1 कैसरिया शहरमे कर्नेलियस नाउँक एकथो मनैया रहे, जे इटालिया नाउँ रहल पल्टनके एकथो कप्तान रहे। 2 ऊ परमेश्वरके आराधना करे, और ऊ और ओकर पूरा परिवार परमेश्वरके डर मानिँत। और ऊ गरीब यहूदिनहे खुशीसे दान देहे, और हरदम परमेश्वरसे प्राथना करे। 3 एक दिन दुपहरके लगभग तीन बजे ओहोँर कर्नेलियस दर्शनमे एकदम फरछ्वारसे देखल कि परमेश्वरके एकथो स्वर्गदूत ओकर लग्गे आके उहिहे कलिस, "हे कर्नेलियस!" 4 तब कर्नेलियस स्वर्गदूतहे ध्यान देके हेरल, और डरैती उहिहे कहल, "का आज्ञा बा प्रभु?" तब् स्वर्गदूत उहिहे कलिस, "तोहाँर प्राथना और गरीबनहे देलक दान सम्झनक रुपमे परमेश्वरके थेन पुगल बा। 5 आब कौनो मनैनहे योप्पा नगरमे पठाऊ, और पत्रुस कना सिमोनहे बलाई पठाऊ। 6 ऊ छालक काम करुइया सिमोनके थेन जाके रहता, जेकर घर समुन्दरके आँरितिर बतिस।" 7 जब उहिसे बोलुइया स्वर्गदूत ओकर थेनसे विदा हुइलिस, तब् कर्नेलियस अपन नोकरहुँक्रिहिनमेसे दुईथो नोकर और परमेश्वरके आराधना करुइया एकथो सिपाहिहे अपन थेन बलाइल। 8 और ओइन्हे सक्कु बात बताके पत्रुसहे नानक लग योप्पा नगरमे पठादेहल।

9 दोसुर दिन जब कर्नेलियसके पठैलक उ तीन जाने अपन यात्रा कर्ती गैलाँ, ते ओइने दुपहरके बाह्र बजे ओहोँर योप्पा शहरके लग्गे पुग्लाँ। वहे समयमे पत्रुस प्राथना करक लग अपन बैठल घरक छटमे चहुँरल। 10 और पत्रुसहे भुँख लागगिलिस। जब दोसुर जाने खाना निधतिहित, वहे समयमे पत्रुस एकथो दर्शन देखल। 11 और ऊ असिन देखल कि स्वर्ग उघरगिल, और वहाँसे चारु कोन्वामे बाँधल तन्ना हस कुछु पृथ्वी ओहोँर गिरतेहे। 12 उ तन्नामे पृथ्वीक सक्कु मेरके चरगोरिया जानबर और घस्रना प्राणी और आकाशमे उरुइया चिरैँचुरुंगीन रहिँत। यनकेमे उ जानबर और चिरैँ फेन शामिल रहिँत, जेनके बारेमे मोशक नियम कानुन कहत कि ओइने अशुद्ध और अपवित्र हुइँत, और यनहे खाइक लग यहूदिनहे मनाहीँ बतिन। 13 तब् पत्रुस एकथो आवाज सुनल, "ए पत्रुस उठो और मुवाके खाऊ।" 14 पर पत्रुस कहल, "नाई प्रभु, काकरेकी मै कबु फेन कुछु अपवित्र या अशुद्ध चिज नै खाइल हुइतुँ।" 15 पत्रुस फेनदोस्रे दोसुरचो आवाज सुनल, "परमेश्वर जोन चिजहे शुद्ध करदेले बताँ, उहिहे तुँ अशुद्ध ना कहो।" 16 यी दर्शन तीनचो दोहोरागिलस, और जुरतेहेँ उ तन्ना स्वर्ग ओहोँर उठागिलस।

17 पत्रुस अभिन यहे दोधारमे रहे कि मोरिक देख्लक दर्शनके मतलब का हुई सेकी। तब्बेहेँ कर्नेलियसके पठाइल मनै सिमोनके घर खोज्ती ओक्रेहे घरक दवारी थेन पुगगिलाँ। 18 और ओइने गोहराके पुँछे लग्लाँ, "का पत्रुस कना सिमोन यहाँ रहत?" 19 जब पत्रुस दर्शनके बारेमे सोँचतेहे, तब्बेहेँ पवित्र आत्मा उहिहे कलिस, "हेरो, तीनथो मनै तुहिन्हे खोजतताँ। 20 उठो, और तरे जाऊ। भले ओइने गैर-यहूदिन हुइताँ, तभुन फेन बिना हिचकिचैले तुँ ओइन्के संग चलजाऊ। काकरेकी तोहाँर थेन ओइन्हे मै पठैनु।" 21 तब् पत्रुस तरे उतरगिल, और उ मनैनके थेन जाके कहल, "हेरो, जिहिहे तुहुरे खोजतो, उ मनैया महिँ हुइतुँ; तुहुरे यहाँ काकरे अइलो?" 22 ओइने जवाफ देलाँ, "हम्रिहिन्हे एकथो कप्तान कर्नेलियस अप्निक थेन पठैले बताँ, ऊ धार्मिक और परमेश्वरके डर मनुइया और पूरा यहूदी जातिमेसे सम्मान भेटाइल मनैया हुइताँ। हुँकिन्हे एकथो पवित्र स्वर्गदूतसे दर्शन मिल्लिन कि ऊ अप्निहे अपन घर बलाइँत और अप्निन्से उपदेश सुनिँत।" 23 तब् पत्रुस ओइन्हे भित्तर बलाके ओइन्हे रहक लग ठाउँ देलस। और दोसुर दिन पत्रुस उठ्के ओइन्के संग गैल, और योप्पा नगरके गोड्गात विश्वासी भैयन फेन ओइन्के संग गैलाँ।

24 दोसुर दिन ओइने कैसरिया शहरमे पुगगिलाँ। और कर्नेलियस अपन गोत्यारीनहे और अपन एकदम मिल्ना संघरियनहे एक्के थेन जुटाके ओइन्के अइना डगर हेरतेहे। 25 जब पत्रुस भित्तर आइल, तब् कर्नेलियस उहिसे भेँटा करल, और ओकर गोरामे लिहुरके ओकर आराधना कर्लस। 26 पर पत्रुस उहिहे उठाके असिक कहल, "उठी, और मोरिक आराधना ना करी, काकरेकी मै फेन ते एकथो मनैया हुइतुँ।" 27 तब् पत्रुस कर्नेलियसके संग बात बत्वैती भित्तर गैल, और वहाँ ऊ बहुत्ते जहनहे जमा हुइल भेटाइल। 28 तब् पत्रुस उहिहे कहल, "गैर-यहूदिनके संग संगत करना, अथवा ओइन्हे भेटघाट करना हम्रे यहूदी मनैनके लग यहूदी मोशक नियम कानुनके विरोधमे बा कना बात तुहुरिन्हे पतै बा। तभुन फेन परमेश्वर महिन्हे कौनो फेन मनैयाहे अपवित्र अथवा अशुद्ध ना मन्हो कहिके देखाइल बताँ। 29 तबेकमारे बलैती किल बिना हिचकिचैले मै अप्निनके थेन आगिनु। आब मै जाने चहथुँ कि अप्नि महिन्हे काकरे बलैली?" 30 ओकरपाछे कर्नेलियस कहल, "चार दिन आघे लगभग यहे समयमे जब मै घरेम दिनक तीन बजे प्राथना करतुँहुँ, तब्बेहेँ चहकार लुग्गा घालल एकथो मनैया मोरिक आघे ठरह्यागिल। 31 और महिन्हे कहल, ‘हे कर्नेलियस! तोहाँर प्राथना और गरीबनहे देलक दान सम्झनक रुपमे परमेश्वरके थेन पुगल बा। 32 आब कौनो मनैनहे योप्पा नगरमे पठाऊ, और पत्रुस कना सिमोनहे बलाई पठाऊ। ऊ छालक काम करुइया सिमोनके थेन जाके रहता, जेकर घर समुन्दरके आँरितिर बतिस। जब ऊ आई, तब ऊ तुहुरिन्हे परमेश्वरके ओहोँरसे एकथो सन्देश बताई।’ 33 तब् मै जुरतेहेँ अप्निन्हे बलाइक लग मै अपन कामदारीनहे अप्निक थेन पठैनु, और मजा हुइल कि अप्नि आदेली। आब हम्रे सक्कु जाने यहाँ यी कारणसे जुटल बती ताकि परमेश्वर अप्निहे ज्या-ज्या कले बताँ उहिहे हम्रे सुने सेकी।"

34 तब् पत्रुस बोले लागल, "आब मै जानदर्नु कि जात्तिकमे परमेश्वर किहुहे फेन पक्षपात नै करथाँ। 35 पर हरेक जातिमेसे जे परमेश्वरसे डराइत, और धार्मिक काम करत, उहिएहे परमेश्वर स्वीकार करथाँ। 36 अप्नि उ सन्देशहे जन्थी, जोन सन्देश परमेश्वर हम्रे, इजरायलके मनैनहे पठैले बताँ। और वहे शान्तिक बारेमे खुशीक खबर सुनैलाँ, जोन शान्ति मनैनहे येशू ख्रीष्टकेमे विश्वास कर्लेसे मिलत। ऊ सक्कु मनैनके परमेश्वर हुइँत। 37 उ सन्देशहे तुहुरे जन्थो, जोन सन्देश डुब्किक बारेमे यूहन्नक कर्लक प्रचारके पाछे गालील प्रदेशमेसे सुरु हुइल। और पूरा यहूदिया प्रदेशमे फैलगिल: 38 कि परमेश्वर नासरत गाउँक येशूहे पवित्र आत्मा और शक्तिलेके अभिषेक करलाँ। येशू मजा काम कर्ती गैलाँ। और शैतानके सटैलक सक्कु मनैनहे चोख्वैती नेंग्लाँ। काकरेकी परमेश्वर हुँकार संग रहिन। 39 और यहूदिनके देशमे और यरुशलेम शहरमे येशूक कर्लक सक्कु कामके हम्रे साँखी बती। और यरुशलेम शहरमे यहूदी जातिक नेतनके हुँकिन्हे क्रूसमे टँगाके फेन मुवाँदेलाँ। 40 पर तेसर दिन परमेश्वर येशूहे मुअलमेसे फेनदोस्रे जिवादेलाँ। और हुँकिन्हे प्रकट फेन करदेले बताँ। 41 सक्कु मनै हुँकिन्हे नै देख्लाँ। पर परमेश्वर हम्रिहिन्हे अर्थात निउतरह्यनहे सुरुसे रोजलेले रहिँत। और जब ऊ मुअलमेसे जित्ती हुइलाँ ते हम्रे हुँकार संग खैली और पिली। 42 और ऊ हम्रिहिन्हे आज्ञा देलाँ कि सक्कु मनैनहे असिके प्रचार करो। और गवाही देऊ कि येशू वहे हुइँत, जिहिहे परमेश्वर जित्ती और मुअल मनैनके न्यायकर्ता नियुक्त कर्ले बताँ। 43 परमेश्वरके सक्कु अगमवक्तन येशूक बारेमे गवाही देले बताँ, कि ख्रीष्ट जोन काम क्रूसमे करलाँ, उ कामके कारण जे-जे हुँकारमे विश्वास करी ओइन्के पाप माफ होजिहीन।"

44 पत्रुस यी बात बत्वैती रहे, तब्बेहेँ ओकर वचन सुनुइया सक्कुहुनकेमे पवित्र आत्मा आगिलिन। 45 और जतरा जाने यहूदी विश्वासीन पत्रुसके संग आइल रहिँत, ओइने सक्कु जाने अचम्मित होगिलाँ कि गैर-यहूदिनकेमे फेन पवित्र आत्मक वरदान देगिल बा। 46 काकरेकी ओइने ओइन्हे फरक-फरक भाषामे बोलत, और परमेश्वरके प्रशंसा करत सुन्लाँ। तब् पत्रुस कहल, 47 "हमारे हस यनहे फेन परमेश्वरके ओहोँरसे पवित्र आत्मा मिलल बतिन, और यनहे आब पानीक डुब्कि लेनासे केऊ नै रोके सेकी।" 48 तब् पत्रुस कर्नेलियसके घरेम रहुइया सक्कु गैर-यहूदिनहे आज्ञा देहल कि ओइने येशू ख्रीष्टके नाउँमे डुब्कि लिँट्। ओकर पाछे पत्रुस थोरिक दिन आकुर ओकर संग पलिरहे कहिके कर्नेलियस पत्रुसहे अनुरोध करल।