1 Wiels ekj well, daut jie weeten, waut fa eenen grooten Kaumf ekj om junt hab un om dee von Laodizea un fa aule, dee mien Aunjesecht em Fleesch nich jeseenen haben, 2 daut äare Hoaten wudden jetreest un toop-jeschloten woaren en Leew un to aulem Rikjtum von de volle Jewesheit vom Vestentnis, to de Erkjantnis von daut Jeheemnis von Gott un däm Voda un von Christus, 3 en wäm aul de Schaza von de Weisheit un de Erkjantnis vestoaken sent. 1Kor 1:24,30 4 Ekj saj dit oba, daut junt kjeena veleit met lockende Wieed. Ree 16:18 5 Wiels wan ekj uk nom Fleesch aufwäsent sie, sie ekj doch em Jeist bie junt un frei mie un see june Ordnunk un daut Faust-stonen von jun Gloowen aun Christus. 1Kor 14:40

6 Soo aus jie nu Christus Jesus, dän Harn, aunjenomen haben, soo waundelt en Am, 7 jewartelt un oppjebut en Am, un faustjesat em Gloowen, soo aus jie jelieet worden sent, äwastreement doarenn, met Danksajen. Efs 3:17

8 Heet junt, daut junt nich irjentwäa bereibat derch Filosofie* un ladje Vefierunk, no de Ordnunk von Menschen, no de Elementen von de Welt, un nich no Christus. 9 Wiels en Am wont de gaunze Vollheit von de Gottheit kjarpalich; Joh 1:14,16 10 un jie sent vollkomen en Am, woona daut Haupt von aul daut Ferschtentum un Vollmacht es; Efs 1:21 11 en woonem jie uk beschnäden sent met de Beschniedunk, dee onen Henj jemoakt es, en daut Auflajen vom sinteljen Kjarpa vom Fleesch, en de Beschniedunk von Christus, Ree 2:29; 6:5; 1Pe 3:21 12 begroft met Am en de Doop, en woone jie uk met-opperwakjt worden sent derch dän Gloowen derch Gott siene Wirkjunk, dee Am von de Doodje opperwakjt haft. Ree 6:4; Kol 3:1 13 Un junt, dee jie doot wieren en Sinden un en de Onbeschniedunk von jun Fleesch, haft Hee läwendich jemoakt met Am, endäm Hee junt aule Vefälungen vejeef; Efs 2:1,5 14 aus Hee de ons entjäajen-stonende Haunt-Schreft utlascht, dee en Befälungen jäajen ons wia, un haft dee ute Medd jenomen, endäm Hee dee aum Kjriez noageld; Efs 2:15 15 un haft de Ferschtentiema un de Vollmachten utjetrocken, un äant effentlich toom Schau jemoakt, un äwa äant jetriumfieet. Kol 1:13; Efs 4:8

16 Aulsoo lot junt von kjeenem rechten äwa Äten ooda äwa Drinkj ooda em Be-oobachten von Fastdoag ooda Niemon ooda Sabaten, Ree 14:1-12 17 woone een Schauten von de tookjinftje Dinja sent, oba de Kjarpa es Christus siena. Heb 8:5; 10:1 18 Lot kjeenem junt dän Kaumf-Pries unjagonen, endäm hee sikj en Deemoot un Enjel-Deenst enwellicht un sikj en Dinja nenlat, dee hee nich jeseenen haft, onen Nutzen von sienem fleeschlichen Senn oppjeblost, 19 un helt nich daut Haupt, ut woonem de gaunza Kjarpa derch de Jelenkja un Benja sikj ernäat un unjarenaunda toophelt un waust aulsoo to een jettlichet Waussen. Efs 4:15-16

20 Wan jie met Christus de Elementen von de Welt aufjestorwen sent, waut unjastal jie junt de Sazungen, aus wan jie noch en de Welt läwen? Gal 4:9-10 21 Schia daut nich aun, schmakj daut nich, beria daut nich; 22 (woont doch aules derch Jebruck venicht woat) no de Jebooten un Lieren von Menschen, Mat 15:9 23 woone Dinja werkjlich eenen Schien von Weisheit haben, en eenen ieejen-weljen Gottesdeenst un Deemoot, un dän Kjarpa nich schoonen, un nich en irjent Iea toom daut Fleesch befrädjen. Ree 13:14; 1Tim 4:3