1 मै पावल, तुहुरिन्के आघे डरपोक्ना हस हुइतुँ, पर जब मै तुहुरिन्से दूर रथुँ, तब मै सहासी होजिथुँ! ख्रीष्टके नम्रता और कोमलतक कारण मै तुहुरिन्हे अनुरोध करतुँ। 2 कि जब तुहुरिन्के थेन मै अइम ते महिन्हे लागत कि महिन्हे ओइन्के थेन कठोर हुई परी, जेने सोँच्थाँ कि हम्रे यी संसारके मनैनके हस काम कर्थी। मै अनुरोध करतुँ कि जब मै अइम ते महिन्हे तुहुरिन्के संग असिन व्यवहार करे ना परे। 3 हम्रे संसारमे रथी, तभुन फेन हम्रे अपन दुश्मननसे ओसिके नै लर्थी जसिके यी संसारके मनै लरथाँ। 4 काकरेकी जोन हँथियारसे हम्रे लर्थी, उ हँथियार संसारके मनैनके प्रयोग करना हँथियारसे फरक बा। पर हमार थेन किल्ला नाश करना परमेश्वरके शक्ति बा। 5 हम्रे हरेक घमण्डसे भरल उ बाधाहे नाश करदेथी, जोन बाधा परमेश्वरहे जन्नासे मनैनहे रोकत। और हम्रे हरेक विचारहे अधिनमे नानके ख्रीष्टके आज्ञाकारी बनादेथी।

6 और तुहुरे पूरा रुपमे ख्रीष्टके आज्ञाकारी होजिबो, तब हम्रे आज्ञा नै मनुइया हरेक मनैनहे दण्ड देहक लग तयार रहब।

7 तुहुरे बाहिरी देखावतहे हेर्थो। कौनो मनैयाहे मै ख्रीष्टके हुइतुँ कहिके पूरा भरोसा बतिस कलेसे ऊ जानलेहे कि जसिके ऊ ख्रीष्टके हो, ओस्तेहेँके हम्रे फेन ख्रीष्टके ते हुइती। 8 काकरेकी हमार अधिकारके बारेमे मै कुछु धेउरे घमण्ड करदेनु कलेसे फेन मै नै लजैम। काकरेकी यी अधिकार तुहुरिन्के विश्वासहे नाश करक लग नै हो। पर प्रभुमे तुहुरिन्के विश्वास बह्रैनामे सहयोगके लग हो। 9 और मै अपन चिट्ठीक माध्यमसे तुहुरिन्हे डुरवैना कोशिस करे नै चहथुँ। 10 काकरेकी तुहुरिन्मेसे गोड्गात मनै कथाँ कि "ओकर चिट्ठी कठोर और शक्तिशाली बतिस। पर जब ऊ अप्निहीँ हमार थेन हाजिर हुइत कलेसे ऊ एकथो कमजोर होजाइत, और ऊ बोल्नामे सिपार नै हो कना जानमिलत।"

11 ओसिन मनै यी सोँचलिँत, कि जब मै तुहुरिन्के संग रहम, तब फेन मै बिरकुल वहे करम, जोन बात मै अपन चिट्ठीमे लिखल बतुँ।

12 काकरेकी हमार थेन यी हिम्मत नै हो कि हम्रे अपनहे ओइन्से तुलना करी, जेने अपन तारिफ करथाँ। और अपनहे एकदोसर जहनसे जोखके और तुलना करके मूर्ख बनजिथाँ। 13 परमेश्वरके हम्रिहिन्हे देलक कामके सिमासे बाहेर हम्रे कबु गर्व नै करब। हम्रे वहे काममे किल घमण्ड करब, जोन काम करक लग परमेश्वर हम्रिहिन्हे पठैले बताँ। और आब उ कामके हिस्सा तुहुरे हुइतो। 14 तुहुरिन्हे ख्रीष्टके खुशीक खबर सुनाइक लग कोरिन्थ शहरसम यात्रा करुइया सुरुक मनै हम्रेहे रही। तबेकमारे तुहुरिन्केमे गर्व करनामे हम्रे अपन सीमा नै नाघथुइति। 15 हम्रे सीमा नाहाङके दोसुर जहनके मेहनतमे गर्व नै कर्थी। पर हमार आशा यी बा, कि तुहुरिन्के विश्वास बहरती जाइबेर हम्रे तुहुरिन्के बिच्चेम आकुर धेउर काम करे सेकब। 16 तब हम्रे तुहुरिन्से दूर दोसुर देशमे खुशीक खबर प्रचार करे सेकब। और केक्रो दोसुर जहनके ईलाकामे आग्गिहिँसे करगिलक कामके बारेमे हम्रिहिन्हे घमण्ड करे नै परी। 17 जसिके पवित्र शास्त्रमे लिखल बा, "यदि केऊ घमण्ड करे चाहत कलेसे ऊ प्रभुक बारेमे किल घमण्ड करे।" 18 काकरेकी जे अपन तारिफ करत उहिहे नै होके, जेकर तारिफ प्रभु करथाँ, उहिएहे सच्चा मानके स्वीकार करजाजाइत।