उत्पत्ति 35

याकुब क बेतेल मा पोछो आवनो

1 ती परमेश्वर न याकुब सी कयो, "या सी निकोळीन बेतेल क जा, आरु होयात रोव; आरु हुँया परमेश्वर क लिय वेदी बोनाव, जु तुखे दर्शन आप्यो, जोत्यार तु आपसा भाईस एसाव क बिक सी ढासतो हुयो।" 2 ती याकुब न आपसा घोराना सी, आरु हुये बी जे हेरे पुठी हुता, कोया, "तुमरे विच मा जु पारकु देवता छे, हेना निकाल नाखु; आरु आपसा-आपसा क चुखा कोरु, आरु आपसा छिंदरा बोदली लेवु; 3 आरु आवु, आपनु याँ सी निकोळीन बेतेल क जाजे; होंया हांव परमेश्वर क लिय एक वेदी बोनाविस, जु वेला क दाहड़ा मा मारी सोमवलु, आरु जेने वाट्ये सि हांव चालतु होतु, तेरेमा मारे साते रोयु।" 4 ओतरान कोरिन जोतरा पारका देवता हेंदरे जुळ होता; आरु कुण्डल हेन्दरा कान्टा मा होता, हेनु सब क हुये याकुब क आप्या; आरु हुयो हेनु तेरो बांज झाड़ क नेचो, जो शेकेम क पास मा छे, गाड़ देदा। 5 ती हुये कुच कोर्या; आरु हेन्दरे‍ च्यारु मेर क नगर मा रोहन्या क मन मा परमेश्वर क भीनी दी ओसो बिक सोमाय गोयो, कि हुये याकुब क पुर्या क पोछोळ नी पोड़्या। 6 याकुब हेनु आखा भेळ, जो हेरे पुठी हुता, कनान देश क लुज नगर क आया। चो नगर बेतेल वी कोवाये। 7 होंया हुयो एक वेदी बोनायो, आरु हेना जागा क नाव एल बेतेल पाड़्यो; काहकी जोत्यार हुयो आपसा भाईस क बिक सी ढास जातलु ती परमेश्वर हेर पोर प्रगट होयलु। 8 आरु रिबका क दुध पाळनेवाळी दाई दबोरा मोर गोय, आरु बेतेल क बांज झाड़ क नेचो हेनीक गाड़ देदा, आरु हेना बांज झाड़ क नाव अल्लोनबक्कुत पाड़्या। 9 ओळतेन याकुब क पद्दनराम सी आवने क वाद परमेश्वर न दुसरी वार ओको दर्शन आपीन बोरकोत आप्यो। 10 आरु परमेश्वर न हेनासी कोयो, हिमी लोगुन ते तेरो नाव याकुब रोहलो छे; बाखुन ओगो क तेरो नाव याकुब नी रोहसे, तु इस्राएल कोवाईस। ओस कोरीन हुयो हेरो नाव इस्राएल पाड़्या। 11 ओळतेन परमेश्वर न हेना सी कोयो, "हांव सर्वशक्तिमान परमेश्वर छे। तु फुले फले आरु वोदे; आरु तार सी एक जाति बाखुन जातिन एक माण्डळी वी पोयदा होयसे, आरु तारी ओवलियाद मा राजा पोयदा होयसे। 12 आरु जु देश हांव अब्राहम आरु इसाहक क आपलो छे, चो देश तुसेक आपो, आरु तारे पोछोल तारी ओवलियाद क वी आपीस।" 13 ती परमेश्वर हेना जागा मा, जा हुयो याकुब सी वात कोर्‌यो, ओका पास सी उपोर चोढ़ गोयो। 14 आरु जेना जागा मा परमेश्वर न याकुब सी वात कोर्‌यो, चाँ याकुब न दोगड़ा क एक खाम्बो उबो कोर्‌यो, आरु हेर पोर अर्घ तेल नाख देदो। 15 जाँ परमेश्वर न याकुब सी वात कोर्‌यो, हेना जागा क नाव हुयो बेतेल पाड़्यो।

राहेल न मौत

16 ओळतेन हुये बेतेल दी कुच कोर्या; आरु एप्रात थुड़ेत नांबे रोय गोया हुता कि राहेल क पुर्य क जनने क घोनी पीड़ा लागी। 17 जोत्यार हेनीक मोटी मोटी पीड़ा होयतली ती दाई न हेरेसी कोहि, "मा बिहये; हेमी वी तारु पुर्युत होयसे।" 18 ती ओसो होयो कि हुयी मोर गोय, आरु जिव निकोळता निकोळतात् हुये हेना पुर्या क नाव बेनोनी पाड़्या; बाखुन हेरा बाबा न हेरे नाव बिन्यामीन पाड्या। 19 यो राहेल मोर गोय, आरु एप्रात, यानी बैतलहम क वाट मा, ओको गाड़ देदा। 20 आरु याकुब न ओको कबर पोर एक खाम्बो उबो कोर्‌यो: राहेल क बिड़ा क हुयो खाम्बो आज लोगुन बोनलो छे। 21 ओळतेन इस्राएल न कुच कोर्‌यो, आरु एदेर नावोन गुम्मट क ओगा बोड़ीन आपसो तंबु उबो कोर्‌यो।

याकुब क पुर्या

22 जोत्यार इस्राएल हेना देश मा वोसलु होतु, ती एक दाहड़े ओसो हुयो की रुबेन न जाईन आपसा बाबा की रखेल बिल्हा क सात कुकर्म कोर्‌यो; आरु यी वात इस्राएल क मालुम होय गोय। याकुब क बारे पुर्या होया। 23 हेनामासी लिआ क पुर्या ये हुता; यानी याकुब क जेठा, रुबेन, ओळतेन शिमोन, लेवी, यहुदा, इस्साकार, आरु जबुलुन। 24 आरु राहेल क पुर्या ये हुता; यानि युसुफ, आरु बिन्यामीन। 25 आरु राहेल क दासी बिल्हा क पुर्या ये हुता; यानी दान, आरु नप्ताली। 26 आरु लिआ क दासी जिल्पा क पुर्या ये हुता; यानी गाद, आरु आशेर। याकुब क येत पुर्या होया, जे हेनासी पद्दनराम मा पोयदा होया।

इसहाक क मौत

27 आरु याकुब मम्रे मा, जे किरयतरबा, यानी हेब्रोन छे, जाँ अब्राहम आरु इसहाक पारकु होईन रोहलु होतु, आपसा बाबा क पास आयो। (इब्रा 11:9) 28 इसहाक क उमोर एक सोव चार विस क होय गोयो। 29 आरु इसहाक क जिव छुट गोयो, आरु हुयो मोर गोयो, आरु हुयो डावो आरु पुरी उमोर क होईन आपसा मानसो मा जाय मेळ्यु; आरु ओका पुर्या एसाव आरु याकुब न ओको धुळु आप्या।