Êxodo 10

आठवी पीड़ा: टिडियान आवनो

1 ओळी योहोवा भगवान मुसा सी कयो, "फिरोन क पास जा; काहकी हांवत् छे जो उको आरु उना करमचारियान मन क अतरान करीन वातड़ो करीयो म्हार मोटा चमत्कारन काम उन लोगहन के वीच मा देखाड़ो 2 आरु तुम लोगहन तुमरा पोर्या पारीन लारे एको पुरावो करो कि योहोवा भगवान मिसरीयान को कसो हासी उड़ायो आरु काय–काय चमत्कार सोहलानी उन लोगहन को वीच मा उजेन्तो करीयो; जिना सी तुमु यो जान जासु कि हांवत् योहवा छे।" 3 तव मुसा आरु हारुन फिरोन क पास मा जाईन कया, इबरीयान योहोवा भगवान थार सी इनीये रीतिये कय रीयो, कि तु कब तक म्हारे सामने निचळो हुयने मा संका करतो रहीस? म्हारी परजान लोगहन को जाने दे कि त्या म्हारी विनता करे। 4 कदाम तु म्हारी परजान लोगहन को जाने नी देय तो सुन, वाहने हांव थारा देश मा टिडिया ली आवीस। 5 आरु त्या धरती पर असा छावाय जासे कि धरती देखाय नी पड़े; आरु तुमरो जो काय बी गारा सी वाचलो छे उको त्या खाय जासे, आरु तुमरा जतरा बी झाड़े खयड़ा मा लागला छे उको बी खाय जासे, 6 आरु त्‍या थारा आरु थारा सारा करमचारियान को, याँ तक कि आखा मिसरीयान को घरो मा भराय जासे; अतरा टिड्डिया थारा बाप-दादा बी नी देखिया हसे।" आरु त्या मुय मुयड़ीन फिरोन क पास सी बाहर जात रीया। 7 तव फिरोनन करमचारिया उका सी कयने लागीया, त्यो मनुस काँ लुगन हामरे लिए फंदो बनलो रयसे? उन मनुस न को जाने दे कि त्या हेनका योहोवा भगवान नी विनता करे; काय तु हाय बी नी जाने कि सारो मिसर देश नाश हुय गयलो छे? 8 ओतरान कोरीन मुसा आरु हारुन को फिरोन क पास बुलाया, आरु त्यो मुसा आरु हारुन सी कयो, "जावो जात रयो, तुमरा योहोवा भगवान नी विनता करो; पुन जो जाने वाळा मानसे त्या कुन–कुन छे?" 9 मुसा कयो, हामु ते पोर्या-पारी, गाडरा-बोकड़ा, गाय-बयल्यान क साते याँ तक कि नानला पोर्यान सी लगाड़ीन डाहला डोकरान तक आखा की आखा जासु, काहकी हामुक योहोवा भगवान क लिये तिहवार वावनो छे।" 10 त्यो इनीये रीतियेबुन लोगहन सी कयो, योहोवा भगवान तुमरे साथमा जव हांव तुमुक नानला पोर्यान क साथमा जाने देयो; देखो तुमरा मन मा बुराई छे। 11 नी असो नी होये; तुमु ओदेमड़ात् जाईन योहोवा भगवान नी विनता करो, तुमको योत् जुवतो हुतो।" आरु मुसा आरु फिरोन क अगळ सी निकाळ दिदा। 12 तव योहोवा भगवान मुसा सी कयो, "मिसर देश भेनी थारो हात ओगो कर कि टिडिया मिसर देश पर चहड़े आरु देशन होरीक धरतीन जतरो बी ओन छे जो गारा सी वाचला छे उको सब खाय जाय।" 13 एकालिय मुसा ओकी लाकुड़ को मिसर देश भेनी फिरीन हात उचो करीन अगो करीयो, तव योहोवा भगवान दाहड़ु भरीन आरु रात भरीन मिसर देश पर उगेनली वाहळी चलाड़ीयो; आरु जव भोळभाको हुयो तव उनी वाहळी मा टिडिया आया। 14 आरु टिडियान टुळो आवीन मिसर देशन सारी जागा पर बठ गीया, हेनको टुळो घण सवटो हुतो, नी ते उना सी पेहले असा टिडिया आवला हुता, आरु नी ते हेनको बाद मा ओळी असा आवसे। 15 त्या ते सारी धरती पर छावाय गय, याँ तक कि आखा मिसर देश मा आंधारो हुय गीयो, आरु ओको सारो ओन आरु झाड़न सब फोव, आरु जो काय गारा पड़ीन खतम हुयने सी वाचलो हुतो, त्यो सब टिडिया खाय गीया; याँ तक कि मिसर देश मा नी ते कायला झाड़ पर नीळ्ळा पोत्ता कायबी नी रीया आरु नी खयड़ा मा वाळा झाड़े आरु पवधा वाचीया। 16 तव फिरोन उतवाळीयो मुसा आरु हारुन को बुलावीन कयो, "हांव ते तुमरा योहोवा भगवानन सी पाप करलो छे। 17 अतरान करीन मारो हिमलो पाप माफ करो, आरु तुमरा योहोवा भगवान सी विनता करो कि त्यो अतरोत करे कि म्हारे उपर सी इनी मोत को दुर कर देय।" 18 तव मुसा फिरोन क पास सी निकळीन योहोवा भगवान सी विनता करियो। 19 तव योहोवा भगवान घण भारी वाहळी चालाड़ीन टिडियान को उड़ावीन रातला दरिया मा न्हाक दीदो, आरु मिसर देशन काहला बी जागा पर एक बी टिडियो नी रयो। 20 तव बी योहोवा भगवान फिरोनन मन काजे वातड़ो कर दीदो, जिना सी त्यो इसराएलीयान को जाने नी दीदो।

नव्वी पीड़ा: आंधारो हुयनो

21 ओळी योहोवा भगवान मुसा सी कयो, थारो हात सोरगन भेणी बढ़ाव कि मिसर देश पर आंधारो हुय जाय, असो आंधारो कि हात सी टुटळाये।" 22 तव मुसा आपसो हात सोरग भेणी बढ़ायो, आरु सारा मिसर देश मा तीन दाहड़ा तक बेसको आंधारो हुयलो रयो। 23 मसर देशन मानसे तीन दाहड़ा तक नी ते कोय कुदान को देखियो, आरु नी कोय आपसा जागा सी उठीयो; पुण सारा इसराएलीयान घरो मा विजाळो रीयो। 24 तव फिरोन मुसा क पास बुलावीन कयो, "तुम लोगहन जावो, योहोवा नी विनता करो; तुमरा पोर्या-पारीन को बी सात मा ली जावो; तुमरा गाडरा-बोकड़ान को अतरा यात रयने देयो।" 25 मुसा फिरोन सी कयो, "तुको हामरे हात मा मेलबलि आरु होमबली बी आपनो पड़से, जिनको हामु हामरा योहोवा भगवान क लिए बलिदान चढ़ावासु। 26 अतरान करीन हामरा ढुरे बी हामरे साते जासे, हेनको एक खुर बी याँह नी रये, काहकी उना मा सी हामुक हामरा योहोवा भगवान क लिए आराधना करनेन सामान लेनो छे। आरु हामु जव तक वाँ सारी नी पुग जाजे तव तक हामुक नी मालोम हय कि काय–काय लीन योहोवा भगवान नी विनता करनो पड़से।" 27 पुण योहोवा भगवान फिरोनन मोन को वातड़ो कर दीदो, जिना सी त्यो उन लोगहन को जाने नी दीदो।" 28 तव फिरोन मुसा सी कयो "म्हार सामने सी जात रय; आरु चोकचोळीयो रयजी; मखे थारो मुय पछो झुण देखड़े; काहकी जिने दाहड़े तु मखे मुय देखाड़ीस उनी दाहड़े तको मार न्हाखसु।" 29 मुसा कयो, तु वारुत् कयो; हांव थारा मुय को कदी पछो नी देखो।"