उत्पत्ति 47

7 ती युसुफ न आपसा बाबा याकुब क ली आवीन फिरोन क ओगोळ उबो कोर्‌यो; आरु याकुब न फिरोन क बोरकोत आप्या। 8 ती फिरोन न याकुब सी पुछ्यो, "तारी उमोर कोतरा दाहड़ान होयली छे?" 9 याकुब न फिरोन सी कोयो, "हांव ते एक सोव तीस साल पारका होईन आपसो जीवन विताड़ चुकलो छे; मारा जीवन क दाहड़ा थुड़ा आरु दुख सी भोरायला वी होयला हुता, आरु मारा डाहडा पारका होईन जोतरा दाहड़ा लोगुन जिवतला रोया तोतर दाहड़ा क म्हारा हिमि नी होयो।" 10 आरु याकुब फिरोन क बोरकोत आपीन ओका ओगोळ सी जात रोयो। 11 ती युसुफ न आपसा बाबा आरु भाश्यो क बसाड़ देदो, आरु फिरोन क हुकुम क ओनसारे मिसर देश क वारु सी वारु वाटा मा, यानी रामसेस नावोन प्रदेश मा, जागु आपीन ओको सोप देदा। 12 आरु युसुफ आपसा बाबा क, आरु आपसा भाष्यो क आरु बाबा क आखा घोराना क, एक एक क बाळ पुर्या क गिनती क ओनसारे, ओन आपीन ओको पाळन पोषण कोरने लाग्या।