1 इनी रीतिये सोरोग आरु धरती आर जो काय ओका मा छे उनी आखी चीज बनी। 2 आरु परमेश्वर न आपसो काम जो हुयो कोरतो हुतो सातवे दाहड़े सार देदु, आरु हुये आपसा कोरला काम सी सातवे दाहड़े आराम कोर्यु। 3 आरु परमेश्वर न सातवा दाहड़ा क बोरकोत आप्यो आरु चुखलो कोयो; काहकी हेनामा हुयो कोळी क घोड़ीन आपसो आखो कामो सी आराम कोर्यु।

4 वादळा आरु कोळी क उबेजनो क वाराम यो छे की जोत्यार हुये पयदा होया यानी जेने दाहड़े योहोवा परमेश्वर न कोळी आरु वादळा क बोनाय: 5 ती खोयड़ा क काई पोवधो कोळी पोर नी हुतो, आरु नी खोयड़ा क काई नानो झाड़ उगलो हुतो, काहकी योहोवा परमेश्वर न कोळी पोर जळ नी पाड़्यु होतु, आरु कोळी पोर खेती करने क लिय मानुस वी नी हुतो; 6 ते वी धुरो कोळी सी उठतो होतो तेरे सी कोळी पोर पानी देदला जोसो होय जातलो। 7 ती योहोवा परमेश्वर न आदम क कोळी क धुळा सी बोनायो, आरु ओका नाको मा जिवन क सास फुक देदो; आरु आदम जिवतो जीव बोन गोयो। 8 आरु योहोवा परमेश्वर न उगेवनो अदन मा एक वाड़ी लागाड़्यो, आरु होंया आदम क जेनाक हुयो बोनायो होतो, मेक देदो। 9 आरु योहोवा परमेश्वरन कोळी सी सब भाती क झाड़, जे देखने मा घोन वारु जेनाक खाने मा वारु छे, उगाड़्यो, आरु वाड़ी क वीच मा जिवन क झाड़ क आरु वारु एने भुण्डा क गियान क झाड़ क वी लागाड़्यो। (प्रकाशितवाक्य 2:7, 22:2,14)

10 हेनी वाड़ी क पानी देने क लिय एक मोटली नोदी अदन सी निकोळी आरु होंया सी ओगी उहवीन चार भागो मा वाटाय गोय। 11 पेहली धारा क नाव पीशोन छे; यी ची छे जी हवीला नाव क आखो देश क जाँ सोनो छे, च्यारो मेर घेर रय। 12 हेना देश क सोनो चुखो छे; होंया मोती आरु सुलेमानी दोगड़ा वी जोड़तला छे। 13 दुसरी नदी क नाव गीहोन छे; यी ची छे जी कुश क आखा देश क घेरवायली छे। 14 आरु तीसरी नोदीन नाव हिद्देकेल छे; यी ची छे जी अश्‍शुर क उगेवनो भिनी उहवे। आरु चोथी नोदीन नाव फरात छे।

15 ती योहोवा परमेश्वर न आदम क लीन अदन क वाड़ी मा मेक देदो, कि हुयो हेरेम काम कोरे आरु वाड़ी क गुवाळी करे। 16 आरु योहोवा परमेश्वर न आदम क यो हुकुम आप्यो, तु वाड़ी क आखा झाड़ क फोव विगुर निसंदेह खाय सोकतलु छे; 17 बाखुन वारु भुण्डान क गियान क जो झाड़ छे, ओको फोव ती कोदी झुनी खाय: काहकी जेने दाहड़े तु हेना फोव क खाईस तेने दाहड़े छाचीन मोर जाईस ( रोमियो 6:23) 18 ओळी योहोवा परमेश्वर न कयो, "मानुसक एखलो रयनो वारु नी हयस; हांव एरे जुगु एक ओसो सहायक बोनावीस जो एरे सी मेळ खाय।" 19 आरु योहोवा परमेश्वर कोळी मा सी सब जाती क बनेला ढुरे, आरु वादळा क सब भाती क चिल्‌ला क बोनावीन आदम क पास ली आयो कि देख्यो कि हुयो हेन्दरो नाव काय काय पाड़े; आरु जिना जिनान जिवतला जिव क जो जो नाव आदम न पाड़्यो चोत ओको नाव होय गोयो। 20 अत: आदम न सब जाति क घोरोन ढुरो, आरु वादळ क चिल्‌ला, आरु सब जाती क बनेले ढुरो क नाव पाड़्यो; बाखुन आदम क लिय कोय ओको सहायक नी जोड़्यो जो हेरे सी मेळ खाय सोके। 21 ति योहोवा परमेश्वर न आदम क भारी नींदो मा सुवाड़ देदो, आरु जोत्यार हुयो सुय गोयो ती हुयो ओकी एक पासळी निकाळीन हेरे जागे मास भोर देदो। 22 आरु योहोवा परमेश्वर न ओकी पासळी क जो हुयो आदम मासी निकाळ्यो हुतो, बायर बोनाय देदो; आरु आदम क पास ली आयो। 23 ती आदम न कयो, हिमी यी मारु हाड़की मा की हाड़की आरु मारा मास मा क मास छे; ओतरान कोरिन एरो नाव नारी होयसे, काहकी यी नर मासी निकवली गोयली छे। (उत्पत्ति 29:14, 2 शामुएल 5:1, 1 कुरिन्थियो 11:8, 1 तिमु, 2:13) 24 इने रिते मानुस आसी बासाक छुड़ीन आपसी घोरवाळी सी मिलीन रोहसे, आरु हुये एकुत डील बोनला रोहसे। (मत्ती 19:5, 1 कुरि. 6:16, इफि. 5:31) 25 आदम आरु ओकी घोरवाळी दुयु नांगा होता, बाखुन लाजवायता नी होता।