1 प्रिय थियोफिलस, मै सुरुक किताबमे उ सक्कु बातके बारेमे लिख्नु, ज्या येशू सुरुएसे कर्ती और सिखैती रलाँ। 2 येशू स्वर्गमे उठागिलाँ। परमेश्वरसे स्वर्गमे उठाजिनासे आघे ऊ अपन चुनल निउतरह्यनहे पवित्र आत्मक सहायतासे आज्ञा देलाँ। 3 और हुँकार दुःख उठैलक और मुके सेकके ऊ बहुत्ते पक्का सबुतसे अपनहे ओइन्के थेन जित्ती देखैलाँ। चालीस दिनसम ऊ ओइन्के थेन देखा पर्तिरलाँ, और परमेश्वरके राजके बारेमे ओइन्से बात बत्वैती रलाँ। 4 एकचो जब ओइने एक्के संग रहिँत। तब येशू ओइन्हे भेँटा करके ओइन्हे आज्ञा देलाँ, "तुहुरे यरुशलेम शहरमेसे केहोँरो नै जैहो। पर उ पहुँराहे अँस्याऊ, जोन मोरिक बाबा तुहुरिन्हे देना वाचा कर्ले रहे। तुहुरे महिन्हे ओकर बारेमे बोलत सुन्ले बतो। 5 काकरेकी यूहन्ना ते पानीलेके डुब्कि देहल। पर अब्बक थोरिक दिन पाछे परमेश्वर तुहुरिन्के संग रहक लग पवित्र आत्माहे पठैहीँ।"

6 ओकर पाछे जब निउतरह्यन फेनदोस्रे येशूसे भेँटा हुइलाँ। तब् ओइने हुँकिन्हे पुँछ्लाँ, "हे प्रभु, का इजरायलहे स्वतन्त्र करना और हमार राजहे फेनदोस्रे बनाइक लग अप्निक समय आगिल बा?" 7 ऊ ओइन्हे कलाँ, "यी घट्ना कब हुई कहिके जन्ना तुहुरिन्हे जरुरी नै हो। मोरिक बाबक थेन किल उ निर्णय करना अधिकार बतिस। 8 पर जब पवित्र आत्मा तुहुरिन्केमे आई, तब तुहुरे शक्ति पैबो। और यरुशलेम शहरमे, सारा यहूदिया प्रदेशमे, सामरिया प्रदेशमे और संसारके हर ठाउँमे तुहुरे मोरिक बारेमे मनैनके थेन साँखी हुइबो।"

9 येशू यी बात बट्वाके सेक्लाँ ते, ओइने हेर्ती-हेर्ती परमेश्वर येशूहे स्वर्गमे उठालेलिन। और बद्रिक कारण तबसे ओइने येशूहे देखे नै सेक्लाँ। 10 और हुँकार जैती रहल समयमे जब ओइने आकाश ओहोँर हेरतिहिँत, तब् एकफाले उज्जर लुग्गा घालल दुईथो स्वर्गदूत ओइन्के लग्गे ठरह्यागिलिन। 11 और ओइने कहे लग्लाँ, "हे गालील प्रदेशके मनै, तुहुरे काकरे ठरह्याके आकाश ओहोँर हेरतो? यहे येशू, जिहिहे परमेश्वर तुहुरिन्के थेनसे स्वर्गमे लैगिल बताँ, ऊ ठिक अस्तेहेँके फेनदोस्रे अइहीँ, जसिके तुहुरे हुँकिन्हे स्वर्गमे जाइत देख्लो।"

12 जब उ स्वर्गदूतनके चलगिलाँ, तब् चेलनके जैतून कना पहाड़मेसे यरुशलेम शहरमे घुमगिलाँ। यरुशलेम शहरसे यी पहाड़ लगभग एक किलोमिटर* जतरा दूर परत। 13 और जब ओइने शहरमे पुग्लाँ ते ओइने घरक उप्पर कोन्तीमे गैलाँ। ते वहाँ यी सक्कु निउतरह्यन पत्रुस, यूहन्ना, याकूब, अन्द्रियास, फिलिप और थोमा, बारथोलोमाइ और मत्ती, अल्फयसके छावा याकूब और उग्रपन्थी दलके सिमोन और याकूबके छावा यहूदा उ कोन्तीमे रहिँत। 14 और वहाँ येशूहे सहायता करुइया जन्नी मनै, येशूक दाई मरियम और येशूक भैयनके संग यी निउतरह्यन जमा हुइल रहिँत। और ओइने मनमे एक्के लक्ष्य बनाके हरदम प्राथना करिँत।

15 वहे समयमे जब लगभग एक सौ बीस जाने विश्वासी भैयन जमा हुइल रहिँत। तब पत्रुस ओइन्के बिच्चेम ठरह्याके कहे लागल, 16 "हे मोरिक विश्वासी भैयो, पवित्र आत्मा बहुत समय आघे दाऊद रज्वक माध्यमसे यहूदक बारेमे भविष्यवाणी करल रहिँत, जे येशूहे गिरफ्तार करुइया मनैनके अगुवा बनगिलस। यी जरुरी रहे कि यहूदक बारेमे पवित्र शास्त्रमे लिखल बात पूरा होए। 17 ऊ हमारमेसे एकथो रहे, और यी सेवाके काममे फेन शामिल हुइल रहे। 18 जसिके तुहुरे सक्कु जाने जन्थो कि यहूदी दलके नेतन यहूदाहे पैँसा देले रहिँत, जब ऊ येशूहे धोखा देना वाचा करल रहे। और पाछेजाके यहूदा उ पैँसा ओइन्हे घुमादेहल। और जब यहूदा अपनहे अप्निहीँ फाँसी लगालेहल, तब ओकर शरीर भुइयाँमे गिरगिलिस। ओकर धिँर फाट्गिलिस, और ओकर सक्कु भुँरपतंगा बाहेर निकरगिलिस। तबेकमारे यहूदी दलके नेतन उ पैँसालेके खेट्वा किनलेलाँ। 19 और यी बात यरुशलेम शहरके मनै पता पालेलाँ। तबेकमारे ओइने उ ठाउँहे अपन भाषामे आखेल्दामा (खुनके खेट्वा) कहे लग्लाँ। 20 काकरेकी दाऊद भजनसंग्रहक किताबमे असिके लिखल बा,

‘ओकर घर उजरजाए,

और उ घरेम केऊ ना रहिँत।’

और दाऊद दोसुर ठाउँमे असिके फेन कहल बा,

‘कौनो दोसुर जाने ओकर पद लैलिँत।’"

21,22 तबेकमारे यी जरुरी बा कि एकथो असिन मनैयाहे चुने परी, जे प्रभु येशूक सक्कु समयमे कर्लक कामक साँखी बा। और प्रभु येशूहे यूहन्नक माध्यमसे डुब्कि देनासे लेके येशूहे स्वर्गमे स्वीकार हुइतसम यी मनैया हमार संग प्रभु येशूक फेनदोस्रे जित्ती हुइलक साँखी बने। 23 तब ओइन्मेसे दुई जहनके नाउँ प्रस्तावमे धरलाँ, एकथो बारसाबास कना योसेफ, जेकर उपनाउँ युस्तस रहिस, और दोसुर नाउँ मतियासके रहिस। 24 और ओइने असिके प्राथना करलाँ, "हे प्रभु, अप्नि सक्कु मनैनके मनके बात जन्थी। यी दुई जहनमेसे अप्नि किहिहे चुनल बती, वहे हम्रिहिन्हे देखादी। 25 काकरेकी यहूदा मुगिलस, और उ ठाउँमे चलगिल, जहाँ उहिहे जाई परना रहिस। यी सेवाके काममे और निउतरह्यक खाली रहल यहे ठाउँमे हम्रे उहिहे धारे सेकी।" 26 तब् ओइने चिट्टा दरलाँ और चिट्टा मतियासके नाउँमे परगिलिस। तबेकमारे असिके एघारथो निउतरह्यनके संग ऊ फेन गनगिलस।