1 Wieda nu, Breeda, bedd un ermon wie junt en däm Harn Jesus, soo aus jie daut von ons jekjräajen haben, woo jie waundlen un Gott jefaulen sellen, daut jie noch mea toonämen. 2 Wiels jie weeten, woone Jebooten wie junt jejäft haben derch dän Harn Jesus.

3 Wiels dit es Gott sien Wellen, june Heiljunk, daut jie junt von de Huararie enthoolen; 4 un daut een jiedra von junt weet, woo sien ieejnet Jefäss en Heiljunk un Iea to behoolen, 5 nich met Liedenschoft von de Lost, soo aus uk de Heiden, dee Gott nich kjanen; 6 daut kjeena too wiet jript un unjajeit sienen Brooda en de Sach, wiels de Har een Rechta äwa aul soont es, soo aus wie junt uk verhäa jesajcht un bewäsen haben. 3Mo 19:11 7 Wiels Gott haft ons nich to de Onreinichkjeit beroopen, oba to de Heilichkjeit. 8 Doawäajen, wäa ve-acht, ve-acht nich Mensch, oba Gott, dee ons uk sienen Heiljen Jeist jejäft haft. Luk 10:16

9 Oba waut de Breedaleew aunbelangt, hab jie nich needich, daut ekj junt schriew, wiels jie selfst sent von Gott jelieet, eenaunda to leewen. 3Mo 19:18; Joh 13:34 10 Un daut doo jie uk to aul de Breeda, dee en gaunz Mazedonien sent. Oba wie ermonen junt, Breeda, noch mea too to nämen 11 un junt doarom to bemieejen, daut jie stell sent un june ieejne Jeschaften doonen un met june ieejne Henj oabeiden, soo aus wie junt daut jeboden haben, Efs 4:28; 1Tess 2:9; 2Tess 3:8-12 12 soo daut jie ierlich waundlen jäajen dee, dee buten sent, un daut jie kjeen Bederfnis haben. Kol 4:5

13 Wie wellen oba nich, Breeda, junt em Onkloaren loten äwa de Enjeschlopne, om daut jie nich truaren, soo aus de äwaje, dee kjeene Hopninj haben. 1Kor 15:20; Efs 2:12 14 Wiels wan wie jleewen, daut Jesus jestorwen un oppjestonen es, aulsoo woat uk Gott dee, derch Jesus Enjeschlopne, met Am brinjen. Ree 14:9; 1Kor 15:3-4,12 15 Wiels dit saj wie junt derch däm Harn sien Wuat, daut wie, dee wie läwen un äwajebläwen sent bat däm Harn sien Komen, de Enjeschlopne opp kjeenen Wajch woaren veropp-komen. Mat 16:28; 24:30-31; 1Kor 15:51-52; Joh 17:24 16 Wiels de Har selfst woat met eenem Roop, met de Stemm von däm Haupt-Enjel un met Gott sien Trompeet vom Himmel raufkomen, un de Doodje en Christus woaren ieescht oppstonen. 17 Doahinja wie, dee wie läwen un äwajebläwen sent, woaren met äant tojlikj en de Wolkjen noppjenomen woaren, däm Harn en de Loft to bejäajnen; un soo woa wie auletiet bie däm Harn sennen. Joh 12:26 18 Doawäajen treest junt unjarenaunda met dise Wieed.