1 पत्रुस और यूहन्ना दुपहरिक तीन बजे प्राथनक समयमे मन्दिरमे जाइतिहिँत। 2 एकथो जल्मत्तिक नागर मनैयाहे मनै मन्दिरके दवारीमे नानतिहिँत। प्रत्येक दिन ओइने उहिहे उ दवार थेन बैठ्वादिँत, जोन दवारके नाउँ सुग्घुर दवार रहिस। ऊ वहाँ बैठ्के मन्दिरमे जउइया मनैनसे भीख माँगे। 3 जब ऊ पत्रुस और यूहन्नाहे मन्दिरके भित्तर जाइत देखल, ते ऊ ओइन्से भीख माँगल। 4 पत्रुस और यूहन्ना सोझे ओकर ओहोँर हेरलाँ और कलाँ, "हमार ओहोँर हेर!" 5 ओइन्से कुछु भेटैना आसरा करके ऊ ओइन्हे महा घट्गरसे हेरल। 6 तब् पत्रुस कहल, "सोन और चाँदी ते मोरिक थेन नै हो; पर ज्या मोरिक थेन बा, वहे मै तुहिहे देहम; नासरत गाउँक येशू ख्रीष्टके नाउँमे उठ् और नेङ्ग!" 7 और पत्रुस ओकर दाहिन हाँथ पकरके उहिहे उठाइल; और जुरतेहेँ ओकर गोरामे और घुट्ठी-घुट्ठीमे बल आगिलिस। 8 तब् ऊ जुरुकसे उठ्के ठरह्यागिल, और ऊ नेगे लागल और नेंग्ती और कुद्गति और परमेश्वरके स्तुति कर्ती ओइन्के संग मन्दिरके अंगनामे चलगिल। 9 तब् सक्कु मनै उहिहे नेंग्ती और परमेश्वरके प्रशंसा कर्ती देख्के, 10 उहिहे चिहिन्लेलाँ कि यी वहे नंग्रा भिखारी हो, जे मन्दिरके सुग्घुर नाउँक दवारमे बैठके भीख माँगे। और उ भिखारीक संग हुइलक घटनाहे देख्के ओइने छक्क परके दंग परगिलाँ।

11 जब उ भिखारी मनैया यूहन्ना और पत्रुसहे पकर्ले रहे, ते सक्कु जाने अचम्म मानलेलाँ। और ओइने ओइन्के ओहोँर दगुरती गैलाँ, और ओइने वहाँ जमा होगिलाँ, जहाँ सुलेमान नाउँक बरन्दा रहे। 12 यी देख्के पत्रुस मनैनहे कहल, "हे इजरायलके मनै, यी मनैयाहे देख्के तुहुरे काकरे अचम्म मानतो, और तुहुरे हम्रिहिन्हे काकरे घुरेरके हेरतो? तुहुरे ते हम्रिहिन्हे असिके हेरतो जसिके हम्रे अपन शक्ति या भक्तिसे यिहिहे नेङ्नाहाँ बनाइल बती। 13 हमार पुर्खन अब्राहाम, इसहाक और याकूबके परमेश्वर अपन सेबक येशूहे मुअलमेसे जित्ती बनाके महिमित करलाँ। पर तुहुरे हुँकिन्हे मरवाइक लग रोमी अधिकारीनके हाँथेम दैदेलो। और जब राजपाल पिलातस हुँकिन्हे छोरदेना विचार करल, तब तुहुरे ओकर आघे येशूहे अस्वीकार करलो। 14 पर तुहुरे येशूहे अस्वीकार करदेलो, जे पवित्र और धर्मी रहिँत। और तुहुरिन्के लग एकथो हत्याराहे छोरदेजाए कहिके तुहुरे चहलो। 15 और तुहुरे सदाकालके जीवनके स्रोतहे मुवादर्लो। पर परमेश्वर हुँकिन्हे फेनदोस्रे जिवादेलाँ; और हम्रे यी बातके साँखी बती। 16 यी मनैया, जिहिहे तुहुरे अब्बे देखतो और जिहिहे तुहुरे चिहिन्थो, यिहिहे येशू ख्रीष्टके नाउँमे विश्वास कर्लक कारण बल देगिल बतिस। और येशू ख्रीष्टमे विश्वास कर्लक कारण यी बिरकुल चोखागिल बा, जसिके अब्बे तुहुरे अप्निहीँ देखतो। 17 आब हे मोरिक विश्वासी भैयो, मै जन्थुँ कि तुहुरे और तुहुरिन्के अगुवन येशूहे अन्जानमे मुवादर्लो। काकरेकी तुहुरिन्हे पता नै रहे कि ऊ ख्रीष्ट रहिँत। 18 पर जोन बातहे परमेश्वर सक्कु अगमवक्तनके माध्यमसे पैलेहेँ बतादेले रहिँत कि ख्रीष्ट दुःख उठैहीँ और मुवाजिहीँ; और ऊ ओइन्हे जात्तिकमे करके देखैलाँ। 19 तबेकमारे अपन मन बदलके पाप करना छोरदेऊ, और परमेश्वरके ओहोँर घुमजाऊ, ताकि तुहुरिन्के पाप माफ करजाए। तब परमेश्वरके ओहोँरसे आत्मिक शक्तिक समय आई। 20 और परमेश्वर येशूहे पठैहीँ, जे वहे ख्रीष्ट हुइताँ, जिहिहे ऊ तुहुरिन्के लग पैलेहेँसे चुन्ले बताँ। 21 येशूहे स्वर्गमे उ समयसम रहे परना जरुरी बतिन, जबसम परमेश्वर अपन बनैलक सक्कु चिजहे लावा नै बनादिहीँ। बहुत समय पहिले परमेश्वर मनैनहे यी बताइक लग पवित्र अगमवक्तनके माध्यमसे असिक करना वाचा कर्ले रहिँत। 22 जसिके मोशा कले बा, ‘प्रभु परमेश्वर तुहुरिन्के लग तुहुरिन्के दादू-भैयनमेसे मोरिक हस एकथो अगमवक्ता पठैहीँ। और ऊ ज्या-ज्या कहिहीँ, तुहुरे हुँकार बात सुन्हो।’ 23 और प्रत्येक मनै जे परमेश्वरके अगमवक्तक कलक बात नै सुनी, उहिहे परमेश्वरके मनैनके बिच्चेमेसे पूरा रुपमे नाश करदेजाई। 24 परमेश्वरके अगमवक्ता शमूएलसे लेके ओकर पाछेक सक्कु अगमवक्तनके माध्यमसे फेन यहे दिनके बारेमे घोषणा करगिल बा। 25 तुहुरे सक्कु जाने परमेश्वरके अगमवक्तनके लरका और उ वाचक भागिदार हुइतो, जोन वाचा परमेश्वर तुहुरिन्के पुर्खनहे कर्ले रहिँत। जब ऊ अब्राहामसे कलाँ, ‘तोरिक छावक माध्यमसे पृथ्वीक सक्कु परिवार आशिष भेटैहीँ।’ 26 परमेश्वर अपन सेबक येशूहे मुअलमेसे जिवाके सक्कुहुनसे आघे तुहुरिन्के थेन आशिष देहक लग पठैलाँ। ताकि ऊ तुहुरिन्मेसे हरेक जहनहे तुहुरिन्के पापी जीवनहे छोरके परमेश्वरके ओहोँर घुम्नामे तुहुरिन्हे सहायता करे सेकिँत।"