1 Paulus un Silvanus un Timotäus, aun de Jemeent von de Tessalonicha en Gott, däm Voda, un däm Harn Jesus Christus: Jnod met junt un Fräd von Gott, onsem Voda, un däm Harn Jesus Christus! Apj 15:14; 16:1-3,19; 17:1-9; 2Tess 1:1

2 Wie danken Gott auletiet fa junt aula, endäm wie junt en onse Jebäda erwänen, 3 un onen opphieren denkj wie aun jun Woakj von däm Gloowen un de Oabeit von de Leew un de Jedult von de Hopninj opp onsen Harn Jesus Christus, ver Gott un ons Voda; 1Kor 13:13 4 wiels wie kjanen june Uterwälunk von Gott, jeleewde Breeda. 5 Wiels ons Evangelium kjeem nich no junt em Wuat auleen, oba uk enne Krauft un em Heiljen Jeist un en groote Jewesheit, soo aus jie weeten, waut wie mank junt wieren om junt haulwen. 1Kor 2:5 6 Un jie sent onse Nofolja jeworden, un däm Harn siene, endäm jie daut Wuat oppjenomen haben en väl Triebsaul met Freid vom Heiljen Jeist, 2Tess 3:7 7 soo daut jie Väabilda worden fa aul dee, waut en Mazedonien un Achaja jleewen. 8 Wiels von junt es däm Harn sien Wuat rutjeschault, nich bloos en Mazedonien un Achaja, oba uk opp aule Städen es jun Gloowen aun Gott utjespreet worden, soo daut wie daut nich needich haben, irjentwaut to sajen. Ree 1:8 9 Wiels see selfst sajen von ons, waut fa een Engank wie bie junt hauden un woo jie junt von de Aufjetta to Gott bekjieet haben, om dän läwendjen un woaren Gott to deenen Apj 14:15; 1Kor 12:2 10 un sienen Sän utem Himmel to erwoarten, dän Hee von de Doodje opperwakjt haft, Jesus, dee ons jerat haft von däm komenden Oaja. Tit 2:13