1 उके टेमे योहोसु रुबेनिया, गादिया, आरु मनश्शेक आदा गोत्रियाक बुलावीन कयो, 2 "जी जी हुकुम तुमु मानला छे, आरु जी जी हुकुम मुसा काजे योहोवा तुमुक आपली छे उना सभाक भी तुमु मानला छे; 3 तुमु आपना भाईसक ओतरा दाहड़ा मा आज क दाहड़े तक नी छुड़्या, पुन आपना परमेश्वर योहोवा क हुकुम तुमु चोकसी सी मानी छे। 4 आरु हिमी तुमरो परमेश्वर योहोवा तुमरा भाईसक आपना वचनक अनसारे आराम देदा छे; एरकरता हिमी तुमु वापस फिरीन आपना आपना डेराक, आरु आपनी निजी धरती मा, जेका योहोवाक दास मुसा यरदन पार तुमुक आप्या छे, जात रयु। 5 केवल ओका वात क पुरी चोकसी करनु कि जी जी हुकुम आरु व्यवस्था योहोवा क दास मुसु तुमुक आपी छे ओकाह मानीन आपना परमेश्वर योहोवा सी मोंग राखु, ओका सब मार्ग पर चालु, ओकान हुकुम मानु, उकान भक्ति मा लवलीन रयु, आरु आपना सब मन आरु सब प्राण सी ओकान सेवा करु।" 6 तव योहोसु हेका सय बरकत आपीन वाट लागाड्या आरु चा आपना आपना डेरा पर जात रया।

7 मनश्शे क आदा गोत्रियाक मुसु बासान मा भाग देदो हतो; पुन दिसरा आदा गोत्राक योहोसु ओका भाईसक वीच मा यरदनक पश्चिमक तरफ भाग देदा। ओकाह जव योहोसु सोयाव्वु कोविन वाट लागाड़्या कि आपना आपना डेरा मा जाऊ, 8 तव उनाक भी सय बरकत आपीन कया, "बैस सी पशु, आरु चाँदी, हुनो, पीतवन, लोखंडो, आरु बैस सी छिंदरा, आरु बैस धन-सम्पत्ति लीन आपना आपना पेरा पर जात रयु; आरु आपना दुश्मनक लुटक सम्पत्ति क आपना भाईसक साथे वाट लेजु।"

9 तव रुबेनी, गादि, आरु मनश्शे क आदा गोत्रि इसराएलीयाक जु सी, मतलब कनान देश क शीला नगर सी, आपनी गिलाद नावन निजी धरती मा, जी मुसान द्वारा आपी गई योहोवा क हुकुमोन अनसारे उकान निजी धरती होय गई हती, जानेन विचार सी वापस फिर गया।

10 जव रुबेनी, गादि, आरु मनश्शे क आदा गोत्रि यरदनक उका तराई मा पुग्या जा कनान देश मा छे, तव हेका चा देखने योग्य एक मोटली वेदी बनाई। 11 आरु ओका खबर इसराएलीयाक सोमवने मा आयो, कि रुबेनियो, गादियो, आरु मनश्शेक आदा गोत्रियोन कनान देशक सामने यरदनक तराई मा, मतलब ओकान उका पार जा इसराएलीयाक छे, एक वेदी बनाई छे।

12 जव इसराएलीया यो सोमव्या, तव इसराएलीयाक सब मण्डली ओका सी लड़नेक करता चढ़ाई करनेक करता शीलो मा एकठा होया।

13 तव इसराएलीया रुबेनियो, गोदिया, आरु मनश्शेक आदा गोत्रियाक जु गिलाद देश मा एलीयाजर याजकक पोर्‍यो पीनहासक, 14 आरु ओका साथे दस प्रधानोक, मतलब इस्राएलक एक एक गोत्रा मा सी पुर्वजक एक एक प्रधानक मोकल्या, आरु चा इस्राएलक हजारो मा आपना आपना पुर्वजक घरानाक मुखी मानुस हतो। 15 चा गिलाद देश मा रुबेनिया, गादिया, आरु मनश्शेक आदा गोत्रियाक जु जाईन कयने लाग्या, 16 ✝"योहोवा क सब मण्डली यो कयती छे, ‘तुमु इस्राएलन परमेश्वर योहोवाक यो कोसो विश्वासघात कर्‌या; आज जो तुमु एक वेदी बनाव लेदा छे, ओका मा तुमु ओकान पछव चालनेक छुड़ीन ओकान विरुद आज बलवा कर्‌या छे? 17 ✝सोमवु पोरक विषयक ओधोरोम आमरे करता जुरुक कम हतो, यद्यापि योहोवाक मण्डलीक भारी दण्ड जोड़े तेभी आजुन दाहड़े आमु ओका ओधोरोम सी चुखा नी होया; काय चो तुमरी नजर मा एक नानी वात छे 18 कि आज तुमु योहोवाक त्यागीन ओकान पछव चालमनु छुड़ देन्या छे? आज तुमु योहोवा सी पछा जाता होसे, आरु काल चा इस्राएलक सब मण्डली सी क्रोधित होसे। 19 पुण दाम तुमरो सतान जागो विटोळ हय ती पार आवीन भगवानन खास जागा मा जाँ सारी भगवान रये हामरे वीच मा तुमरो सतान जागो कर लेयो पुण हामरा योहोवा परमेश्वर वेदी क छुड़ीन कोय दिसरी वेदी बनावीन हेको विरुध्द मा झुन जाता आरु नी ते हामरे विरुद मा। 20 देखु, जव जेरह क पोर्‍यो आकान अर्पण करली चीजक विषय मा विश्वासघात कर्‌या, तव काय योहोवाक कोप इस्राएलक पुरी मण्डली पर नी भड़क्यो? आरु ओका मानुसक धर्मक प्राण डोन एखलाक ओकाक नी जोड्या।’"

21 तव रुबेनिया, गादियो, आरु मनश्शेक आदा गोत्रिया इस्राएलक हजारोक मुखी लोगहनक यो जवाब देदो, 22 "योहोवा परमेश्वर आखा सी जुर भरीयो ताकत वाळो छे, त्यो भगवानुत जाने, आरु इसराएली भी ओका जान लेसे कि कदाम योहोवा सी फिरके या ओकान विश्वासघात करीन आमु यो काम कर्‌या होसे, ते तु आज आमुक जीवतु नी छुड़े, 23 कदाम आज क दाहड़े आमु नी वेदीक एरकरता बनाया होसे कि योहोवाक पछव चालनु छुड़ देजे, या एरकरता कि ओका पर होमबली, अन्नबली, या मेलबलि चढ़ाया, ते योहोवा आप हेरो हिसाब लेसे; 24 पुन आमु ओका विचार आरु मनसा सी यो कर्‌या छे के भविष्य मा तुमरी सन्तान आमरी सन्तान सी यो नी कयने लागे, ‘तुमुक इस्राएलक परमेश्वर योहोवा सी काय काम? 25 काहकी, हे रुबेनियो, हे गादियो, योहोवा जो आमरे आरु तुमरे वीच मा यरदनक सीमा ठराय देदो छे, एरकरता योहोवा मा तुमरा एक भी भाग नी छे।’ ओसो कोईन तुमरी सन्तान आमरी सन्तान मा सी योहोवाक बीक छुड़ाय देसे। 26 एरकरता आमु कया, ‘आवु, आमु आपने करता एक वेदी बनाव लेवु, चा होमबली या मेलबलिन बादा न करता नी, 27 पुन एरकरता कि आमरा आरु तुमरा, आरु आमरा बाद आमरा आरु तुमरा ओवलियादक वीच मा साक्षीन काम आप; एरकरता कि आमु होमबली, मेलबलि, आरु बादा चढ़ावीन योहोवाक सामने ओकान उपासना करे; आरु भविष्य मा तुमरी सन्तान आमरी सी यो नी कयनु जुवे, कि योहोवा मा तुमरो कुई भाग नी।’ 28 एरकरता आमु कया, ‘जव चा लोगहन भविष्य मा आमु सी या आमरा ओवलियाद सी यो कयने लाग्या, तव आमु उना सी कयसु, कि योहोवाक वेदीक नमुना पर बवनी होई ओका वेदीक देखु, जेका आमरा डाहला होमबली या मेलबलिक बादा न करता नी बनाया; पुन एरकरता बनाया हता कि आमरे आरु तुमरे वीच मा साक्षीक काम आप।’ 29 यो आमु सी छेठा रया कि योहोवा सी फिरीन आज ओकान पछव चालनु छुड़ दे, आरु आपनु परमेश्वर योहोवाक ओका वेदीक छुड़ावीन जो ओकान निवासक सामने छे होमबली, आरु अन्नबलि, या मेलबलिन बादान करता दिसरी वेदी बनाया।"

30 रुबेनियो, गादियो, आरु मनश्शेक आदा गोत्रियाक इनी वातक सोमवीन पीनहास याजक आरु ओकान साथे मण्डलीक प्रधान, जो इस्राएलक हजारो मुखी मानसे हता, चा बैस खुश होया। 31 आरु एलीयाजर याजकक पोर्‍यो पीनहास रुबेनियो, गादियो, आरु मनश्शेइयो सी कया, "तुमु जो योहोवाक ओसो विश्वासघात नी कर्‌या, ओका सी आज आमु यो जान लेदा कि योहोवा आमरे वीच मा छे: तुमु लोगहन इसराएलीयाक योहोवाक हाथ सी वाचाड्या छे।" 32 तव एलीयाजर याजकक पोर्‍यो पीनहास प्रधान समेत रुबेनियो, आरु गादियोक, जु सी गिलाद होयता कनान देश मा इसराएलीयाक जु वापस गया: आरु यो वृतान्त उनाक कय सोमवाड्या। 33 तव इसराएली खुश होया: आरु परमेश्वरक सोयाव्वु कया, आरु रुबेनियो, आरु गादियो, सी लड़ने आरु उनाक रयनेक देश उजाड़नेक करता चढ़ाई करनेक चर्चा पछी नी करी। 34 आरु रुबेनियो, आरु गादियो, यो कोईन, "यी वेदी आमरे आरु उनाक वीचमा ओका वातक साक्षी ठरी छे, कि योहोवाज परमेश्वर छे;" ओकी वेदीक नाव एद मेक्या।