1 Doawäajen, wiels wie daut nich lenja uthilden, jefoll ons daut, en Ateen auleen jeloten to woaren, Apj 17:14-16 2 un schekjten Timotäus, onsen Brooda un Gott sien Deena un onsen Metoabeida aun Christus sien Evangelium, om junt to stoakjen un to treesten, om jun Gloowens haulwen, Apj 16:1-3 3 soo daut kjeena wankent woat en dise Triebsaulen; wiels jie selfst weeten, daut wie doatoo bestemt sent. Apj 14:22; Efs 3:13; Heb 10:39; 2Tim 3:12 4 Wiels uk, aus wie bie junt wieren, säd wie junt verhäa, daut wie wudden Triebsaulen haben, soo aus et uk passieet es, un jie weeten daut. 5 Doawäajen, aus ekj daut nich lenja uthoolen kunn, schekjt ekj, om von junem Gloowen to erfoaren, auf de Vesieekja junt veleicht vesocht haud un onse Oabeit vejäfs wia. Flp 2:16

6 Oba nu, daut Timotäus von junt no ons jekomen es un ons de goode Norecht von junem Gloowen un june Leew vekjindicht haft, un daut jie auletiet goode Erinnerungen von ons haben un velangen, ons to seenen, jrod soo aus uk wie junt: Apj 18:5 7 Sent wie wäajen dit, Breeda, äwa junt en aul onse Noot un Triebsaul jetreest worden derch junen Gloowen. 8 Wiels nu läw wie, wan jie faust stonen en däm Harn. 9 Wiels waut fa Dank kjenn wie Gott fa junt trigjtolen fa aul de Freid, dee wie om junt-haulwen ons freien ver onsem Gott? 10 Wie bäden Dach un Nacht äwamotent*, daut wie jun Aunjesecht seenen un foadich-moaken kjennen, waut aun junem Gloowen noch fält.

11 Oba mucht Gott selfst un ons Voda un ons Har Jesus Christus, onsen Wajch no junt lenkjen. 12 Mucht de Har junt moaken, too to nämen un äwa to streemen en de Leew jäajenenaunda un to aulem, (jrod soo aus uk wie jäajen junt doonen), 13 om daut june Hoaten jestoakjt woaren un schultloos sent en de Heilichkjeit ver Gott un onsem Voda, bie daut Komen von ons Har Jesus Christus met aul siene Heilje. 1Kor 1:8; Flp 1:10