Paulus sien tweeda Breef aun de Tessalonicha 1

De Gruss

1 Paulus un Silvanus un Timotäus aun de Jemeent von de Tessalonicha en Gott, onsem Voda, un däm Harn Jesus Christus: 2 Jnod met junt un Fräd von Gott, onsem Voda, un däm Harn Jesus Christus!

Dank jäwen

3 Wie sellen Gott emma danken fa junt, Breeda, soo aus sikj daut jehieet, wiels jun Gloowen waust äwarut, un de Leew von eenem jiedren von junt nemt too em Äwafluss jäajenenaunda, 4 soo daut wie selfst ons en junt riemen en Gott siene Jemeenten wäajens june Jedult un Gloowen en aul june Vefoljungen un Triebsaulen, dee jie dulden:

Christus kjemt toom Jerecht

5 Woont een openboaret Tieekjen von Gott sien jerajchtet Jerecht es, daut jie wirdich je-acht woaren fa Gott sien Rikj, fa woont jie uk lieden; 6 wiels daut bie Gott rajcht es, deejanje met Triebsaul to betolen, dee junt bedrekjen, 7 un junt, dee jie bedrekjt woaren, Ru met ons, wan de Har Jesus woat openboat woaren vom Himmel met de Enjel von siene Macht 8 un met flaumendet Fia deejanje de Rach to tolen, dee Gott nich kjanen un dee, dee daut Evangelium von ons Har Jesus Christus nich jehuarsom sent; 9 woone Strof lieden woaren, eewjet Vedoawen, von däm Harn sien Aunjesecht un von de Harlichkjeit von siene Macht, 10 wan Hee komen woat, om aun janem Dach veharlicht to woaren en siene Heilje un bewundat en aul dee, dee jejleeft haben; (wiels ons Zeichnis mank*1:10 Ooda: aun. junt es jejleeft worden). 11 Wuawäajen wie uk emma fa junt bäden, daut ons Gott junt wirdich helt fa de Beroopunk un aul daut Wooljefaulen von siene Gootheit erfelt un daut Woakj vom Gloowen en Krauft, 12 soo daut de Nomen von ons Har Jesus Christus en junt veharlicht woat, un jie en Am, no de Jnod von ons Gott un däm Harn Jesus Christus.