1 यदि तुहुरिन्मेसे कौनो एक जहनके विश्वासी भैयासे कुछु गुनासो बा, कलेसे तुहुरे कौनो संसारिक अदालतमे नै जाके, तुहुरिन्मेसे के सहि बा, और के गलत बा कहिके तुहुरे अपन मामलक न्याय करवाइक लग मण्डलीमे पवित्र मनैनके थेन जाऊ। 2 पक्कै फेन तुहुरे जन्थो कि भविष्यमे पवित्र मनै यी संसारके मनैनके न्याय करहीँ। और जब तुहुरे संसारके मनैनके न्याय करथो कलेसे का तुहुरे अपन बिच्चेम रहल छुटि-छुटि मामलक फैसला करना योग्यक नै हुइतो? 3 तुहुरिन्हे पता बा, कि भविष्यमे हम्रे शैतानके दूतनके न्याय कर्बी, कलेसे पक्कै फेन हम्रे यी जीवनके साधारण बातके निर्णय करे सेक्थी।

4 यदि तुहुरिन्के थेन जीवनके साधारण बातके मामला आइत कलेसे तुहुरे मण्डलीक उ मनैनसे फैसला ना करवैहो, जेनहे मण्डलीक विश्वासीन आदर करना योग्यक नै हो कहिके सोँच्थाँ। 5 तुहुरिन्हे ते लाज लागे परना हो, तुहुरिन्के बिच्चेम विश्वासी दादू-भैयनके बिच्चेम हुइलक असिन मामलक न्याय करे सेकुइया कमसे कम एक जाने ते हुई परना हो। 6 पर तुहुरे ते एकथो विश्वासी भैया दोसुर विश्वासी भैयक विरोधमे रहल मामलक फैसला करवाइक लग अविश्वासी न्यायधीशके थेन अदालतमे जैथो।

7 जब तुहुरिन्मेसे एकजाने दोसर विश्वासीनहे अदालतमे लैजिथो, कलेसे तुहुरे परमेश्वरके मनैनके हस व्यवहार करनामे बिरकुल असफल होगिल बतो। यदि कौनो अविश्वासी मनैया तुहुरिन्हे अन्याय करत, और तुहुरिन्हे धोखा देहत कलेसे तुहुरे ओकर कुछु न्याय ना करहो। 8 तुहुरे अप्निहीँ एकदोसर विश्वासी भैयनहे अन्याय करथो, और धोखा देथो।

9 दोसुर जहनहे अन्याय करुइया मनै परमेश्वरके राजके हकदार नै हुइहीँ कना बात ते तुहुरे जन्थो। तुहुरिन्हे नै मजा काम करे बन्जाइत। और परमेश्वरके मनैनकेमे फेन शामिल हुई सेकजाइत कहिके तुहुरिन्हे केऊ धोखासे सोँच्ना मजबुर ना करादेहे। और वेश्यागमन करके फेन परमेश्वरके मनैनकेमे शामिल हुई सेकजाइत कहिके फेन केऊ तुहुरिन्हे सोँच्ना मजबुर ना करादेहे। अस्तेके मूर्तिहे पुजके, व्यभिचार करके, और समलिङ्गीनहे, और पुरुषगामीनहे, 10 और अस्तेहेँके चोरी काम करके, दोसुर जहनके चिजहे लालच करके, और जाँर-दारु पिके। और दोसुर जहनहे गरयाके और दोसुर जहनहे लूटके परमेश्वरके राजके हकदार बने सेकजाइत कहिके यदि तुहुरे सोँच्थो कलेसे तुहुरे एकदम गलत बतो। 11 तुहुरिन्मेसे कैयो जाने पहिले अस्तेहेँ काम करतोहो। पर प्रभु येशू ख्रीष्टके नाउँसे और हमार परमेश्वरके आत्मासे तुहुरिन्के पाप धोगिलस। और तुहुरे पवित्र बनागिलो, और तुहुरे हुँकार नजरमे धर्मी ठहरागिलो।

12 केऊ कहे सेकत, कि "मै ज्या चहथुँ उहिहे करना अनुमति महिन्हे बा, काकरेकी मै विश्वासी हुइतुँ।" पर सक्कु बात तुहुरिन्के फाइदा नै करत। मै फेन कहे सेक्थुँ, कि "मै ज्या चहथुँ उहिहे करना अनुमति महिन्हे बा, काकरेकी मै विश्वासी हुइतुँ।" पर मै कौनो चिजके गुलाम बने नै चहथुँ। 13 और केऊ कहे सेकत, कि "खाना हमार शरीरके लग हो, और शरीर खानक लग हो।" असिक कना ठिके हो, पर जब हम्रे परमेश्वरके संग स्वर्गमे रबी, तब परमेश्वर हमार शरीर और हमार खाना दुनु चिजहे नाश करदिहीँ। शरीर व्यभिचारके लग नै हो, पर हमार शरीर प्रभुक हुइँत, और हुँकार सेवा करक लग बनल बताँ।

14 यी बाहेक हमार शरीर महत्त्वपूर्ण बा, काकरेकी जसिके परमेश्वर येशू ख्रीष्टहे मुअलमेसे फेनदोस्रे जिवाइक लग अपन शक्तिक प्रयोग कर्ले रहिँत। ओस्तेहेँके परमेश्वर हम्रिहिन्हे फेन मुअलमेसे फेनदोस्रे जिवैहीँ। 15 जात्तिके तुहुरिन्हे पता बा, कि तुहुरिन्के शरीर ख्रीष्टके एकथो अङ्ग हो। कलेसे का कौनो मनैया अपन शरीरहे लेके वेश्यक संग जोरना मजा हो? असिन ते कबु ना होए!

16 यी शास्त्रमे लिखल बा, "दुनु एक्के शरीर होजिहीँ।" तबेकमारे तुहुरिन्हे पता हुई परना हो कि जे एकथो वेश्यक संग व्यभिचार करत कलेसे ऊ वेश्यक संग एक शरीर बनजाइत। 17 और जे प्रभुक संग एकजुट रहत, ओकर आत्मा और येशूक आत्मा एक्के होगिल बताँ।

18 व्यभिचारसे बिरकुल दूरे रहहो। कौनो दोसुर पाप अतरा फरछ्वारसे शरीरहे प्रभाव नै पारत जतरा कि यी व्यभिचार कना पाप शरीरहे प्रभाव पारत। काकरेकी दोसुर पाप शरीरसे बाहेर बा। पर व्यभिचार करुइया अपने शरीरके विरोधमे पाप करत। 19 जात्तिके तुहुरिन्हे पता बा, कि तुहुरिन्के शरीर मन्दिर हो। जेम्ने पवित्र आत्मा बैठल रहत; जोन पवित्र आत्मा तुहुरिन्केमे बैठल बा। और यी पवित्र आत्मा तुहुरिन्हे परमेश्वरके ओहोँरसे मिलल बा। और तुहुरे परमेश्वरके हुइतो। 20 परमेश्वर तुहुरिन्के लग येशू ख्रीष्टहे संसारमे पठाके क्रूसमे बलिदान करवाके बरवार मोल चुकैले बताँ। तबेकमारे तुहुरे अपन शरीरसे परमेश्वरके महिमा करो।