1 Judas, Jesus Christus sien Kjnajcht, un Jakobus sien Brooda, aun de Beroopne, dee doa en Gott, däm Voda, jeheilicht sent un en Jesus Christus bewoat: Mat 13:55 2 Mucht Boarmherzichkjeit un Fräd un Leew bie junt vemieet sennen!

3 Jeleewde, aus ekj aulen Fliet aunwand, junt to schriewen von onse jemeensome Radunk, wia mie daut wichtich, junt to schriewen, un junt to ermonen, fa dän Gloowen to kjamfen, dee eenmol de Heilje äwajäft worden es. 1Tim 1:18 4 Wiels doa haben sikj atelje Menschen biesied-nenjeschlikjt, dee aul von lange Tieden häa to dit Jerecht väajeschräwen wieren, Gottloose, woone de Jnod von ons Gott en Onveschämtheit vewaundlen un velieejen dän eensjen Har Gott un onsen Harn Jesus Christus.

5 Oba ekj well junt erinren, dee jie dit aul eenmol wisten, daut de Har, nodäm Hee daut Volkj ut daut Launt Ägipten jerat haud, toom tweedemol dee venicht, woone nich jleewden. 4Mo 14:35; 1Kor 10:5 6 Un de Enjel, dee äaren ieeschten Staunt nich bewoaden, oba veleeten äare ieejne Behusunk, haft Hee toom Jerecht von däm grooten Dach bewoat, met eewje Kjäden unja de Diestanis. 1Mo 6:2-4 7 Jrod soo aus Sodom un Gomorra un de omligjende Städa, dee jrod soo aus jane, sikj selfst fa de Huararie hanjeewen un aundret Fleesch hinjaraun jinjen, aus een Biespell doa sent, un de Strof von daut eewje Fia lieden. 1Mo 19:1,4-11 8 Oba jrod soo uk dise Dreema, ve-onreinjen daut Fleesch, ve-achten de Harschoft un lastren de Harlichkjeiten.

9 Oba Michael, de Haupt-Enjel, aus hee met däm Diewel street, un Wuatwakjsel haud äwa Moses sien Kjarpa, wuach sikj nich een lasta Uadeel to jäwen, oba säd: De Har strof die! Dan 12:1; Sach 3:2 10 Oba dise lastren Dinja, dee see nich vestonen; oba waut see von Natua vestonen, soo aus de onveninftje Tieren, doarenn vedoawen see sikj. 11 Wee äant, wiels see sent däm Wajch von Kain jegonen un randen bejierich däm Bieleam sien Errtum hinjaraun om Jewenst haulwen un sent en Korach sien Jäajen-Räden omjekomen. 1Mo 4:8; 4Mo 31:16; 16:1-34

12 Dise sent Plaken en june Leewesmolen, wan see toop Fast haben met junt un feeden sikj selfst onen Forcht; Wolkjen sent see onen Wota, vom Wint jedräwen; Lot-Hoafst Beem onen Frucht, tweemol jestorwen un utjewartelt; 1Kor 11:21 13 wille Mäawalen, dee äare ieejne Schaund rutschumen; errende Stierns, fa dee de Dunkelheit von de Diestanis en Eewichkjeit oppbewoat es. Jes 57:20

14 Un jrod soo uk Henoch, de säwenda von Adam, profezeid von dise un sajcht: "Kjikj, de Har kjemt met väl dusende von siene Heilje, 1Mo 5:21 15 Jerecht to hoolen jäajen aule un aule Gottloose to äwazeijen fa aul äare gottloose Woakjen, dee see gottloos jedonen haben, un fa aul de hoade Wieed, woone de gottloose Sinda jäajen Am jerät haben". 16 Dit sent Murrende, Ontofrädne, dee no äare ieejne Losten waundlen; un äa Mul rät stolte* Wieed un achten de Persoon om Nutzen haulwen.

17 Jie oba, Jeleewde, denkjt aun de Wieed, dee von de Apostel von ons Har Jesus Christus verhäa jerät worden sent, 18 aus see junt säden, daut en de latste Tiet woaren Spetta sennen, dee no äare ieejne Losten von Gottloosichkjeit* waundlen. 1Tim 4:1; 2Pe 3:3 19 Dise sent dee, woone sikj aufsondren, fleeschlich, dee dän Jeist nich haben. 1Kor 2:14 20 Jie oba, Jeleewde, but junt selfst opp en junem aula heilichsten Gloowen, un bät en däm Heiljen Jeist, Kol 2:7; 1Tess 5:11 21 bewoat junt selfst en Gott siene Leew, un luat opp de Boarmherzichkjeit von ons Har Jesus Christus toom eewjet Läwen. 22 Un moakt disen Unjascheet, met atelje Metleet to haben 23 un de aundre met Forcht to raden, dee utem Fia rut to rieten; un haust soogoa daut vom Fleesch enjeschwiende Hamd. Jak 5:9; Opb 3:4

24 Oba däm, dee majchtich es, junt to bewoaren onen to faulen un junt onen Fäla ver siene Harlichkjeit väastalen kaun met Freiden, 1Tess 5:23 25 to däm eensjen* weisen Gott, onsem Heilant, mucht Harlichkjeit, Majestät, Macht un Jewault sennen nu un en aule Eewichkjeit! Amen.