सभोपदेशक 8

1 अकोल वाळा तसो कुन छे? आरु काहली वातन मतलब कुन लगाड़ सके? मानुसन अकोलन कारण मुय चमके, आरु हेका मुय परु दु:ख दुर हुय जाय।

राजा न हुकुम माननो

2 हांव तुसे सोला आपो की परमेश्वरन ओगोव वायदान कोरता राजान हुकुमोन पाळोन पाळ। 3 राजान होजरी मा जागु छुड़ने कोरने कोरीन तावनी मा झुन कोरे, काहनी भुन्डली वातोन कोरता वा नी होयु, काहकि हेनाक गोंहवे तोसो कोरसे। 4 काहकी राजा न बुल मा ते ताकत रये आरु कुन हेकेक कय सके कि तु काय करे? 5 जो हुकुम माने, त्यो पीड़ा सी वाच जासे आरु ओकोलवाळु मानुस वारली टेम आरु वारला कामोन नेम जाने। 6 काहकी हर एक न वारामा टेम आरु कामोन नेम रये, मानुस क दु:ख हेको वाटे घण भारो छे। 7 मानुस यो नी जानतो कि काय हुयने वाळो छे, काहकी काहलो मानुस हेको हुयने वाळी वातोन क देखाड़ सके? 8 असो कोय मानुस नी जिनान हक मा जीव चाले

दुष्ट आरु वारलो मानुस

9 जतरा काम धरती पर हुये हेनु सबन क धियान सी देखने मा यो सब काय हांव डेखीयो आरु यो बी देखियो कि एक मानुस दिसरा मानुस पर आदिकारी बनी आपसे उपर नुकशान लावे। 10 ओळी हांव कुमनियान क गाड़तला देखियो, जो चुखला जागा मा आया जाया करता हुता आरु जिनान नगर मा बी त्या असो करतला वाँ हेनको फोम नी रयो; यो बी वायबार छे। 11 भुण्डला कामन डण्ड न हुकुम उतवाळीयो जड़ जाय इना कारण मानुसन मन भुण्डला काम करने इच्छा सी भरायलो रये। 12 चाहे पापी सोव कावा पाप करे आपसा दाहड़ा वदाड़े, ते बी मखे पाको छे कि जो परमेश्वर सी बीहे आरु हेको सामने जानीन बीक मा वाले हेनो वारुत् हुये; 13 पुन पापी न वारलो नी हुये, आरु नी हेका जीवन उमर नाम्बी हुये, काहकी त्यो परमेश्वरन बीक नी मानतो। 14 एक आरु वात छे, जो धरती पर हुये यो बी रीकामो छे, धरमी मानुस क बुरा मानुसन फोव भुगतनो पड़े, आरु बुरा मानुस क वारला मानुस न वारला फल जड़ जाय, हांव कयो यो बी वायबार छे। 15 तव हांव सुक मनावनो वारु समझियो, काहकी धरती पर मानुस वाटे खाने पीने आरु सुख मनावने क छुड़ीन आरु काहय बी वारु नी हय, काहकी परमेश्वर हेको धरती पर योत् वातड़ो काम आपलो छे, हेको सुख लेने मा मद्त जड़से। 16 जव हांव अकोल हात करने आरु सब काम देखने करीन जो धरती पर करिया जाय तेनु कामोक सोमेजने कोरीन म्हार मन क लगाड़ीयो, कि कसा मानुस रात ने दाहड़ु जागता रये। 17 तव हांव परमेश्वरन आखा कामन क देखीयो जो धरती पर करीया जाय, चाहे मानुस हेका पुरावा क जानने करीन कतरी बी मेहनत कर लेय, ते बी हेको नी जानाये; कदाम अकोलवाळो कये कि हांव हेको समझीस ते बी त्यो हेको पतो नी कर सके।