1 मुसा आपसा सेसरा यित्रो नावन मिद्यान क पुजारान गाडरा–बुकड़ान क चारावतो हुतो; आरु‍ त्यो गाडरा–बुकड़ान को जंगलो मा पश्चिम तरफ होरेब नावन योहोवा देव बयड़ान पास मा ली गियो। 2 आरु योहोवा देवोन दुत एक काटा वाळी झाड़ोन वीच मा आग्ठान लपट मा मुसा को दर्शन दीदो; आरु त्यो नजर नाखीन देखियो कि झाड़को धप रीयो, पुन खतम नी हुयती। 3 तव मुसा आपसा मोनोम विचारीयो, हांव हतो जाईन इना विछेळीया काम को देखीस कि त्यो झाड़को काह नी धपतो।

4 जव योहोवा देव यो देख्‌यो कि मुसा देखने करीन आय रीयो, तव योहोवा देव झाड़ीन वीच मा सी मुसा को आयड़ी कयो, "ए मुसा, ए मुसा" मुसा कयो काय, काय हुकुम। 5 योहोवा देव कयो, उरो मा आवे, आरु तारा पाय मा सी खासड़ा निकाळ दे, काहकी जिना जागा पर तु उबो हुय रीयो त्यो चुखलो छे। 6 अतळते त्यो कयो, हांव तारा बाप को परमेश्वर, आरु अबराहम को परमेश्वर, इसहाक क परमश्वेर, आरु याकुब को परमेश्वर छे। तव मुसा जो योहोवा देव न तरफ भावनेन बिह गोयी, एकालिय उको मुय ढाक लीदो।

7 अळते योहोवा देव कयो, "हांव म्हारी जातीन क लोगहन जो मिसर मा छे हेनका दु:ख को छाचो देखलो छे, आरु वातड़ी मेहनत करावने सी हेन्को आयेड़ेन ओवाज उको हांव बी समळलो छे, आरु हेन्दरी पीड़ा पर हांव मन लगाड़ीयो। 8 अतरान करीन अब हांव नेचो उतरी आवलो छे कि उन लोगहन को मिसरीयान हाथ मा सी छुड़ावो, आरु उना देश सी निकाळीन एक वारला आरु मोटा देश मा जिना मा दुध आरु माहळन धार उहवे, मतलब कि कनानी, हित्ती, एमोरी, परिज्जी, हिव्वी, आरु यबुसी लोगहन क जागा मा पुगाड़ीस। 9 अतरान करीन अब समळ, इसराएलीयान आयेड़नो मखे समळाय पड़ियो, आरु मिसरीयान उन लोगहन वेला पाड़नो बी मखे देखाय पड़लो छे, 10 अतरान करीन आव, हांव तुको फिरोन क पास मुकलो कि तु इसराएल जातीन लोगहन को मिसर देश सी निकाळ ली आवे।"

11 तव मुसा योहोवा सी कयो, "हांव कुन छे, जो फिरोन क पास मा जामो, आरु इसराएलीयो को मिसर देश सी निकाळ लावो?"

12 योहोवा देव कयो, पाको हांव तारे साते रहीस; आरु इनी वात को कि तुखे मोकलने वाळो हांव छे, तारे लिये यी सोहलानी रहवसे; कि जव तुउन लोगहन को मिसर देश सी निकाळ लीस तव तुमु इनात् बयड़ा पर म्हारी सेवा भक्ती करसु।

13 मुसा योहोवा देव सी कयो, जव हांव इसराएलियो क पास मा जाईन हेनको यो कयो, कि तुमरा डाहडान देव मखे तुमरे पास मोकलीयो, तव कदाम त्या म्हार सी पुछे, उको नाव काय छे? तव हांव उन लोगहन को काय देखाड़ीस?✝3:13 निर्गमन 6:2,3

14 योहोवा देव मुसा सी कयो, "हांव जु छे चु छे।"*3:14 "हांव जु छे चु छे।" हांव योहोवा छे। ओळते त्यो मुसा सी कयो, तु इसराएलियो सी कयजी जेरो नाव हांव छे चो छे त्यो मखे तुमरे याँह मोकलीयो।✝3:14 प्रकाशितवाक्य 1:4,8 15 ओळते योहोवा देव मुसा सी यो बी कयो, तु इसराएलियो सी यो कयजी, तुमरा डाहडान योहोवा देव, मतलब अबराहम को परमेश्वर, इसहाक को परमेश्वर, आरु याकुब को परमेश्वर, त्योत् मखे तुमरे पास मोकलीयो। देख सदा तक म्हारो नाव योत् रयसे, आरु पीढ़ी–पीढ़ी मा म्हारी फोम इना सी हुया करसे। 16 अतरान करीन अब जाईन इसराएली डाहडान को एखटा कर, आरु उन लोगहन सी कय तुमरा डाहडा अबराहम, इसहाक, आरु याकुबन परमेश्वर, योहोवा मखे दर्शन दीन कयलो छे कि हांव तुमरे पर आरु तुमरे साते जो गलत व्यवहार मिसर हुयतलो उना पर मन लगाड़लो छे; 17 आरु हांव ठान लियो कि तुमुक मिसर देशन दु:ख मा सी निकाळीन कनानी, हित्ती, एमोरी, परिज्जी, हिव्वी, आरु यबुसी लोगहन क देश मा ली जाईस, जो असो देश छे कि जिनाम मा दुध आरु माहळनी धार उहळे।

18 तब त्या मान लेसे; आरु तु इसराएली डाहडान को सात मा ली जाईन मिसर देशन राजा को यो कयजी, इबरीयान परमेश्वर, योहोवा भगवान सी हामरी भेटावनी हुयली छे; अतरान करीन अब हामुक तीन दाहड़ान वाटिये जंगल मा जानी दे कि हामरा परमेश्वर योहोवा क बलिदान चढ़ावजे। 19 हांव यो जानो कि मिसर देशन राजा तुमुक जाने नी देय पुन एक मोटी ताकतुत तुमु लोगहन क जाने क लिय ओको वेला पाड़से। 20 अतरान करीन हांव हाथ बढ़ावीन उन सब पर विनछेळीया काम मिसरन वीच मा करीस उना देश को मारीस; आरु उना बाद त्यो तुमुक जाने देसे।

21 तव हांव मिसरी जाती सी म्हारी इनी जाती पर दया करावीस; आरु जव तुमु निकेळसु तव ठारला हाथ सी नी निकळु।✝3:21 निर्गमन 12:35,36 22 पुन तुमरी एक–एक बायर आपसी–आपसी पड़ोस वाळी, आरु आपसा–आपसा घर मा रहवने वाळी सी सोना चाँदीन गयनो, आरु छिंदरा मांग लेसे, आरु तुमु ओको तुमरा पोर्या आरु पोराईयोन को पेहरावजो; इनिये रीतिये तुमु मिसरी लोगहन को लुट लेसो।