1 Oba wie bedden junt, Breeda, wäajens daut Komen von ons Har Jesus Christus un ons Vesaumelt-woaren met Am, 1Tess 4:13-17 2 daut jie nich leicht bewäajcht woaren en de Jesennunk, uk nich veschrakjen, nich derch Jeist, nich derch Wuat un nich derch eenen Breef, soo aus von ons, aus wan Christus sien Dach tojäajen es. 2Pe 3:15-16 3 Lot junt von kjeenem opp irjent eene Wies vefieren, wiels dee kjemt nich, ea ieescht de Auffaul kjemt un de Mensch von de Sind jeopenboat woat, de Sän von daut Vedoawen, 1Tim 4:1; 1Joh 2:18 4 dee een Jäajna es un sikj selfst opphäft äwa aules, waut Gott heet ooda fa de Aunbädunk es, soo daut hee sikj aus Gott en Gott sien Tempel dolsat un sikj selfst väastalt, Gott to sennen. Dan 11:36; Mat 24:15 5 Denkj jie nich doaraun, aus ekj noch bie junt wia, daut ekj junt dit säd?

6 Un nu, jie weeten, waut daut opphelt, daut hee to siene Tiet jeopenboat woat. 7 Wiels daut Jeheemnis von de Jesazloosichkjeit wirkjt aul, bloos nu es dee doa, dee noch opphelt, bat dee ute Medd jenomen woat, 8 un dan woat de Jesazloosa jeopenboat woaren, woonen de Har venichten woat derch dän Jeist von sien Mul un woat am venichten derch de Erschienunk von sien Komen, Joh 11:4; Opb 19:15,20 9 am, däm sien Komen no de Wirkjunk von däm Soton es, en aule Macht un aule Tieekjens un lieejenhaufte Wunda Mat 24:24; Opb 13:11-14 10 un met aul daut Vefieren von Ojjerajchtichkjeit aun deejanje, dee veloaren gonen, doawäajen, daut see de Leew von de Woarheit nich aunneemen, om daut see jerat worden. 11 Doawäajen schekjt Gott äant kjraftje Errtiema*, daut see de Lieej jleewen, 2Tim 4:4 12 soo daut aule jerecht woaren, dee de Woarheit nich jejleeft haben, oba Jefaulen hauden aun de Ojjerajchtichkjeit.

13 Oba wie sellen Gott emma danken fa junt, vom Harn jeleewde Breeda, daut Gott junt vom Aunfank fa de Radunk jewält haft derch de Heiljunk vom Jeist un derch dän Gloowen von* de Woarheit, Ree 8:30 14 wuatoo Hee junt beroopen haft derch ons Evangelium, om de Harlichkjeit von ons Har Jesus Christus to erlangen.

15 Doawäajen, Breeda, stot faust un hoolt de Ordnungen, dee junt jelieet worden sent, entwäda derch Wuat ooda derch onsen Breef. 2Tess 3:6

16 Mucht deeselwja Har Jesus Christus un ons Gott un Voda, dee ons jeleeft un ons eenen eewjen Troost un goode Hopninj jejäft haft derch Jnod, 17 june Hoaten treesten un bestädjen en jieda goodet Wuat un Woakj.