1 तबेकमारे हे मोरिक प्रिय संघरियन, परमेश्वर हम्रिहिन्हे अपन लर्कनके रुपमे स्वीकार करक लग असिके वाचा कर्ले बताँ। तबेकमारे हम्रे शरीर और आत्मक सक्कु खराब काम छोरदी, और परमेश्वरके डर मानी, और आऊ, हम्रे पवित्र हुइक लग पूरा रुपमे काम करी।

2 हम्रिहिन्हे तुहुरे अपन पूरा मनसे प्रेम करो। हम्रे केक्रो फेन खराबी नै कर्ले हुइती। हम्रे किहुहे फेन भ्रष्ट नै बनैले हुइती। हम्रे कौनो फेन मनैयाहे नै थागल हुइती। 3 तुहुरिन्हे दोषी ठहराइक लग मै असिके नै कनु। काकरेकी मै पैलेहेँ कहिदेले बतुँ, हम्रे तुहुरिन्हे अपन पूरा मनसे प्रेम कर्थी, और हम्रे चाहे मुई या चाहे जित्ति रही, हम्रे अल्गे नै हुइबी। 4 मै तुहुरिन्से बहुत भरोसा करके बोलतुँ। तुहुरिन्केमे मै बहुत गर्व करथुँ। महिन्हे सान्त्वना मिलल बा। हमार सक्कु दुःखमे मै एकदम आनन्दित बतुँ।

5 काकरेकी हम्रे त्रोआस शहर छोरके माकेडोनिया प्रदेशमे अइली ते फेन हम्रिहिन्हे कुछु अराम नै मिलल। पर सक्कु ओहोँरसे हम्रिहिन्हे समस्या आइल रहे। सक्कु ओहोँर झग्रैझग्रा रहिँत, और हमार मनमे डर रहे।

6 पर तीतस आइल ते निराश हुइल मनैनहे सान्त्वना देहुइया परमेश्वर हम्रिहिन्हे फेन सान्त्वना देलाँ। 7 ओकर अइलक कारणसे किल नै हो, पर उ सान्त्वनासे फेन, जोन सान्त्वना तीतस तुहुरिन्के थेनसे भेटाइल रहे। महिन्हे भेँटा करना तुहुरिन्के बरवार इच्छक बारेमे कहल, मोरिक लग तुहुरिन्के शोकके बारेमे फेन बतैलस। और ऊ मोरिक लग तुरिन्केमे रहल जोशके बारेमे फेन बतैलस। तबेकमारे मै आकुर धेउर आनन्दित होगिनु।

8 मै तुहुरिन्हे उ कठोर चिट्ठी पठैलकमे महिन्हे कौनो दुःख नै हो। पहिले ते महिन्हे दुःख लागल रहे। काकरेकी महिन्हे पता बा कि थोरिक समयक लग यिहिसे तुहुरिन्हे दुःख लागल हुई। 9 आब महिन्हे खुशी लागल बा, पर तुहुरिन्हे दुखि बनाइल कहिके नै हो। पर यी कारणसे कि तुहुरे उ दुःखके कारण पाप करना छोरदेलो। और परमेश्वरके ओहोँर घुमगिलो। काकरेकी जसिके परमेश्वर चाहतिहिँत तुहुरे ओस्तेहेँके दुखि हुइलो। और हमार ओहोँरसे तुहुरिन्हे कुछु नोक्सानी सहे नै परल। 10 काकरेकी जोन दुःख परमेश्वरके चाहल अनुसार हुइत, उ दुःख मनैनहे पाप करना छोरके परमेश्वरके ओहोँर घुम्ना कारण बनत। काकरेकी परमेश्वर उहिहे बँचैथाँ, तबेकमारे केऊ फेन उ परिणामसे दुखि नै हुइत। पर संसारिक मनैनके दुःख सदाकालके मृत्यु ओहोँर लैजाइत।

11 हेरो, परमेश्वरके इच्छा अनुसारके यी दुःख तुहुरिन्केमे कसिन-कसिन बदलाव नानल बा: असिन उत्साहासे भरल प्रतिबद्धता, अपनहे निर्दोष बनैना अतरा बरवार इच्छा बा। अन्यायक पर असिन क्रोध बा। समस्यक उप्पर असिन सावधानी, और महिन्हे भेँटा करना अतरा भारी इच्छा बा। सेवा करनामे असिन उत्साहा बा, और नै मजा काम करुइयनहे दण्ड देहक लग असिन चाहनासे तुहुरे यी साबित करदेले बतो कि सक्कु बात मजा तरिकासे करनामे तुहुरे कुछु फेन कमि नै करल हुइतो। 12 मै उ कठोर चिट्ठी अन्याय करुइया मनैयक कारणसे नै लिख्नु, ना ते अन्यायमे परुइया मनैयक कारणसे लिख्नु। पर यी कारणसे लिख्नु ताकि परमेश्वर तुहुरिन्हे देखाइँत कि तुहुरे हमार लग कतरा चिन्ता कर्थो।

13 तबेकमारे हम्रिहिन्हे उत्साहा मिलल बा। हम्रिहिन्हे मिल्लक अपने उत्साहा बाहेक तीतसके आनन्दमे हम्रे धेउर रमैली। काकरेकी तुहुरिन्के माध्यमसे ओकर मनहे शान्ति मिलल बतिस। 14 काकरेकी ओकर आघे तुहुरिन्के बारेमे मै कुछु घमण्ड करल रहुँ कलेसे महिन्हे ओम्ने कुछु लाज नै हुइल। पर जसिके हम्रे जबफेन तुहुरिन्हे सँच बात कले बती, ओस्तेहेँके तीतसके आघे हमार कर्लक घमण्ड फेन सच्चा ठहरगिल बा। 15 और जब तीतस याद करत कि तुहुरे सक्कु जाने आज्ञाकारी रहो, और तुहुरे डरैती और लग्लगैती उहिहे स्वीकार कर्लो, ते तुहुरिन्के लग ओकर प्रेम आकुर धेउर बहरगिलिस। 16 मै खुशी बतुँ, काकरेकी तुहुरिन्के उप्पर महिन्हे पूरा विश्वास बा।