1 Oba von de Tieden un Stunden, Breeda, hab jie nich needich, daut ekj junt schriew. Mat 24:36 2 Wiels jie selfst weeten jeneiw, daut däm Harn sien Dach soo kjemt aus een Deef enne Nacht. Mat 24:42-44; 2Pe 3:10; Opb 3:3; 16:15 3 Wiels wan see woaren sajen: Fräd un Sechaheit! Dan kjemt een plazeljet Vedoawen äwa äant, jrod soo aus de Jeburts-Weedoag äwa eene schwangre Fru; un see woaren nich utkleiwen. Jer 6:14; Mat 24:39 4 Oba jie, Breeda, sent nich en Diestanis, daut junt de Dach aus een Deef jript. 5 Wiels jie aula sent Kjinja vom Licht un Kjinja vom Dach. Wie sent nich von de Nacht, uk nich von de Diestanis. Ree 13:12; Efs 5:8 6 Doawäajen lot ons nich schlopen soo aus de äwaje, oba lot ons woaken un nichta sennen. 1Pe 5:8 7 Wiels dee doa schlopen, schlopen de Nacht, un dee doa bedrunken sent, bedrinkjen sikj de Nacht. 8 Oba wie, dee wie vom Dach sent, lot ons nichta sennen, aunjetrocken met daut Brostschilt vom Gloowen un Leew un de Hopninj von de Radunk aus Schutzhelm. Efs 6:13-17 9 Wiels Gott haft ons nich toom Oaja bestemt, oba de Radunk to erlangen derch onsen Harn Jesus Christus, 10 dee fa ons jestorwen es, daut, auf wie woaken ooda schlopen, tojlikj* met Am läwen. Ree 14:8-9 11 Doawäajen treest junt unjarenaunda un but eena dän aundren opp, soo aus jie uk doonen. Heb 3:13

12 Oba wie bedden junt, Breeda, daut jie dee aunerkjanen, dee mank junt oabeiden un junt em Harn väastonen un junt vemonen, 1Kor 16:18 13 un daut jie äant sooväl mea en Leew achten, om äa Woakj haulwen. Habt Fräd unjarenaunda.

14 Wie ermonen junt, Breeda: Vemont de Onordentliche, treest de Läajchmootje, nämt junt de Schwake aun, siet jeduldich jäajen aulemaun. 2Tess 3:15 15 Seet too, daut kjeena Beeset met Beeset irjentwäm trigj-tolt, oba folcht auletiet daut Goode no, jäajen eenaunda un aun aulemaun. Flp 4:4

16 Freit junt auletiet; 17 bät onen opphieren. Luk 18:1-8; Ree 12:12; Efs 6:18; Kol 4:2 18 Jäft Dank en aules, wiels daut es Gott sien Wellen en Christus Jesus fa junt. Efs 5:20 19 Dän Jeist lascht nich ut; 1Kor 14:1,29 20 ve-acht nich de Profezeiungen; 21 prieft aules; hoolt daut Goode faust. 1Kor 14:29 22 Blieft wajch von aulem beesen Schien.

23 Un Hee selfst oba, de Gott von Fräd, heilj junt gaunz; un mucht jun gaunza Jeist un Seel un Kjarpa schultloos bewoat woaren bat daut Komen von ons Har Jesus Christus. 24 Tru es Hee, dee junt roopt; dee woat daut uk doonen. 1Kor 1:9; 2Tess 3:3

25 Breeda, bät fa ons. 26 Jreest aul de Breeda met eenem heiljen Kuss. 27 Ekj beschwia junt bie däm Harn, daut dis Breef to aule heilje Breeda jeläst woat. 28 De Jnod von ons Har Jesus Christus sie met junt. Amen. De ieeschta Breef no de Tessalonicha wort von ut Ateen jeschräwen.