1 ओळी लाबान क पुर्या कि यी वाते याकुब क सोमळने मा आवी, "याकुब न आपना बाबा क आखो काहिय हापकी लेदलो छे, आरु आपनु बाबा क धोन क लिय ओकी यी ठाट बाट छे।" 2 आरु याकुब न लाबान क मुय पोर निगाह कोर्या आरु ताड़ देदा कि हुये ओका जोसा पेहले क जोसा नि छे। 3 ति योहोवा न याकुब सी कयो, आपसा बाबा क देश आरु तारी पोयदावारीन जागा क जात तोह, आरु हांव तारे साते रोहीस। 4 ती याकुब राहेल आरु लिआ: क खोयड़ा मा आपसा गाडरा बुकड़ा क धोड़े बुलाविन कयो, 5 "तुमरा बाबान मुयो सी मेसे ओसो लागे की हुयो मेसे पेहले जोसो हिमी नी देखायतो; बाखुन मारा बाबान परमेश्वर मारे साते छे। 6 तुमु वी जानु की हांव तुमरा बाबान चाखरी जिव लागाड़ीन कोरलु छे। 7 ओळी वी तुमरु बाबु मारे सी छल कोरीन मारी दाहड़की क दस वार बोदली देदो; बाखुन परमेश्वर न ओको मारे नुकसान नी कोरने देदो। 8 जोत्यार हुयो ओसो कोयो, ‘चित्तीवाळा पिला तारी दाहड़की कोहायसे,’ ती आखा गाडरा बुकड़ा‍ चित्तीवाळात होयने लाग्या; आरु जोत्यार होयु कोयु, ‘धारी वाळा पिला तारी दाहड़की कोहायसे’ ति आखा गाडरा बुकड़ धारीवाळा होयने लाग्या। 9 ओस कोरीन परमेश्वर न तुमरा बाबा क ढुरोक लीन मेसे आपलु छे। 10 गाडरा बुकड़ा क गाभीन होयने क टेम हांव सोपना मा काय देख्यु कि जे बुकड़ा पोर चोढ़ने बाज रोया, चै धारीवाळा, चित्तीवाळा, आरु घब्बेवाळा छे। 11 ती परमेश्वर क दुत न सोपना मा मेसे कोयो की, ‘हे याकुब,’ हांव कोयु, काय हुकुम, 12 हुयो कयो, डुळा उचाकोरीन हेनु आखा बुकड़ा क जे बुकड़ा पोर चोढ़ाई कोर रोया देख, की हुये धारीवाळा, चित्तीवाळा, आरु धब्बावाळा छे; काहकी जे काई लाबान तार सी कोरे, चो हांव देखलु छे। 13 हांव तेना बेतेल क परमेश्वर छे, जां तु न एक खाम्बा पोर तेल नाख देदलु, आरु मारी मानता मानलु होतु। होमि चाल, एना देश सी निकोळीन आपसी पोयदावारीन जागा क जा।"

14 ती राहेल आरु लिआ: न हेनासी कोया, "काय आमरु बाबा क घोर मा हिमी वि आमरो काई हिस्सो आरु ओवलियाद वाचलो छे? 15 काय हामु ओकी निगाह मा पारका नी रोहजे? देख, हुयो ते आमुक ते वेच देदो, आरु आमरु पोयस्या खाय गोयलु छे। 16 ओतरान कोरिन परमेश्वर न आमरा बाबा क जोत्रा धोन ले लेदलौ छे, हुयो आमरो आरु आमरा पुर्या क छे; हिमी जो काहिय परमेश्वर न तुसेक कवलो छे, चोत कोर।"

17 ती याकुब न आपसा पुर्या आरु बायरा क उटड़ा पोर चोढ़ायु; 18 आरु जोतरा ढुरे क हुयो पद्दनराम मा एकठा कोर्‌यो मातभोर होय गयो हुतो, सब क कनान मा आपसा बाबा इसहाक क पास जाने क विचाय सी, साते ली गयो। 19 लाबान आपसा गाडरा क रुई कतरने क लिय जार रोयो हुतो, आरु राहेल आपसा बाबा क घोरुनदेवता क चुरीन ली गोय। 20 अत: याकुब लाबान अरामी क पास सी मोनेन जात रोयु, ओको न बताड़ियो कि हांव ढासीन जात रोहीस। 21 हुयो आपसो आखो काहिई लीन ढास्यु, आरु महानदी क पार उतरीन आपसो मुय गिलाद क बोयड़ा देश भिनी कोर्यु।

22 तीसरे दाहड़े लाबान क पोतु चाल्यो कि याकुब ढास गोयो। 23 ओतरान कोरिन हुयो आपसा भाईस क पुठी लिन ओको सात दाहड़ा लोगुन पोछोळ पोड़्यो, आरु गिलाद क बोयड़ा देश मा ओको जाईन धोर्‌यो। 24 बाखुन परमेश्वर न रात क सोपना मा अरामी लाबान क पास आविन कयो, "चोकचोयु रोव, तु याकुब सी नी ते वारु भुण्डो नी कोहजी।" 25 आरु लाबान याकुब क पास पुग गोयो। याकुब आपसा तंबु गिलाद नावोन बोयड़ा देश मा उबो कोर्यु होतु; आरु लाबान न वी आपसा भाई क सात आपसा तंबु ओकी बोयड़ा देश मा उबा कोर्या। 26 ति लाबान याकुब सी कोवने लाग्यो, "तु यो काय कोर्यु कि मारे पास सी मोनेन आत रोयु, आरु मारा पुरायटा क ओसो ली आयो, मानो तोलवार सी बोन्दी बोनाय गोयली होय? 27 तु काहा मोनेन ढास आयु, आरु मार सी विगुर काई कोहे मारे पास सी मोनेन चाली आयु; नी ते हांव तुसे खुशी क सात टुमेकड़ी (तबली) आरु झुमकु वाजाड़तु, आरु गीते गावता जाईन मुकोलता? 28 तु ते मेसे मारा पुर्या पुरायटा क गुवु लोगुन नी देदु? तु ते गाण्डाय कोरलु छे। 29 तुमु मानषो क नुकसान कोरने क शक्ति मारे हातो मा ते छे; बाखुन तुमरु बाबु परमेश्वर न मारे सी वितली रात मा कोयु, ‘चोकचोयु रोव, याकुब सी नी ते वारु कोहजी आरु नी भुण्डो।’ 30 वारु, हिमी तु आपसा बाबा क घोर क मोटा इच्छा होईन आत रोयु ति आत रोयु, बाखुन मारा देवताक तु काहा चूर लायु?" 31 याकुब न लाबान क जोपाप आप्यो, "हांव यो विचारीन बिहि गोयलु की काहमाईन तु तारा पुरायटा क मारे सी हापकी नी लेय। 32 जेरे कुदा जुळ तु मारा देवता जोड़से, जो जिवतलो नी वाचसे। मारे जुळ तारो जो काई निकोळे, चो तु भाई बोन्या क ओगोळ उवखीन ली ले।" काहकी याकुब जनतो नी हुतो कि राहेल घोरुन देवता क चूरीन लावली छे।

33 यो सोमळीन लाबान, याकुब आरु लिआ: आरु दुयो दासीयो क तंबु मा गयो; आरु काई नी जोड़्यो। ती लिआ: क तंबु मासी निकोळीन राहेल क तंबु मा गोयो। 34 राहेल ते घोरुन देवता क उटड़ा क काठी मा मेलीन तेनु पोर बोस रोहली। लाबान न ओका आखा तंबु क चावयो ते वी जोड़्यो। 35 राहेल आपसा बाबा सि कोहि, "हे मारा पोरबु; इना सी खुश नी होय की हांव तारे ओगोळ नि उठी; काहकी हांव मासिक धोरोम सी छे।" अत: तेनाक हेरने सी वी घोरुन देवता नी जोड़या। 36 ती याकुब रिसवाईन लाबान सी लोड़ायने लाग्यु, आरु कोयु, "मारु काय गुनु छे? हांव काय पाप कोर्यु की तु ओतरु रिसवाइन मार पोछोळ पोड़शयु? 37 तु जे मारो आखो सोमान चावविन देख्यु, ती तुसेक आपसा घोरोन आखो सोमान मासी काहीन जोड़्यो काय? काई जोड़्यो होय ती ओको याँ आपसा आरु मारा भाईश क ओगोळ मेक दे, आरु चे आपनु दुयो क वीच नियाव कोरे। 38 एनु वीस साल लोगुन हांव तारेन्चा रोयु; एनामा नी ते तारा गाडरा बुकड़ा क कुख पोड़्यो, आरु न तारा मेढ़ो क मास हांव कोदी नी खादु। 39 जेनुक बनेले जिवो न फाड़ नाख्यो ओको हांव तारे पास न लावतो होतो, ओकी नुकसानी हांव ही उठावतलु; चाहे दाहड़ा क चुरी जाय चाहे ती राती क, तु मारे सी माँग लेतलु। 40 मारी ते यी दशा होती कि दिसु क ते तोप आरु राती क सेळो मेसे खाय गयो; आरु निंद मारा डुळ सी ढाक जाती होती। 41 वीस साल लोगुण हांव तारे घोर मा रोयु; चोवदे साल ते हांव तारी दुय पुराय जुगु; आरु छव साल तारा गाडरा बुकड़ा क चाखरी कोर्यु; आरु तु ते मारी दाहड़की क दोस वार टाय देये। 42 मारा बाबा क परमेश्वर, अर्थात अब्राहम क परमेश्वर, जेरे बीक इसहाक वी माने, काहमाईन मारे भीनी नी होयतु ती छाचीन तु हिमी मेसे छुछे हात जाने देतु। मारो दुख आरु मारो हातो क मेहनोत क देखीन परमेश्वर न विति रात क तुसे लोड़्यो।"

43 लाबान न याकुब सी कयो, "यी पुराय ते मारीत छे, आरु ये पुर्या वी मारात छे, आरु ये गाडरा बुकड़ा वी मारात छे, आरु जो काई तुसे देखा पोड़े चो आखो मारोत छे। बाखुन हिमि मारी इनु बेटी, आरु ओकी ओवलियाद सी काय कोर सोको? 44 हिमि आव, हांव आरु तु दुयु आपसा वायदु कोरजे, आरु हुये मारे आरु तारे वीच मा वायदु कोहायसे।" 45 ती याकुब न एक दोगड़ो लिन ओको एक खांम्बो उबो कोर्‌यो। 46 ती याकुब न आपसा भाई बोन्या सी कोयो, "दोगड़ा एकठा कोरु," यो सोमळीन हुये दोगड़ा एकठा कोरिन एक ढ़ीग लागाड़या, आरु तेनात ढीगो क पास बोसीन खादा। 47 तेना ढिगोनक नाव लाबान न ते जैगर सहदुथा, बाखुन याकुब न गिलियाद पाड़्यो। 48 लाबान न कयो, "यो ढीग आज सी मारे आरु तारे वीच गोवा रोहसे," ओस कोरीन ओको नाव गिलियाद पोड़्यो, 49 आरु मिजपा वी; काहकी हुयो कयो, "जोत्यार हामु एक दिसरा सी नाम्बे रोहसु ती योहोवा मारी आरु तारी गुळाळी कोरे। 50 काहिमाईन तु मारा पुरायटा क दुख आपे, निते ओको सिवाय आरु बाई सी इयाव कोरे, ती आमरे हाते कुदु मानुस नी रोहसे; बाखुन देख, मारे तारे वीच मा परमेश्वर गोवा रोहसे।" 51 ओळी लाबान न याकुब सी कयो, "एना ढीग क देख आरु एना खाम्बा क वि देख, जिनाक हांव आपसे आरु तारे वीच मा उबो कोरलु छे। 52 यो ढीग आरु यो खाम्बो दुयु एनी वातोन गोवा रोवे कि नुकसान कोरने क विचार सी नी ते हांव एना ढीग क पोल धोड़े तारे पास जाईस, नी ते तु एन ढीग आरु एना खाम्बा क पार कोरीन मारेन्चा आवीस। 53 अब्राहम आरु नाहोर आरु हेन्दरो बाबा; तिनो क जो परमेश्वर छे, हुयोत आपनु दुयो क वीच नियाव कोरे।" ती याकुब न ओकी आन खादु जेरो बिक हेको बाबो इसहाक मानतो हुतो; 54 आरु याकुब न हेना बोयड़ा पोर मेलबलि चोढ़ायु, आरु आपसा भाई बोन्या क खाने जुगु बुलायो; ती हुयो खाईन बोयड़ा पोर रात रोया। 55 वेगोत लाबान उठ्यो, आरु आपसा बेटा बेटी क गुवा दीन आरु बोरकोत आपीन चाल पोड़यु, आरु आपसा जागा पोर आत रोयु।