Gênesis 38

यहुदा आरु तामार

1 हेनुत दाहड़ा मा ओसो हुयो की यहुदा आपसा भाई क पास सी जात रोयो, आरु हीरा नावोन एक अदुल्‌लामवासी मानुसक पास डेरो कोर्‌यो। 2 चाँ यहुदा न शुआ नावोन एक कनानी मानुसक पुराय क देख्यो; आरु ओको इयाव कोरीन ओका पास गोयो। 3 हुयी भारपाये हुयी, आरु ओको एक पुर्य होयो; आरु यहुदा न ओको नाव एर पाड़्यो। 4 आरु हुयी ओळी भारपाये हुयी, आरु ओको एक पुर्य आरु होयो; आरु ओको नाव ओनान पाड़ देदा। 5 ओळतेन हेरो एक पुर्य आरु होयो, आरु ओको नाव शेल पाड़ देदा; आरु जेने टेमे एरो जन्म हुयो हेने टेमे यहुदा कजीब मा रोहता हुता। 6 आरु यहुदा न तामार नावोन एक बायोर सी आपसा मोटला एर क इयाव कोर देदो। 7 बाखुन यहुदा क हुयो मोटलो एर योहोवा क लेखा मा दुष्ट हुतो, ओतरान कोरिन योहोवा न ओको मार देदो। 8 ती यहुदा न ओनान सी कयो, "आपसी भोजाय क पास जा, आरु ओका सात देवर क काम पुरो कोरीन आपसा भाई क लिय ओवलियाद पोयदा कोर।" 9 ओनान ते जानतो हुयो की ओवलियाद मारी कोहायसे; ओतरान कोरिन ओसो हुयो कि जोत्यार हुयो आपसी भोजाय क पास गोयो, ती हुयो नेड़ु वीर्य पाड़ीन नाश कोर्यु, जिनासी ओसो नी होये की ओको भाई क नाव सी ओवलियाद चाले। 10 यो काम ज हुयो कोर्‌यो हेनासी योहोवा खुश नु होयु आरु हुयो हेनाक वी मार देदो। 11 ती यहुदा न इनी बिक सी क काई ओसो नी होये की आपसा भाई क जोसो शेला वी मोरे, आपसी उहड़ीस तामार सी कयो, जोत्यार लोगुन मारु पुर्यु शेला सयाना नी होय जाय ती लोगुन आपसा बाबा क घोर मा रोडायलीत बोस रोह। ओतरान कोरिन तामार आपसा बाबा क घोर मा रोहने लागी। 12 घोनी टेम क वितने पोर यहुदा क घोरवाळी जी शुआ क पुराय होती, ची मोर गोय; ओळतेन यहुदा शोक क दाहड़ा वितने पोर आपसा जुड़ीदार हीरा अदुल्‌लामवासी भेळ आपसा गाडरा बुकडा क रुई कातरनेवाळा क पास तिम्नाह क गोया। 13 आरु तामार क यो खोबोर जोड़ी, "तारो सेसरो आपसा गाडरा बुकड़ा क रुई कातरावने क लिय तिम्नाह क जाने वाज रोयु।" 14 ती हुयी यो विचारीन कि शेला सयाना ते होय गोयु बाखुन हांव हेरी घोरवाळी नी होय पाय; आपसा विधवापन क पेहरोट उतारी आरु घुमतु पाँगरीन आपसा क ढाक लेदी, आरु एनेम नगर क झोपला क पास, ज तिम्नाह क वाटे मा छे, जाय बोसी। 15 जोत्यार यहुदा न ओको देख्यो, हुयो हेनीक वेश्या सोमझ्यो; काहकी हुयी आपसो मुय ढाकली होती। 16 हुयो वाटी सी हेरे भिनी फिर्यु, आरु हेनीक कोहने लाग्यु, मेसेक तारेन्चा आवने दे (काहकी ओको यो मालुम नी हुतो कि हुयी ओकी उहड़ीस छे।) आरु हुयी कोहने लागी, "काहमाइन हांव तुसेक मारे याँ आवने दीस, ती तु मेसे काय आपीस?" 17 हुयो कोयो, "हांव मारा बुकड़ा मा सी बुकड़ान एक गिदल्यो तारेन्चा मुकली दीस।" ती हुयी कोहि, "भलो हुयो मुकलने लोगु काय तु आमरे पास काहीन रेहन मेक जाईस?" 18 हुयो पुछ्यो, "हांव तारे पास काय रेहन मेक जाम?" हुयी कोहि, "आपसी मुहर, आरु बाजुबंद, आरु आपसा हातोन लाकुड़।" ती हुयो हेनीक होयि चिजे आप देदु, आरु ओका पास गोयो, आरु हुयी भारपाये होयी। 19 ती हुयी उठिन जात रोय, आरु आपसो घुमतो उतारीन आपसो विधवापन क पेहरोट ओळी पेहेर लेदी। 20 ती यहुदा न बुकड़ान गिदल्यो आपसा जुड़ीदार हेना अदुल्‌लामवासी क हात सी मुकली देदो की हुयी रेहन राखली चिजो हेनी बायोर क हात सि छुड़ाय ली आवे; बाखुन हुयी बायोर हेनाक नी मीळी। 21 ती हुयो चाँ वाळा मानशो सी पुछ्यो, "ची देवदासी जी एनेम मा वाटी क एक धोड़े बोसी होती, काँ छे?" हुये कोया, "याँ ते कुसु देवदासी नी होती।" 22 ओतरान कोरिन हुयो यहुदा क पोछो आवीन कोयो, "मेसे ची नी मीळी; आरु हेना जागा क मानसे कोया ‘ याँ ते कोय देवदासी नी होती।’" 23 ती यहुदा न कोयो, "वारु, हुयो बन्धक हेरेनचा रोहने दे, नी ते आपनु मानसे तुच्छ गिनाय जासु; देख, मेते बुकड़ा क यो गिदल्यो मुकली देदो हुतो, बाखुन हुयी तुसे नी जोड़ी।" 24 घोनाघोना तीन मोहना क वाद यहुदा क यो खोबोर जोड़ी, "तारी उहड़ीस तामार न छिनावो कोरली छे; बाखुन हुयी व्यभिचार सी भारपाये वी होय गोयली छे।" ती यहुदा न कोयो, "ओको खोयड़े ली आवु की हेनीक धोपाड़ देजे।" 25 जोत्यार हेनीद खोयड़े निकाळता होता, ती होयी, आपसा सेसराक पास यो कोय मुकली, "जेना मानसो क ये चिजे छे, हेना सी हांव भारपाये छे," ओळी हुयी यो वी कोवाड़ी, "उवोख ते खोरु की यी मुहर, आरु बाजुबंद, आरु लाकड़ी कुनीन छे।" 26 यहुदा न हेनुक उळखीन कोयु, "हुयी ते मारसी कम गुनावी छे; काहकी हांव हेरे मारा पुर्या शेला सी इयाव नी कोर्यु।" आरु हुयो हेरेसी ओळी कोदी प्रसंग नी कोर्यु। 27 जब हेरो फोवरि होयने क टेम आवी, ती यो जान पोड़्यो की हेरा पेटो मा जोवया पुर्या छे। 28 आरु जब हुयी फोवरी होयने लाती ती एक पुर्या क हात खोयड़े आयो, आरु दाई न रातला सुत लीन हेरा हातो मा यो कोवती जाईन बाँद देदी, "पेहेल यु पोयदा होयु।" 29 जब हुयी हात सेमटी लेदी, ती हेरु भाईस पोरदा होय गोयु, ती होयी दाई न कोहि, "तु काहा बरबस निकोळी आवलु छे?" एका लिय ओको नाव पेरेस राख देदा। 30 पोछोळ ओको भाई जेरा हात मा रातलो सुत बान्दलो हुतो पोयदा हुयो, आरु ओको नाव जेरह राख देदा।