Gênesis 45

युसुफ क आपसा क प्रगट कोरनो

1 ती युसुफ हेनु सब क ओगोळ, जे हेरे आड़े धोड़े उबला होता, आपसा क आरु रुक नी सोक्यो; आरु आयड़ीन कोयो, "मारा आड़े धोड़े सी सब मानषो क खोयड़े कोर देवु।" भाष्यो क ओगोळ आपसा क प्रगट कोरने क टेमे युसुफ क सात आरु कोय नी रोयो। 2 ती हुयो जुरेत रोड़ने लाग्यो; आरु मिसरि मानुस सोमळ्या, आरु फिरोन क घोर क मानषो क वी एरी खोबोर मिळी। 3 ती युसुफ आपसा भाष्यो सी कोहने लाग्यु, "हांव युसुफ छे, काय मारु बाबु हाँजु लोग जिवतलु छे?" एरो जोपाप हेरा भाई नी आप सोक्या; काहकी हुये घाबराय गुया होता। 4 ओळी युसुफ न आपसा भाष्यो सी कोयो, "मारे धोड़े आवु।" यो सोमळीन हुये धोड़े गोया। ओळी हुये कोया, "हांव तुमरु भाईस युसुफ छे, जेनाक तुमु मिसर आवनेवाळा वेपारीन हात वेच देदाला। (प्रेरि. 7:9) 5 हिमी तुमु मानुस मा पोछतायु, आरु तुमु जो मेसे याँ वेच देदा, एरेसे उदास मा होयु; काहकी परमेश्वर न तुमरा जीवोक वाचाड़ने क लिय मेसे तुमरे ओगोळ मुकोल देदलो छे (प्रेरि. 7:15) 6 काहकी हिमी दुय साल सी एना देश मा काव छे; आरु हिमी पाच साल आरु ओसोत होयसे कि हेरेमा नी ते होळ चालसे आरु नी धान काटयसे। (प्रेरि. 7:15) 7 ओतरान कोरिन परमेश्वर न मेसे तुमसे ओगोळ एकाजलिय मुकेलो की तुमु कोळी पोर जिवतला रोहु, आरु तुमरा जिवो क वाचड़ने सी तुमरो ओवलियाद वोदे। 8 इने रिते हिमी मेसेक याँ सारतीक मुकलन्या तुमु नी, परमेश्वर कोहायसे; आरु हुयोत मेसे फिरोन क बाबा सारको, आरु आखा मिसर देश क पोरबु बोनाय देदलु छे। 9 एने: तावनी सी मारा बाबा क पास जाईन कोहु, तारु पुर्यु युसुफ ओस कोरीन कोहे छे, के परमेश्वर न मेसे आखा मिसर क स्वामी बोनायो छे; ओतरान कोरिन तु मारा पास विगु वार लागाड़्ये चाली आव। (प्रेरि. 7:14) 10 आरु तारा निवास गोशेन देश मा होयसे, आरु तु, पुर्या, पोता, गाडरा बुकड़ा, गाय बुईल, आरु आपसो आखो काई भेळ मेसे धोड़े रोहसे। 11 आरु काव क जे पाच साल आरु होयसे, हेरेमा हांव होयाँत पालन पोषण कोरीस; ओसो नी हय की तु, आरु तारो घोराना, वरन् जोतरा तारा छे, चे भुकला मोरे (प्रेरि. 7:14) 12 आरु तुमु आपसा डुळा सी देख रोया, आरु मारा भाईष बिन्यामीन वी आपसा डुऴा सी देखतो छे की जो आमरे सी वात कर रोया छे चो युसुफ छे। 13 तुमु मारा सब ठाट बाट, को मिसर मा छे आरु जो काई तुमु न देख्यो छे, हेनु सब क मारा बाबा सी वात कोरजु; आरु तुरन्त मारा बाबाक याँ लीन आवु।" 14 आरु हुयो आपसा भाई बिन्यामीन क गोळे सी लिपटाईन रोड़्यु; आरु बिन्यामीन वी ओको गळे सि लिपटाईन रोड़्यु। 15 हुयो आपसा सब भाई क चुमीन रोड्यु आरु एरे वाद ओका भाई हेरेसी वात कोरने लागे। 16 एनी वात क खोबोर क युसुफ क भाई आवला छे, फिरोन क भवन लोगुन पुग गोय, आरु एरेसे फिरोन हेरा कामकोरन्या घोना खुश होय गया (प्रेरि. 7:13) 17 ओतरान कोरिन फिरोन न युसुफ सि कोयो, "आपसा भाष्यो सी कोह की एक काम कोरु; आपसा ढुरो क लादीन कनान देश मा जात रोहु। 18 आरु आपसा बाबा आरु आपसा-आपसा घोर क मानशो क लिन मारे पास आवु; आरु मिसर देश मा जो काई वारु सी वारु छे चो मे तुमुक आपीस, आरु तुमरा देश क वारु सी वारी खानो खाने क मिळ्से। (प्रेरि. 7:14) 19 आरु तुसे हुकुम मिळी चे, तुमु एक काम कोरु कि मिसर देश सी आपसा बाळ बोच्‌चा आरु बायरा क लिय गाड़ीया ली जावु, आरु आपसा बाबा क ली आवु। (प्रेरि 7:14) 20 आरु आपसो सोमान क फिकुन झुण कोरता; काहकी आखा मिसर देश मा जो काई वारु सि वारु छे चो तुमरो छे" 21 इस्राएल क पुर्या न ओसोत कोर्या; आरु युसुफ न फिरोन क हुकुम क ओनसारे हेनुक गाड़ीया आप देदु, आरु वाट्ये क लिय खानेन चिजे वी आप्यु। 22 हेरेमा सी एक एक जोना क ते हुयो एक एक जुड़ी छिन्दरा वी आप्यो; आरु बिन्यामीन क तीन सोव चाँदीन सिक्का आरु पाच जुड़ी छिन्दरा आप्यो। 23 आपसा बाबा क पास हुयो जु ली मुकेल्लो चो यो छे, यानी मिसर क वारु चीजे सि भोरीन दोस गोदड़ा, आरु ओन आरु रुटा आरु हेरे बाबा क वाट्ये क लिय खानेन चीजे सी भोरीन दोस गोदडी। 24 ती हुये आपसा भाष्यो क मुकल्यो, आरु हुये चाल देदा; आरु हुये हेनाक कोया, "वाट्ये काँखेर झुणी लोड़ायता।" 25 मिसर सी चालिन हुये कनान देश मा आपसा बाबा याकुब क पास पुग्या। 26 आरु हेरेसे यी आखी वात कोर्या, "युसुफ हाँजु लोगुन जिवतलु छे, आरु आखा मिसर देश पोर राज हुयोत कोरे छे।" बाखुन हुयो हेन्दरे पोर विश्वास नी कोर्‌यो, आरु हुयो सन्न रोय गुयो। 27 ती हुयो आपसा बाबा याकुब सी युसुफ क आखी वाते, जी हुयो हेनाक कोहने कोहलु, कोय देद; जब हुयो हेनी गाड़ीया क देख्यो, जो युसुफ न हेनाक ली आवने क लिय मुकेललो होती, ती ओका मनक शांती मिळी। 28 आरु इस्राएल न कोयो "बस, मारु पुर्यु युसुफ हिमी वी जिवतलु छे; हांव मारे मोरने सी पेहेल जाईन हेनाक देख लिस।"