 होय सोके की त्यो जुवान राजान घोराना मा पोयदा होयो होय, नीते होय सोके की हेरी पोयदावारी गोरब्या मुलकोम होयी होय, 15 हांव सब जीवतलान क जो धरती पर चाले फिरे हेनको देखियो कि त्या हेना दिसरा पोर्यान क सात मा चाल दीदो, जो हेनको जागो हात करने करीन उबो हुय रीयो। 16 त्या आखा लोगहन गिनाये नी अतरा सवटा हुता। ते बी आवने वाळी पीढी हेका सी खुश नी हये। छाचली यो बी वायबार आरु वाहळानक धरनो छे।