निरगमन 2

मुसान जोन्मोवारी

1 लेवी क घरानान एक मनुस एक लेवी जाती न बायर सी वीयाव कर लिदो। 2 ची बायर भार पाये हय आरु उको एक पोर्‌यो पयदा हुयो; आरु यो देखीन कि त्यो बाळो घाटाळो छे, उना उनासी बाळा क तीन महीना तक सातीन राखी।✝2:2 इब्रानियों 11:23 3 जव ची बायर उको जादा समय तक सातीन नी राख सकी तव उका लियन टुकरान बनावली एक खिल्‌ली लेदी आरु उनी पर चिकनु धुळु आरु राल लगाड़ीन, उना मा बाळा को मेळीन नील नदीन काठा पर काहळान वीच मा छुड़ी आवी। 4 उना बाळान बयनी दुर उबी रहवी यो देखने कि ओको काय हाल हुयसे। 5 तव फिरोन राजान पोराय ऊंगळने करीन नदी न काटा पर आवी; ओकी पावराय बी काठा पर फिरती हुती; तव ची काहळान वीच मा खिल्‌ली को देखीन आपसी पावराय को उको ली आवने करीन लेने मोकली। 6 तव फिरोन राजान पोराय उनी खिल्‌ली काजे उगाड़ीन देखी कि उका मा रोड़तलो एक बाळो छे; तव उको उना बाळा पर दया आवी आरु ची कयने लागी, "यो ते इबरी जाती बाळो हसे।" 7 तव बाळान बयनी फिरोन राजा नी पोरय सी कयने लागी, "काय हांव जाईन इबरी बायर माईन काहली एक बाय को तारे पास बुलाय लावो जो तारे लिये बाळा को दुध पिवाड़िया करे?"

8 फिरोन न पोराय कहवी, "जा।" तव ची पोराय जाईन बाळान माय को बुलाय लावी। 9 फिरोन राजा न पोराय उना सी कयी, "तु इना बाळा को ली जाईन म्हारे लिये दुध पाया कर, आरु हांव तुको दाहड़की देय दिस।" तव ची बायर बाळा को ली जाईन दुध पावने लागी। 10 जव बाळो थुड़क मोटो हुयो तव ची उना बाळा को फिरोन न पोराय क पास मा ली गय, आरु त्यो उको पोर्‌यो बनियो; आरु ची यो कयीन उको नाव मुसा राखी, "कि हांव उको पानी मा सी निकावली हुती।"