1 पछा योहोसु इस्राएलक सब गोत्राक शकेम मा इकट्ठा कर्‌या, आरु इस्राएलक दाहला लोगहन आरु मुखी लोगहन, आरु न्यायियो, आरु सरदारक बुलवाया; आरु चा परमेश्वरन सामने हजर होया। 2 ✝24:2 उत्पत्ति 11:27तव योहोसु उना सब लोगहन सी कया, "इस्राएलक परमेश्वर योहोवा ओका प्रकार कयता छे, ‘प्राचीन काल मा अब्राहम आरु नाहोरक बास तेरह आदि, तुमरा पुरखा परात महानदक ओका पर रयता रयता दिसरा देवताक विनता करता हता। 3 ✝24:3 उत्पत्ति 12:1-9आरु हाव तुमरे खास अबराहम महानदक उका पार सी ली आवीन कनान देशक सब स्थान मा फिराया, आरु ओकान ओवलियाद बढ़ाया। आरु ओका इसहाको आप्या; 4 ✝24:4 उत्पत्ति 25:24-26; 36:8; व्यवस्थाविवरण 2:5; उत्पत्ति 46:1-7पछा हाव इसहाको याकुब आरु एसावक आप्या। आरु एसावक हाव सेईर नावन पहाड़ी देश आप्या के चा ओकान हक होसे, पुन याकुब बेटो-नातन्यो समेत मिसरक गया। 5 ✝24:5 निर्गमन 3:1-12 पछा हाव मुसा आरु हारुन मुकलीन उना सब कामोक द्वारा जो हाव मिसर मा कर्‌या, उका देशक मारा; आरु ओकान बाद तुमुक निकाळ लाया। 6 ✝24:6 निर्गमन 14:1-31 आरु हाव तुमरे डाहलाक मिसर मा सी निकाळ लाया, आरु तुमु दरियाक पुग्या; आरु मिसरिया रथ आरु सवारोक साथे लीन लाल दरिया तक तुमरा पीछा कर्‌या। 7 आरु जव तुमु योहोवाक दोहाई आपी तव ओकान तुमरे आरु मिसरियाक वीच मा अन्धियारा कर देदा, आरु उना पर दरियाक वयाडीन उनाक डुबाड़ देदा; आरु जो काहय हाव मिसर मा कर्‌या उका तुमु बैस लोगहन आपनी डुवा सी देख्या; पछा तुमु बैस दाहड़े जंगल मा रया। 8 ✝24:8 गिनती 21:21-35तव हाव तुमुक उना एमोरियाक देश मा ली आया, जो यरदन उका पार बठला हता; आरु चा तुमु सी लड़े, आरु हाव हेके तुमरे ओवलियाद मा कर देदा, आरु तुमु उनाक देशक आधिकारी होय गया, आरु हाव उनाक तुमु सामने सी सत्यानाश कर न्हाख्या। 9 ✝24:9 गिनती 22:24-25पछा मोआबक राजा सिप्पोरक पोर्‍याक बालाक उठावीन इस्राएल सी लड़ा; आरु तुमुक शाप देनेक करता बोर क पोर्‍या बिलामक बुलावने मुकल्यो, 10 पुन हाव बिलामक नी सोमव्यु; चा तुमुक बरकत आपता गया; ओका प्रकार हाव तुमुक ओकान हाथ सी वाचाड्या। 11 तव तुमु यरदन पार होईन योरीहोक जु आया, आरु जव योरीहोक मानुसे, आरु एमोरी, परिज्जी, कनानी, हित्ती, गिर्गाशी, हिब्बी, आरु यबुसी तुमु सी लड्या, तव हाव हेका तुमरा वश मा कर देदा। 12 ✝24:12 निर्गमन 23:28; व्यवस्थाविवरण 7:20आरु हाव तुमरे ओगव गेंडरा क मुकल्या, आरु हेकान एमोरियान दुयु राजा तुमरे सामने सी डास्या; देखु, यी तुमरी तलवार या धोंदलीक काम नी होयो। 13 ✝24:13 व्यवस्थाविवरण 6:10-11पछा हाव तुमुक ओसा देश आप्या जेका हाव तुमु मेहनत नी कर्या हता, आरु ओसो नगर भी देदा छे जेका तुमु नी बठाड्या हता, आरु तुमु ओकामा बठला होसे; आरु जीन दाखरस आरु जैतुनन बगीचाक फोवक फोव तुमु खाता होसे हेका तुमु नी लागाड्या हता।’

14 "एरकरता हिमी योहोवा परमेश्वरन बीक मानीन ओकान सेवा छाचाय आरु सच्चाई सी करु; आरु जिन देवताक सेवा तुमरा पुरखा महानदक उका पार आरु मिसर मा करता हता, हेका छेठा करीन योहोवाक सेवा करु। 15 आरु कदाम योहोवा परमेश्वरन सेवा करनु तुमुक बुरो लागे, ते आज नेवाळ लेवु कुनीन सेवा कर हत, चाहे उना देवताक जिनाक सेवा तुमरा पोरखा महानदक उका पार करता हता, आरु चाहे एमोरियाक देवतान सेवा करु जिनाक देश मा तुमु रयता होसे; पुन हाव ते आपना घराना समेत योहोवान सेवा नित करीस।"

16 तब लोगहन जवाब देदा, "योहोवा परमेश्वर क त्यागीन दिसरा देवतान सेवा करनु आमु सी छेठा रयु; 17 काहकी आमरु परमेश्वर योहोवा चा छे जु आमुक आरु आमरे पुरखाक दासत्वक घर, मतलब मिसर देश सी निकाळ ली आया, आरु आमरा देखता देखता मोटला मोटला विछेळीयो काम कर्‌या, आरु जेकि वाट पर आरु जोतरी जातियाक वीच मा सी आमु चालीन आवता हता ओका सी आमरी रक्षा; 18 आरु आमरे सामने सी ओका देश मा रयनेवाळा एमोरी कदाम सब जातियाक निकाळ देदा छे; एरकरता आमु भी योहोवाक सेवा करसु, काहकी आमरो परमेश्वर चो छे।"

19 योहोसु लोगहन सी कयो, "तुमु सी योहोवाक सेवा नी होय सकती; काहकी चो पवित्र परमेश्वर छे; चो जलन राखनेवाळो ईश्वर छे; चो तुमरो आपराध आरु पाप सोमा नी करसे। 20 कदाम तुमु योहोवाक त्यागिन देवतान सेवा करने लागसे, ते यद्यपि चा तुमरो भलो करता आयो छे तेभी चा फिरीन तुमरो नुकसान करसे, आरु तुमरो नास भी कर न्हाखसे।" 21 लोगहन योहोसु सी कया, "नी; आमु योहोवान सेवा करसु।" 22 योहोसु लोगहन सी कयो, "तुमु आपसुज आपना साक्षी होयु कि तुमु योहोवान सेवा करनु नेवाळ लेदा छे।" हेका कया, "होव, आमु साक्षी छे।" 23 योहोसु कयो, "आपने वीच मा सी पराया देवताक छेठा करीन आपना आपना मन इस्राएलक परमेश्वर योहोवाक तरफ लागाडु।" 24 लोगहन योहोसु सी कया, "आमु ते आपना परमेश्वर योहोवाक सेवा करसु, आरु ओकान वात मानसु।" 25 तव योहोसु उके दाहड़े उना लोगहन सी वाचा बांधाड्या, आरु शकेम मा ओकान करता विधि आरु नियम ठराया।

26 यो सब वृतान्त योहोसु परमेश्वरक व्यवस्थाक किपात मा लिख देदा; आरु एक मोटलो दगडो नेवाळीन चा ओका बांज झाड़कान नेड़ो उबो कर्‍यो, जो योहोवान पवित्रस्थान मा हतो। 27 तव योहोसु सब लोगहन सी कयो, "सोमवु, यो दगड़ु आमु लोगहनक साक्षी रवसु, काहकी जोतरा वचन योहोवा आमु सी कया छे हेका यो सोमव्यो छे; एरकरता यो तुमरा साक्षी रवसे, ओसो नी होए कि तुमु आपना परमेश्वर सी मुकर जावु।" 28 तव योहोसु लोगहनक आपना आपना निज भाग पर जानेम करता वाग लागाड्या।

29 इनी वातन बाद योहोवाक दास, नुनन पोर्‍यो योहोसु, एक सोव दस सालन होईन मर गयो। 30 आरु ओकाह तिम्नत्सेरह मा, जु एपरेम क पहाड़ी देश मा गाश नावन पहाड़क उत्तर मा छे, उकान भाग मा धुवो आप गया।

31 योहोसु क जीवन भर, आरु जा डाहला लोगहनक योहोसुक मरनेक बाद जीविता रया आरु जानता हता कि योहोवा इस्राएलक करता कोसा कोसा काम कर्‌या हता, ओकान भी जीवन इसराएली योहोवाक सेवा करता रया।

32 पछु युसुफन हाड़का जेका इसराएली मिसर सी ली आया हता चा शकेमक धरतीक ओका भाग मा गाड़ी गई, जेका याकुब शकेमक बास हमोर पोर्‍या सी एक सोव चांदीक सिक्का मा मोल लेदा हता; एरकरता चु युसुफन सन्तानक निज भाग होय गयो। 33 हारुनक पोर्‍यो एलीयाजर भी मर गयो; आरु ओकान एपरेमक पहाड़ी देश मा ओका पहाड़ी पर धुवो आपी गई, जी ओकान पीनहासक नाव पर गिबत्पीनहास कयाड़ती छे आरु ओकाक आपी गई हती।