निरगमन 28

पुराजान चुखला छिंदरा

1 ओळी तु इसराएलीयान मा सी थार भाई हारुन, आरु नादाब, अबीहु, एलीयाजर आरु ईतामार नावन उना पोर्यान को तारे पुठी ली आवजी कि त्या म्हारे लिये पुजारान को काम करे। 2 आरु तु थारा भाई हारुन लिये वारु ठाट बाटन छिंदरा आरु सुबे असो चुखो छिंदरो बनावजी। 3 आरु जतरा जनान जीव मा ओकल छे, जिनको हांवो ओकल आपने वाळी आत्मा सी भरलो छे, हेनको तु हारुनन छिंदरा बनावनेन हुकुम आप दे कि त्या म्हारेन करीन पुजारान को पवित्र काम करे। 4 आरु जो छिंदरा हयेनको बनावनो छे त्या या छे, मतलब सीनाबन्द आरु एपोद, आरु चोगला, च्यार खानान मोटली शाल, खान्दानी पागड़ी, आरु कड़ीयान वातड़ो पट्टो; यात् चुखला छिंदरा थारा भाई हारुन आरु उना पोर्यान क लियन बनावजो कि त्या म्हारेन करीन पुजारान को काम करे। 5 आरु त्या सोनान आरु नीळ्ळा आरु जामनीया आरु रातला रंगन आरु सुवाळा छिन्दरा ले।

6 त्या एपोद को सोनान, आरु नीळ्‍ळा, जामनीया आरु रातला रंगन छिंदरान आरु छानला सुवाळा बुरान छिंदरा बनावे, जो कि वारु रीते विंदनीयान हातन काम हय। 7 आरु त्यो इनीये रीतिये सी जुड़ाय जाय कि उका दुयु कांधान छिवनीया पछा भेसकायला रये। 8 आरु एपोद पर गुतायलो पट्टो हसे ओकी बनावट उनात् अनसारे हय; आरु त्या दुयु विगुर जुड़न हय, आरु सोनान आरु नीळ्ळा, जामनीया आरु रातला रंग वाळा आरु छिनला सुवाळा छिंदरान हय। 9 ओळी दुय सुलेमानी मनि लीन उना पर इसराएलीयान पोर्यान नाव खुंदवाड़जी। 10 हेनका नाव मा सी ते छव ते एक मणि पर आरु वाचला छव नाव दिसरी मणि पर, इसराएलन पोर्यान पोयदावारीन अनसारे खुंदवाड़जी। 11 मणि छाळवने वाळान कामन अनसारे जसा चापा कुरिन जाय, हसात उनी दुय मणिया पर इसराएलन पोर्यान नाव कुराया; आरु हेनको सोनान खाचा मा जुड़ाय देजी। 12 आरु दुयु मणियान एपोदन कांधा पर लगवाड़जी, त्या इसराएलीयान को लोगात फोम देवाड़ने वाळी मणि बनसे; मतलब हारुन आरु हेनको नाव योहोवा भगवान ओगळ दुयु कांधा पर फोम करने करीन लगाडलो रये। 13 ओळी सोनान खाचा बनवाड़जी; 14 आरु दुयड़ा सारको गुथायला दुय शाकळ चुखला सोनान बनवाड़जी; आरु गुथायला शाकळन उना खाचा मा जुड़वाड़जी।

सीनाबन्द

15 ओळी नियावन छातीयो बांदनेन छिंदरो को बी विंदनेन काम आवने वाळो बनवाड़जी; एपोदन समान सोना, आरु नीळ्ळा, जामनीया आरु रातला रंगन आरु वाटायला सुवाळा छिंदरान उको बनवाड़जी। 16 त्यो च्यार खुटीयो आरु दुय तरफीयो, आरु ओकी नाम्बाय आरु चवड़ाय एक-एक वेहतन। 17 आरु उनामा खास दोगड़ान च्यार हालोर मणि जुड़जी। पेहली हालोर मा ते माणिक्य, पद्मराग आरु लालड़ी हय; 18 दिसरी हालोर मा मरकत, नीलमणि आरु हीरा; 19 तीसरी हालोर मा लशम, सुर्यकान्त आरु नीलम; 20 आरु चवथी हालोर मा फीरोजा, सुलेमानी मणि आरु यशब हय; या सब खाचा मा जुड़ायनो जुळे। 21 आरु इसराएलन पोर्यान जतरा नाव हतरी मणि हय, मतलब हेनका नावन गिनतीन अनसारे बारेह नाव खुंदे, बारेह जाती मा सी एक-एकन नाव एक-एक मणि पर असो खुंदाड़ जसो छापा खुंदे। 22 ओळी राखवाळीन ढाळ छिंदरा पर दुयड़ा सारको गुथायला चुखला सोनान जंजीर लगवाड़जी; 23 आरु राखवाळीन ढाळ छिंदरा मा सोनान दुय कड़िया लगवाड़जी आरु दुयु कड़िया को राखवाळीन ढाळ छिंदरा दुयो छिवनीया पर लगवाड़जी। 24 आरु सोनान दुयो गुथायला जंजीरोक उना दुय कड़िया मा जो राखवाळीन ढाळ छिंदरान छिवनीया पर हुयसे उको लगवाड़जी। 25 आरु गुथायला दुयो जंजीरोन दुयो रयला छिवनीया दुयो खाना मा जुड़ावाड़ीन एपोदन दुयो कांधान बाधायला पर उना सामने लगवाड़जी। 26 ओली सोनान दुय आरु कड़िया बनावीन राखवाळीन ढाळ छिंदरान दुयो छिवनीया पर, ओकी उनी कुर पर जो एपोदन माहाय तरप लगाड़जी। 27 ओळी हेनका विगुर सोनान दुय आरु कड़िया बनवाड़ीन एपोद क दुयो खांदा क बांदाय पोर, नेचो सी हेनका अगळ आरु हेनका जुड़ क पास एपोदन विंदला पोट्टा क उपोर लगवाड़जी। 28 आरु राखवाळीन ढाळ आपसी कड़ीयान लारे एपोदन कड़िया मा नीळ्ळा बोंदो सी बांधजो, इनीये रीतिये त्यो एपोदन ढाळायला पट्टा पर बनली रये, आरु राखवाळीन ढाळ एपोद पर सी अलग नी हुयनो जुळे। 29 आरु जव-जव हारुन चुखला जागा मा भराया करे, तव-तव‍ त्यो नियावन राखवाळीन ढाळ छिंदरा पर आपसा मनन ऊपर इसराएलीयान नावोक लगाड़लो रये, जिना सी योहोवा भगवानन सामने हेनको फोम जोलम रयसे। 30 आरु तु नियावन राखवाळीन ढाळ छिंदरा मा ऊरीम आरु तुम्मीम*28:30 ऊरीम आरु तुम्मीम योहोवान मोरजी पाकी कोरने क लिय पुजारान लारे वापरने वाळी चीजे, पुन यो वारु पाको नी होय की त्या कोसा वापरतला। को राखजी, आरु जव-जव हारु योहोवा भगवान सामने भराये, तव-तव त्या उना मनन ऊपर हय; इनीये रीतिये हारुन इसराएलीया क लियन योहोवा भगवानन आपसा मन पर योहोवा भगवानन अगळ एक सारको लागलो रये।✝28:30 गिनती 27:21; व्यवस्थाविवरण 33:8

दिसरा पुजारान छिंदरा

31 ओळी एपोदन कुरता को पुरो नीळ्ळा रंगन बनावजी। 32 ओकी बनावट असी हुयनो जुळे कि उना वीच मा विच मा छिवनीया न्हाकनेन डूचा हय, आरु उना डूचान च्यारो मेर कवच डूचान सारकी एक बुनली कोर हय कि त्यो नी फाटे। 33 आरु उना नेचला घेरा मा‍ त्यारो मेर नीळ्ळ, जामनीया आरु रातला रंगन छिंदरान अनार बनवावड़जी आरु उना वीच-वीच च्यारो मेर सोनान घंटिया लगवाड़जी, 34 मतलब एक सोनान घंटी आरु एक अनार, ओळी एक सोनान घंटी आरु एक अनार ईनीये रीतिये चोगलान नेचला घेरा मा च्यारो मेर असोत् हुये। 35 आरु हारुन उना चोगलान सेवा चाकरी करनेन टेमे पहरीया करे, कि जव-जव त्यो चुखलो जागान माहय योहोवा भगवानन सामने जाय या बाहर निकळे, तव-तव ओकी ओवाज समळाय देय, नी ते त्यो मर जासे। 36 ओळी चुखला सोनान एक पट्टी बनावजी, आरु जसो छापा मा हसोत् उना मा यो आकड़ा खुंदजी, मतलब योहोवा क लियन चुखलो होय। 37 आरु उको नीळ्ळा बोंदो सी बांधजी; आरु त्यो पागड़ीन सामने वाळा भाग पर रये। 38 आरु त्यो हारुनन मुनका पर रये, अतरान करीन कि इसराएली जो काय चुखो बनावे, मतलब जतरी चुखली चीज भेट चढावे उनी चुखली चीजोन को पाप हारुन हाकलतो रये। आरु हमीसा हेका माथा पोर रोहे, जिनासी योहोवा उनासी खुश रोहे। 39 झोगला को सुवाळा छिंदरान च्यारा खाचान बनवाड़जी, आरु एक पागड़ी बी सुवाळा छिंदरान बनावड़जी, आरु हीर गुथलो एक कड़ीयान पट्टो बी बनवाड़जी। 40 ओळते हारुनन पोर्यान करीन बी अंगरखा आरु कड़ीयान पट्टा आरु टुपिया बनवाड़जी; या छिंदरा बी ठाट बाटन आरु भाळे हसा बननो जुळे। 41 थारा भाइस हारुन को आरु उना पोर्सयान को या सब छिंदरा पेहारवीन छिंदरा पहरावीन आरु तेल लगाड़ीन चड़ावनो आरु रीत भात करजी, आरु हेनको चुखा करजी कि त्या म्हारे लिये पुजारान काम। 42 आरु हेनका लिये छिंदरान आदला चोड्डा बनावड़जी जिनु सी हेनको डील ढाकायलो रये; त्या कड़ीया मा सी जाँघ तकुन हुयनो जुळे; 43 आरु जव-जव हारुन या उना पोर्या मिलापवाळा तम्बु मा भराया करे, या चुखला जागा मा सेवा चाकरी करनेन वेदी को पास मा जाय तव-तव त्या उना आदला चोड्डा को पेहरीन रये; असो नी हये कि त्या पापी बने आरु मर जाय। यो हारुन क लिये आरु उना बाद मा ओकी ओवलियाद क लिये बी जोलमन रीति बने।