1 "बसलेल आरु ओहोलीआब आरु सब ओकल वाळ जिनको योहोवा भगवान असी ओकल आरु सोमोज आपलो हय, कि त्या योहोवा भगवानन सारा हुकुम को लारे चुखला जागान सेवा चाकरी क लियन आखा भातीन काम करनो जाने, त्यो सब यो काम करे।"

2 तव मुसा बसलेल आरु ओहोलीआब आरु सब ओकल वाळान को जिनको जीव मा योहोवा भगवान ओकलन विजाळो आपलो हुतो, मतलब जिना-जिनान पास मा आवीन काम करनेन जुर हुतो हेनु सबन को बुलायो। 3 आरु इसराएली जो-जो भेट चुखला जागान सेवान काम आरु उको बनावने करीन लीयावला हुता, उको त्या मनुस मुसान हात सी ली लेदा। तव बी लोगहन भोळभाकाम उना पास भेट आपसी राजी मरजी सी लावता रीया। 4 आरु जतरा ओकल वाळा चुखला जागान काम करता हुता त्या सब आपसा-आपसा काम छुड़ीन मुसान पास मा आया, 5 आरु मुसा लागीया, "जिना काम को करनेन योहोवा भगवान हुकुम आपलो छे उना लिये जतरा जुळतो हुतो उना सी जादा त्या ली आया।" 6 तव मुसा सारी तम्बु मा इना हुकुमन परचार करायो, "काय ओदेमड़ा, काय बायरा, कोय बी चुखला जागा लिये भेट नी लावनो।" इनीये रीति सी लोगहन आरु भेट लावने सी रुकाय गीया। 7 काहकी सब काम क लियन जतरो सामान जुळतो हुतो हतरत् पुन उना सी जादा बनावने वाळान पास मा आय गयलो हुतो।

8 आरु काम करनेवाळा जतरा ओकल वाळा हुता त्या निवास लियन वाटायला सुवाळा छिंदरान, आरु निव्वा आरु रातला रोंगोन छिंदरान दोस पोरदा काजे गुथला कोरुब भेव बोनाया। 9 एक-एक परदान नाम्बाय अठावीस हातन आरु चवड़ाई च्यार हातन हय; सब परदन एकुत् माप बनीयो। 10 त्यो पाच परदा एक दिसरा सी जुड़ दीदो, आरु ओळी पाच परदा बि एक दिसरा सी जुड़ दीदा। 11 आरु जा सारी या जुड़ायला परदा वा सारी दुय छिवनीया पर त्यो नीळ्ळा-नीळ्ळा फांदीया लाड़ीयो। 12 आरु त्यो दुयो मेर मा पचास पचास फान्दा लगाड़ीया की त्या एक दिसरा अगळ हुता। 13 आरु त्यो सोनान पचास आकड़ा बनायो, आरु हेनका लारे एक दिसरा सी जुड़ीयो कि निवास मेळीन एक हुय ईयो। 14 ओळी निवासन उपरक तंबु पर ढ़ाकने क करता त्यो बकड़ान छटान गियारा परदा बनायो 15 एक-एक परदान नाम्बाय तीस हातन आरु चवड़ाय च्यार हातन हुयी; आरु गियारा 16 एनामा सी त्यो पाच पोरदा ओलोग आरु छव पोरदा ओलोग जुड़ दिदो। 17 आरु जा सारी दुयु जुड़ाय गिया वा खुनान छिवनीया मा त्यो पचास पचास फान्दीया लगाड़ीयो। 18 आरु त्यो तम्बु को जुड़ने करीन पीतळन पचास आकड़ा बी बनायो जिना सी त्यो एक हुय जाय।

19 आरु त्यो तम्बु क लिये रातला रमग सी रंगायली गाडरान खालन एक पांगरुन आरु उना ऊपर लियन सीइसन खालन एक पांगरुन बी बनायो। 20 ओळी त्यो निवास क लियन बाबळीयान लाकड़ान पाटिया को उब राखने करीन बनायो। 21 एक-एक पाटियान नाम्बाय दस हात आरु चवड़ाय डेढ हातन हुयी। 22 एक-एक पाटिया मा एक दिसरा सी जुड़ायली दुय-दुय चुले बनली, निवासन सब पाटियान को असोत् बनायो। 23 त्यो रोहनेन जागा क लिय पाटियान को असोत् बनायो कि दोखेवरे तरफ वीस पाटिया लागीया। 24 आरु इनु वीस पाटियान नेचा चाँदीन चाळीस कड़ची, मतलब एक-एक पाटियान नेचो दुय चुला क लियन दुय कड़ची बनायो। 25 आरु निवासन दिसरे तरफ, मतलब उगेवनो तरप लगाड़ने करीन त्यो वीस पाटिया बनायो। 26 आरु हेनको लिये बी त्यो चाँदी चाळीस कुड़ची, मतलब एक-एक पाटियान नेचो दुय-दुय कुड़ची बनायो। 27 आरु निवासन पछली तरफ, मतलब जेवड़ीये तरफ क लियन त्यो छव पाटिया बनायो; 28 आरु पछला भागन कुना क लियन त्यो दुय पाटिया बनायो। 29 त्यो नेचो रईन दुय- दुय भागन बनायो, आरु दुयु भाग मा निवासन कुना क लियन त्यो दुय पाटिया बनायो। 30 इना रीति सी आठ पाटिया हुया, आरु हेनकी चाँदीन सुवळा कुड़ची हुय; मतलब एक-एक पाटियान नेचो दुय-दुय कुड़ची हुयी। 31 ओळी त्यो बाबळीयान लाकड़ान डांडा बनायो, मतलब निवासन एक धोड़ेन पाटिया लियन पाच डांडा, 32 आरु निवासन दिसरी तरफन पाटियान; जुगु पाच डांडा, आरु निवासन जो कुनु जेवड़ीयो आरु जो पछळ जागाम हुतो उना लियन बी पाच डांडा बनायो। 33 आरु त्यो वीच मा वाळा डांडान पाटियान वीच मा तम्बुन एक छिवणिया सी दिसरे छिवणिये तक पुगने करीन बनायो। 34 आरु पाटियान को त्यो सोना सी घड़ीयो आरु डांडान घर मा काम आवने वाळा कड़ाक को सोनान बनायो, आरु डांडा को बी बनायो। 35 ओळी त्यो नीळ्ळा, जामनीया आरु रातला रंगन छिदरान आरु सुवाळा सनीवाळा छिंदरान वीचमा वाळा परदा बनायो; त्यो विंदनेन काम करनीया करुबन चितरोन सात मा बनीयो। 36 त्यो उना लियन बाबळीयान च्यार खाम्बा बनायो, आरु हेनको सोना सी ढाळीयो; हेनका माकड़ा वी सोनान बनी, आरु त्यो हेनका लियन चाँदीन च्यार कड़चीया ढाळीयो। 37 त्यो तंबुन झोपला क लियन बी नीळ्ळा, जामनीया आरु रातला रंगन छिंदरान, आरु वाटायला सुवाळा छिंदरा विंदिन काम करलो परदो बनायो; 38 आरु त्यो माकड़ा क सात मा उना पाच खाम्बा बी बनायो, आरु हेनका मुनका पर जुड़ने वाळी छड़ीयान को सोना सी ढाळीयो, आरु हेनकी पाच कुड़ची पीतळन बनायो।